ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីផ្សព្វផ្សាយជាផ្លូវការ «របាយការណ៍នៃកម្មវិធីអន្តរជាតិស្តីពីរង្វាយតម្លៃលទ្ធផលសិក្សារបស់សិស្ស ឆ្នាំ២០២៥ (PISA-2025) របស់ប្រទេសកម្ពុជា» កាលពីថ្ងៃទី៨ ខែកញ្ញា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា គុណភាពគ្រូ គឺជាបេះដូងនៃការធ្វើកំណែទម្រង់វិស័យអប់រំ។
រដ្ឋមន្ត្រីក្រសួងអប់រំ លើកឡើងថា ការបង្កើនគុណវុឌ្ឍ ការដំឡើងប្រាក់បៀវត្សគ្រូជិតបីដងជាមធ្យម និងការពង្រឹងការបណ្តុះបណ្តាលគ្រូបង្រៀន តាមរយៈការធ្វើកំណែទម្រង់គ្រឹះស្ថានបណ្តុះបណ្តាលគ្រូ បានជួយលើកកម្ពស់ការរៀនសូត្ររបស់សិស្ស។ ទន្ទឹមគ្នានេះ គ្រូបង្រៀន និងគណៈគ្រប់គ្រងសាលារៀនប្រមាណ ៦ពាន់នាក់ បានបញ្ចប់ការបណ្តុះបណ្តាល ដោយទទួលបានសញ្ញាបត្របរិញ្ញាបត្រ និងបរិញ្ញាបត្រជាន់ខ្ពស់។
តាមការវិភាគលទ្ធផល PISA បានបង្ហាញថា សាលារៀនដែលបានចូលរួមក្នុងកម្មវិធីកំណែទម្រង់ការអប់រំ ទទួលបានលទ្ធផលល្អប្រសើរ, ឯកឧត្តមរដ្ឋមន្រ្តីមានប្រសាសន៍ថា មានសាលារដ្ឋមួយចំនួនទទួលបានលទ្ធផលល្អ ជាងសាលាឯកជនទៀតផង។
យ៉ាងណាក៏ដោយ រដ្ឋមន្ត្រីក្រសួងអប់រំសង្កត់ធ្ងន់ថា កម្ពុជាគួរតែបន្តពង្រឹងប្រព័ន្ធបណ្តុះបណ្តាលគ្រូ ១២+៤ ជាកំណែទម្រង់គុណភាពដ៏សំខាន់។ ក្នុងនោះ ការវិនិយោគលើការអភិវឌ្ឍគ្រូបង្រៀនដែលមានគុណភាពខ្ពស់នាពេលបច្ចុប្បន្ន នឹងទ្រទ្រង់ដល់ប្រព័ន្ធអប់រំសម្រាប់រាប់ទសវត្សរ៍ខាងមុខ។
«ទោះបីជាគុណភាពសិស្សមានសារៈសំខាន់ ប៉ុន្តែគុណភាពគ្រូបង្រៀនរឹតតែមានសារៈសំខាន់ជាង ក្នុងការរក្សាបាននូវការកែលម្អការអប់រំរយៈពេលវែង»
ឯកឧត្តមបណ្ឌិតសភាចារ្យ ហង់ជួន ណារ៉ុន បន្ថែមថា លក្ខណៈពិសេសមួយនៃលទ្ធផល PISA របស់កម្ពុជា គឺគម្លាតរវាងសាលារៀននៅទីប្រជុំជន និងសាលារៀននៅជនបទមានកម្រិតតូចតាចប៉ុណ្ណោះ នៅពេលដែលសាលារៀនទាំងនោះ ទទួលបានផលប្រយោជន៍ពីកំណែទម្រង់ដែលមានប្រសិទ្ធភាព។ ឯកឧត្តមបណ្ឌិតសភាចារ្យបន្តថា ការកែលម្អសាលារៀន ការបណ្តុះបណ្តាលគ្រូ និងនាយកសាលា ការពង្រឹងការគ្រប់គ្រង ការវិនិយោគលើបន្ទប់ពិសោធន៍ និងបន្ទប់កុំព្យូទ័រ ព្រមទាំងការចូលរួមពីមាតាបិតា និងសហគមន៍ សុទ្ធតែជាកត្តារួមចំណែកដល់ការលើកកម្ពស់លទ្ធផលសិក្សារបស់សិស្ស។
កំណែទម្រង់វិស័យអប់រំកម្ពុជា ចាប់ពីឆ្នាំ២០១៣ មកទល់ពេលបច្ចុប្បន្ន បានចាប់ផ្តើមពី ការដាក់ចេញនូវកំណែទម្រង់ ដំណាក់កាលទី១ ដែលរួមមាន ៨ចំណុច៖ ១. ការបង្កើនគុណភាពអប់រំ ២. ការពង្រឹងការគ្រប់គ្រងបុគ្គលិកអប់រំ ៣. ការពង្រឹងការប្រឡងគ្រប់ប្រភេទ ៤. កំណែទម្រង់ឧត្តមសិក្សា ៥. ការអភិវឌ្ឍយុវជននូវជំនាញបច្ចេកទេសនិងជំនាញទន់ ៦. កំណែទម្រង់ការគ្រប់គ្រងហិរញ្ញវត្ថុសាធារណៈ ៧. កំណែទម្រង់ការអប់រំបច្ចេកទេសនិងកីឡា និង៨. ការបង្កើតអង្គភាពស្រាវជ្រាវគោលនយោបាយអប់រំ៕
