ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ដើម្បីមានអាទិភាពខ្ពស់ទៅសិក្សានៅប្រទេសចិន សិស្ស-និស្សិតដែលចង់ស្នើពាក្យអាហារូបករណ៍គួរចេះភាសាចិនល្អ ឬតិចតួចក៏បាន ព្រោះអាហារូបករណ៍ផ្ដោតសំខាន់លើភាសាចិនទោះបីជាការសិក្សាជាភាសាចិន ឬភាសាអង់គ្លេសក៏ដោយ ។ នេះជាការលើកឡើងរបស់កញ្ញា ហោ រស្មី អនុប្រធានក្រុមប្រឹក្សាភិបាលសមាគមនិស្សិតកម្ពុជានៅសាធារណរដ្ឋប្រជាមានិតចិន (ស.ន.ក.ច) ។
កញ្ញា ហោ រស្មី បានលើកឡើងថា អាហារូបករណ៍ទៅសិក្សានៅប្រទេសចិនបែងចែកជា៤ប្រភេទ គឺ អាហារូបករណ៍ថ្នាក់ជាតិ, អាហារូបករណ៍រដ្ឋាភិបាលចិន, អាហារូបករណ៍វិទ្យាស្ថានខុងជឺ និងអាហារូបករណ៍ខ្សែក្រវ៉ាត់មួយផ្លូវមួយ ។ បេក្ខជនដែលមានបំណងស្នើពាក្យអាហារូបករណ៍ថ្នាក់ជាតិ អាចធ្វើការសាកសួរព័ត៌មានបានតាមរយៈក្រសួងអប់រំ យុវជន និងកីឡា ដោយចាប់ពីពាក់កណ្ដាលខែធ្នូ ហើយការជ្រើសរើសសិស្សអាហារូបករណ៍ថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត អាចចាប់ផ្ដើមពីខែតុលា ។
បើនិស្សិតចេះភាសាចិន អាចមានអាទិភាពខ្ពស់ក្នុងការទទួលបានអាហារូបករណ៍សិក្សានៅប្រទេសចិន
កញ្ញា ហោ រស្មី
កញ្ញា រស្មី បានបន្តថា ក្នុងករណីសិស្ស-និស្សិតចង់ធ្វើការដាក់ពាក្យដោយផ្ទាល់ទៅកាន់សាកលវិទ្យាល័យនៅប្រទេសចិនតាមរយៈអាហារូបករណ៍រដ្ឋាភិបាលចិន និស្សិតអាចធ្វើការតាមដានព័ត៌មានសិក្សាតាមរយៈ Facebook គេហទំព័រផ្លូវការរបស់សាកលវិទ្យាល័យដែលសិស្សចង់ទៅរៀន និងសាកលវិទ្យាល័យផ្សេងៗ ឬទាក់ទងទៅខាងសាកលវិទ្យាល័យផ្ទាល់តាម Email ឬលេខទូរស័ព្ទរបស់សាកលវិទ្យាល័យ ។ សម្រាប់ការដាក់ស្នើពាក្យអាហារូបករណ៍វិទ្យាស្ថានខុងជឺ អាចធ្វើការសាកសួរព័ត៌មានទៅរាជបណ្ឌិតសភាកម្ពុជា ដោយអាហារូបករណ៍ចាប់បើកចន្លោះពីខែមីនា និងមេសា ។
កញ្ញា ហោ រស្មី បានបន្ថែមថា ក្រៅពីអាហារូបករណ៍ធំៗទាំង៤ខាងលើ ក៏មានអាហារូបករណ៍ថ្នាក់ខេត្តក្រុង អាហារូបរកណ៍សាកលវិទ្យាល័យ និងកម្មវិធីអាហារូបករណ៍ផ្សេងៗទៀត ។ ជាមួយគ្នានេះ បេក្ខជនដែលអាចស្នើពាក្យអាហារូបករណ៍ទាំងនេះបាន ត្រូវមានព្រឹត្តិបត្រពិន្ទុនៅវិទ្យាល័យល្អ ឬមាន GPAខ្ពស់នៅសាកលវិទ្យាល័យ, កំណត់ត្រាព្រហ្មទណ្ឌ(មិនធ្លាប់មានទោស), និងលក្ខខណ្ឌសាម៉ីខ្លួនត្រូវសមស្របជាមួយជំនាញឯកទេសដែលចង់ស្នើ។
អនុប្រធានសមាគមនិស្សិតកម្ពុជានៅសាធារណរដ្ឋប្រជាមានិតចិន រូបនេះបន្ថែមថា សិស្សនិស្សិតត្រូវត្រៀមឯកសារចាំបាច់ដូចជា លិខិតថ្កោលទោសជាភាសាអង់គ្លេស និងភាសាខ្មែរ(លិខិតថ្កោលទោសត្រូវការធ្វើឡើងក្នុងរយៈពេលយូរ និងធ្វើឡើងនៅក្រសួងយុវត្តិធម៌), លិខិតឆ្លងដែន, សញ្ញាបត្រមធ្យមសិក្សាទុតិយភូមិសម្រាប់ថ្នាក់បរិញ្ញាបត្រ, សញ្ញាបត្រថ្នាក់បរិញ្ញាបត្រសម្រាប់ថ្នាក់បរិញ្ញាបត្រជាន់ខ្ពស់ និងសញ្ញាបត្របរិញ្ញាបត្រជាន់ខ្ពស់សម្រាប់ថ្នាក់បណ្ឌិត ។ វិញ្ញាបនបត្របញ្ជាក់កម្រិតភាសាចិន HSK និងវិញ្ញាបនបត្រកម្រិតភាសាអង់គ្លេស IELTS និង TOEFL, លិខិតអនុសាសន៍ពីសាស្ត្រាចារ្យ, លិខិតពិនិត្យសុខភាព, តែងសេចក្ដីផែនការសិក្សា, គម្រោងក្រោយបញ្ចប់ការសិក្សា និងទម្រង់ពាក្យសុំអាហារូបករណ៍ ៕
