ជា​ឱកាស​សម្រាប់​និស្សិត ​នៃ​សាកលវិទ្យាល័យ​ជាតិ​បាត់ដំបង (NUBB) ពេលនេះ សាកលវិទ្យាល័យ Sannio ប្រទេស​អ៊ីតាលី កំពុង​ប្រកាសជ្រើសរើសនិស្សិត ដើម្បីផ្លាស់​ប្តូរ​ការ​សិក្សា​អន្តរជាតិ (International Credit Mobility) ​រយៈ​ពេល ៥ ខែ ដោយចាប់​ពី​ខែកញ្ញា ឆ្នាំ២០២៦ ដល់ ខែមករា ឆ្នាំ២០២៧។

​អត្ថប្រយោជន៍​ដែល​សិស្ស​និស្សិតទទួលបាន​ក្នុងកម្មវិធីនេះ ​រួម​មាន៖ សំបុត្រយន្តហោះទៅ-មក ក៏​ដូចជាប្រាក់ឧបត្ថម្ភប្រចាំខែ។

ដើម្បីមាន​សិទ្ធិ​ដាក់ពាក្យ បេក្ខជន​ត្រូវបំពេញលក្ខខណ្ឌដូចខាងក្រោម៖

• ជានិស្សិតថ្នាក់បរិញ្ញាបត្រ ឬបរិញ្ញាបត្រជាន់ខ្ពស់ នៃសាកលវិទ្យាល័យជាតិបាត់ដំបង ក្នុងអំឡុងពេលចូលរួមកម្មវិធី
• មាននិទ្ទេសមធ្យម (GPA) ចាប់ពី ៣.០០ ឡើងទៅ នៅពេលដាក់ពាក្យ
• មានលទ្ធភាពចំណាយថ្លៃចាំបាច់ជាមុនសិន មុននឹងទទួលបានការសងត្រឡប់វិញពីកម្មវិធី
• ប្តេជ្ញាចូលរួមជាមួយបណ្តាញអតីតនិស្សិតអន្តរជាតិរបស់សាកលវិទ្យាល័យ
• មានសមត្ថភាពប្រើប្រាស់ភាសាអង់គ្លេសបានល្អ
• ប្រសិនបើអាចទំនាក់ទំនងជាភាសាអ៊ីតាលីបាន នឹងទទួលបានអាទិភាពបន្ថែម

ឯកសារត្រូវភ្ជាប់

• វិញ្ញាបនបត្រ ឬឯកសារបន្ថែមផ្សេងៗ (ប្រសិនបើមាន)
• ប្រវត្តិរូបសង្ខេប (CV)
• លិខិតបង្ហាញចំណាប់អារម្មណ៍ (Motivation Letter / Letter of Interest)
• ច្បាប់ចម្លងពិន្ទុសិក្សាចុងក្រោយបំផុត (Academic Transcript)
• បង្កាន់ដៃបង់ថ្លៃសិក្សា ឬបញ្ជាក់ការចុះឈ្មោះសិក្សា
• ច្បាប់ចម្លងលិខិតឆ្លងដែន (ទំព័រព័ត៌មានផ្ទាល់ខ្លួន)
• វិញ្ញាបនបត្របញ្ជាក់សមត្ថភាពភាសាអង់គ្លេស និង/ឬ ភាសាអ៊ីតាលី ឬឯកសារសមមូល

ស្រប​ពេល​ជា​មួយ​គ្នា​នេះ ដើម្បីទទួលបានការតែងតាំងពីសាកលវិទ្យាល័យ និស្សិតត្រូវបំពេញលក្ខខណ្ឌខាងលើ និង​ដាក់ឯកសារទាំងអស់ទៅកាន់ ការិយាល័យទំនាក់ទំនងសាធារណៈ និងកិច្ចការអន្តរជាតិ នៃ​សាកល​វិទ្យាល័យ​ជាតិ​បាត់ដំបង ឱ្យ​បានមុនថ្ងៃទី៨ ខែមិថុនា ឆ្នាំ២០២៦។

បេក្ខជនដែលជាប់ជម្រើសដំបូង នឹងត្រូវបានជូនដំណឹងឱ្យចូលរួមប្រឡងសរសេរ នៅថ្ងៃទី ១០ ខែមិថុនា ឆ្នាំ២០២៦ ហើយនៅថ្ងៃទី១២ ខែមិថុនា ឆ្នាំ២០២៦ សាកលវិទ្យាល័យជាតិបាត់ដំបង នឹងបញ្ជូនឈ្មោះបេក្ខជនដែលត្រូវបានតែងតាំងទៅកាន់សាកលវិទ្យាល័យដៃគូ ដើម្បីធ្វើការជ្រើសរើសចុងក្រោយ។ បេក្ខជនដែលទទួលបានជោគជ័យ នឹងត្រូវបានទាក់ទងដោយផ្ទាល់តាមរយៈអ៊ីមែល។

សម្រាប់ព័ត៌មានបន្ថែម បេក្ខជនអាចទាក់ទងតាម Telegram ៖ (+855) 10 711 866៕