គ្រប់គ្នាបានដឹងហើយថា ការអានជួយ​បង្កើនចំណេះដឹងទូទៅ ជំរុញភាពជោគជ័យទាំងជីវិតផ្ទាល់ខ្លួន និងអាជីពវិជ្ជាជីវៈ ជួយពង្រឹង​សុខភាពផ្លូវចិត្តជាដើម, ប៉ុន្តែដំណើរនៃការវិវឌ្ឍក្នុងសង្គមដ៏មមាញឹកនេះ ការឆ្លៀតពេលអាន ឬការចំណាយពេលអានដោយមិនខ្វាយខ្វល់ពីមជ្ឈដ្ឋានខាងក្រៅ ហាក់មិនងាយស្រួលដូចកាលពីមុននោះទេ ដោយ​ចាំបាច់ត្រូវការវិធីសាស្រ្តក្នុង​ការ​ជំរុញការអាននេះ។

តាមរយៈ គេហទំព័រ Rest Less បានបង្ហាញគន្លឹះមួយចំនួន ក្នុងការជំរុញឱ្យស្មារតីងាកមកជក់ចិត្តនឹងការអានវិញ មានដូចជា អានសៀវភៅចម្រុះមិនថា ការនិពន្ធបែបពិតឬមិនពិត, ជ្រើសរើសសៀវភៅដែលមានឈ្មោះអ្នកនិពន្ធថ្មីៗដែលមិនធ្លាប់អានពីមុនៗ, ស្តាប់សៀវភៅសម្លេង, បង្កើតបរិយាកាសដែលជំរុញការមិនថាអាននៅផ្ទះក្ដី នៅសាលាក្ដី, កំណត់គោលដៅងាយៗតូចៗ, អានតិចៗតែរាល់ថ្ងៃ, ចូលរួមអានជាមួយគេងឯងនៅខាងក្រៅផ្ទះ, តាមដានដំណើរវិវឌ្ឍន៍នៃការអានរបស់ខ្លួន, ចូលរួមក្រុមដែលដាក់វេនគ្នាអាន ឬចែករំលែកអំពីសៀវភៅ, ចូលជាសមាជិកក្លឹបអ្នកអាននៅតាមបណ្ណាល័យ, ឧស្សាហ៍ចេញចូលបណ្ណាល័យដែលនៅជិតខ្លួន ឬក្នុងតំបន់ដែលខ្លួនរស់នៅ, មុននឹងបញ្ជាទិញសៀវភៅម្តងគួរអានឱ្យបានច្រើនទំព័រសិន, កុំមានអារម្មណ៍រអៀសខ្លួននៅពេលដែលចង់បោះបង់សៀវភៅដែលមិនមែនជាចំណូលចូលចិត្ត ហើយវិធីមួយទៀតគឺ ត្រូវយកសៀវភៅទៅតាមខ្លួនជានិច្ច។

នៅក្នុងបរិបទដែលពោរពេញទៅដោយការរំខានពីមជ្ឈដ្ឋានខាងក្រៅ មិនថា បណ្តាញសង្គម ឬបរិយាកាសជុំវិញខ្លួននោះទេ ត្រូវការឱ្យអ្នកអានចាំបាច់ត្រូវប្រើវិធីសាស្រ្តក្នុងការទាញស្មារតីត្រឡប់មកវិញ ដោយការកំណត់ពេលនិងអាទិភាព ហើយរសរសេរជាតារាង ដើម្បីរំលឹកនិងបង្កភាពងាយស្រួលក្នុងការជ្រើសរើសប្រភេទសៀវភៅដែលត្រូវអាន ហើយបន្តប្តេជ្ញាចិត្តក្នុងការអនុវត្តទើបអាចជំរុញឱ្យអានសៀវភៅកាន់តែច្រើនបន្តទៅមុខ។

ត្បិតថាវិធីសាស្រ្តខាងលើជំរុញផលិតភាពទៅកាន់អ្នកអានក៏ពិតមែន ប៉ុន្តែចំណុចខ្លះ អាចនឹងមិនដំណើរការចំពោះលោកអ្នកទាំងអស់នោះទេ! ព្រោះអ្នកអានខ្លះឆាប់ចាប់បានដោយការស្តាប់ជាសៀវភៅសម្លេង រីឯអ្នកអានខ្លះទៀត ឆាប់ចាប់ខ្លឹមសារនៅពេលអានជាប្រភេទក្រដាសសៀវភៅ ហេតុដូចនេះ ​សូមជ្រើសតែវីធីណាដែលផ្តល់ភាពងាយស្រួល និងឆ្លើយតបទៅនឹងស្ថានភាពជាក់ស្ដែងរបស់ខ្លួន ឬក៏ប្រើប្រាស់ទម្លាប់ផ្សេងៗ។ ប៉ុន្តែអ្វីដែលសំខាន់ បន្តអានឱ្យបានទៀតទាត់ ហើយត្រូវត្រឡប់មកអនុវត្តន៍បន្ត ទោះបីជាថ្ងៃខ្លះ ខកខានក៏ដោយ៕