ភ្នំពេញ – ក្រសួងអប់រំ យុវជន និងកីឡា ទទួលពានទិវាពិភពលោកគ្មានថ្នាំជក់ ឆ្នាំ២០២៣ ពីអង្គការសុខភាពពិភពលោក ក្នុងទិវាពិភពលោកគ្មានថ្នាំជក់ ក្រោមប្រធានបទ “យើងត្រូវការអាហារ មិនមែនថ្នាំជក់” ដែលប្រព្រឹត្តទៅនៅទីស្ដីការក្រសួងសុខាភិបាល នាព្រឹកថ្ងៃទី២៩ ខែឧសភា ឆ្នាំ២០២៣។

ពាន ”ទិវាពិភពលោកគ្មានថ្នាំជក់” នេះត្រូវបានផ្ដល់ជូនទៅដល់ស្ថាប័នណាដែលបានចូលរួមចំណែកយ៉ាងខ្លាំងក្នុងការជំរុញគោលនយោបាយ និងវិធានការក្នុងអនុសញ្ញាក្របខ័ណ្ឌអង្គការសុខភាពពិភពលោកស្តីពីការគ្រប់គ្រងផលិតផលថ្នាំជក់ ក្នុងគោលដៅបង្ការកុមារ និងយុវជនឱ្យចាក់ផុតពីគ្រោះថ្នាក់នៃការប្រើប្រាស់ផលិតផលថ្នាំជក់។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ការទទួលបានពានរង្វាន់នេះ ពិតជាបានឆ្លុះបញ្ចាំងឈរលើមូលដ្ឋានសំខាន់ៗដែលក្រសួងអប់រំ បានចូលរួមជាមួយជាមួយរាជរដ្ឋាភិបាល ក៏ដូចជាក្រសួងពាក់ព័ន្ធ ជាពិសេសជាមួយអង្គការសុខភាពពិភពលោកនៅក្នុងការរៀបចំគោលនយោបាយពាក់ព័ន្ធជាមួយសុខភាពសិក្សា។ ជាពិសេស គោលការណ៍បង្ការទប់ស្កាត់ការប្រើប្រាស់ថ្នាំជក់ក្នុងវិស័យអប់រំ កំណែទម្រង់កម្មធីសិក្សា ដើម្បីបញ្ចូលមេរៀនស្ដីពីផលប៉ះពាល់អវិជ្ជមាននៃការប្រើប្រាស់ផលិតផលថ្នាំជក់មកលើសុខភាព នៅក្នុងសៀវភៅសិក្សាមុខវិជ្ជាថ្នាក់សិក្សាសង្គម កម្រិតមធ្យមសិក្សា។

រដ្ឋមន្រ្តីក្រសួងអប់រំ បញ្ជាក់បន្ថែមថា នេះជាកម្លាំងជំរុញដល់ថ្នាក់ដឹកនាំគ្រប់កម្រិតជាន់ថ្នាក់ បុគ្គលិកអប់រំនិងអ្នកសិក្សាទូទាំងប្រទេស ដែលខិតខំបំពេញបេសកកម្មបន្ថែមទៀតនៅក្នុងការសហការជាមួយក្រសួងសុខាភិបាល អង្គការសុខភាពពិភពលោក ក៏ដូចជាអង្គការពាក់ព័ន្ធ នៅក្នុងការចូលរួមថែរក្សា និងពង្រឹងលទ្ធផលនានាពេលកន្លងមក។ ជាពិសេសក្នុងការលើកកម្ពស់សុខភាពសិក្សា សុខភាពយុវជន យុវនារីកម្ពុជា ដើម្បីអភិវឌ្ឍជាគំរូប្រកបដោយភាពពេញលេញមានសុខភាព វិជ្ជាសម្បទារ ចរិយាសម្បទារ បំណិនសម្បទារ ដើម្បីឱ្យសង្គមកម្ពុជាទាំងមូលមានការអភិវឌ្ឍប្រកបដោយសក្តានុពល និងមានសុពលភាព។

“ខ្ញុំសូមថ្លែងអំណរគុណយ៉ាងជ្រាលជ្រៅចំពោះ ការឧបត្ថម្ភនៃស្ថាប័នពាក់ព័ន្ធនៃរាជរដ្ឋាភិបាលកម្ពុជា សង្គមស៊ីវិល ភាគីដៃគូពាក់ព័ន្ធ ជាពិសេសអង្គការសុខភាពពិភពលោកដែលបានគាំទ្រក្រសួងអប់រំ ការលើកកម្ពស់សុខភាពសិក្សា ដើម្បីធានាបានថា គ្រឹះស្ថានសិក្សានៅកម្ពុជាជាកន្លែងផ្ដល់ការអប់រំ ប្រកបដោយគុណភាពសមធម៌ និងបរិយាបន្ន លើកកម្ពស់ការអប់រំពេញមួយជីវិតសម្រាប់ទាំងអស់គ្នា”

ឯកឧត្តម ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ។

ឯកឧត្តមបណ្ឌិតសភាចារ្យ រំលឹកថា នៅឆ្នាំ២០០០ ក្រសួងអប់រំ បានចេញសេចក្ដីណែនាំ ស្ដីពីការអនុវត្តការហាមឃាត់ការជក់បារីនៅកន្លែងធ្វើការ និងនៅតាមគ្រឹះស្ថានសិក្សា។ នៅឆ្នាំ២០០៦ ក្រសួងអប់រំ ក៏បានបញ្ចូលខ្លឹមសារនានាដែលទាក់ទងនឹងផលប៉ះពាល់វិជ្ជមាននៃការប្រើប្រាស់ថ្នាំជក់ នៅក្នុងកម្មវិធីសិក្សាលំអិត មុខវិជ្ជាអប់រំសុខភាព ទាំងសម្រាប់បឋមសិក្សានិងមធ្យមសិក្សាបឋមភូមិ និងមធ្យមសិក្សាទុតិយភូមិ។ នៅឆ្នាំ២០១៨ ក្រសួងអប់រំបានចេញសេចក្ដីណែនាំស្ដីពី  ការហាមឃាត់ការប្រើប្រាស់ ការផ្សព្វផ្សាយពាណិជ្ជកម្ម និងការតាំងលក់ក្នុងបរិវេណគ្រឹះស្ថានសិក្សាសាធារណៈ និងឯកជន ក្នុងនោះក៏បានហាមឃាត់ការទទួលយកសម្ភារៈនានាដែលមានភ្ជាប់និមិត្តសញ្ញាសម្គាល់ថ្នាំជក់។

នៅចន្លោះឆ្នាំ២០១៩ ដល់ឆ្នាំ២០២២ ក្រសួងអប់រំ បានបញ្ចប់សេចក្ដីព្រាងអនុម័តសៀវភៅសិក្សាគោលមុខវិជ្ជាអប់រំសុខភាពសម្រាប់គ្រូ និងសិស្ស ចាប់ពីថ្នាក់ទី១ ដល់ថ្នាក់ទី១២ ក្នុងនោះក៏បានបញ្ចូលខ្លឹមសារមេរៀនពាក់ព័ន្ធនឹងផលអវិជ្ជមាន នៃការប្រើប្រាស់ផលិតផលថ្នាំជក់ និងបានធ្វើការសាកល្បងបំប៉នបុគ្គលិកអប់រំបានប្រមាណ ៣០០០នាក់ ពីការប្រើប្រាស់សៀវភៅសិក្សាគោលថ្មីនេះ ទាំងមធ្យោបាយបំប៉នផ្ទាល់ និងតាមអនឡាញ។ ហើយនៅឆ្នាំ២០២៣ ក្រសួងអប់រំ បានអនុម័តការបោះពុម្ភសៀវភៅសិក្សាគោលមុខវិជ្ជាអប់រំសុខភាព សម្រាប់គ្រូ និងសិស្សថ្នាក់ទី១ ទី៤ ទី៧ និងទី១០ ព្រមទាំងចែកផ្សាយជំហានដំបូងនៅទូទាំងប្រទេស។

ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា ដោយមានការគាំទ្រពីក្រសួងសុខាភិបាល និងភាគីពាក់ព័ន្ធក្រសួងអប់រំ បានរៀបចំសិក្ខាសាលាស្ដីពី ការផ្សព្វផ្សាយពីផលប៉ះពាល់អវិជ្ជមាននៃការប្រើប្រាស់ផលិតផលថ្នាំជក់ដល់បុគ្គលិកអប់រំ និងអ្នកសិក្សានៅតាមគ្រឹះស្ថានសិក្សាសាធារណៈ និងឯកជន ជារៀងរាល់ឆ្នាំចាប់តាំងពីឆ្នាំ២០១១។ ទន្ទឹមគ្នានេះ ក្រសួងបានរៀបចំការប្រឡងប្រណាំងគូររូបភាពពាក់ព័ន្ធនឹងការប្រើប្រាស់ផលិតផលថ្នាំជក់ក្នុងចំណោមកុមារ និងយុវជន និងបានរៀបចំការប្រកួតជជែកដេញដោលសម្រាប់យុវជន សិស្ស និស្សិតក្នុងការជជែកដេញដោលស្ដីពីផលប៉ះពាល់អវិជ្ជមានស្ដីពីការប្រើប្រាស់ផលិតថ្នាំជក់ ។

គួរជម្រាបជូនថា ទិវាពិភពលោកគ្មានថ្នាំជក់ ជាព្រឹត្តិការណ៍សុខភាពសាធារណៈដ៏សំខាន់មួយដែលកំណត់ឡើងដោយអង្គការសុខភាពពិភពលោកចាប់តាំងពីឆ្នាំ១៩៥៧ ដែលប្រព្រឹត្តទៅរៀងរាល់ឆ្នាំនៅថ្ងៃទី៣១ ខែឧសភា ក្នុងគោលបំណងក្រើនរំលឹកដល់ប្រជាជនទាំងអស់លើពិភពលោកអំពីផលប៉ះពាល់ដ៏ធ្ងន់ធ្ងររបស់ផលិតផលថ្នាំជក់មកលើសុខភាព សេដ្ឋកិច្ច បរិស្ថាន សង្គម និងអំពាវនាវដល់រដ្ឋភាគីទាំងអស់ និងដៃគូរពាក់ព័ន្ធរួមគ្នាជំរុញការលះបង់ទម្លាប់ប្រើប្រាស់ផលិតផលថ្នាំជក់ ព្រមទាំងការពារមនុស្សជំនាន់នេះ និងជំនាន់ក្រោយពីផលិតផលថ្នាំជក់៕