ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បន្ទាប់ពីឆ្លងកាត់ការប្រកួតប្រជែងដែលមានការវាយតម្លៃយ៉ាងម៉ត់ចត់ និងឈានដល់ការប្រកួតប្រជែងវគ្គផ្តាច់ព្រ័ត្រជាមួយបេក្ខជនមកពី១២ប្រទេសផ្សេងគ្នាជុំវិញពិភពលោក កញ្ញា ហ៊ុត ម៉ីឡាង និស្សិតឆ្នាំទី២ នៃសាកលវិទ្យាល័យអាមេរិកាំងភ្នំពេញ ត្រូវបានជ្រើសរើសជាទូតសុឆន្ទៈពិភពលោក (Global Ambassador) នៃតំបន់អាស៊ីប៉ាស៊ីហ្វិក ក្នុងកម្មវិធី Seeds for the Future 2025។ តាមរយៈតួនាទីជាទូតសុឆន្ទៈពិភពលោក កញ្ញា ហ៊ុត ម៉ីឡាង បានប្តេជ្ញាថា នឹងនាំយកវប្បធម៌-អរិយធម៌ខ្មែរ និងសមត្ថភាពយុវជនបង្ហាញទៅកាន់វេទិកាអន្តរជាតិដែលនាងនឹងចូលរួម។
កញ្ញា ហ៊ុត ម៉ីឡាង និយាយថា ក្នុងនាមជាយុវជនកម្ពុជា និងជាស្រ្តីមួយរូប នាងពិតជារំភើប និងមោទនភាពជាក្រៃលែងក្នុងការតំណាងឱ្យប្រទេសកម្ពុជា ជាទូតសុឆន្ទៈពិភពលោក នៃតំបន់អាស៊ីប៉ាស៊ីហ្វិក ដោយថា នេះមិនមែនត្រឹមតែជាសមិទ្ធផលរបស់នាងតែម្នាក់ឯង តែជាការខិតខំជួយជ្រោមជ្រែងពីសំណាក់ក្រុមគ្រួសារ, មិត្តភក្តិ, សកលវិទ្យាល័យ AUPP, ក្រុមហ៊ុន Huawei Cambodia, រួមទាំងការគាំទ្រពីក្រសួងប្រៃសណីយ៍ និងទូរគមនាគមន៍ ជាពិសេស គឺការជួយជំរុញវិស័យអប់រំ និងបដិវត្តឌីជីថលនៅកម្ពុជារបស់រាជរដ្ឋាភិបាលគ្រប់ជាន់ថ្នាក់។
“ខ្ញុំពិតជារីករាយដែលបានឃើញប្រជាពលរដ្ឋកម្ពុជារួមមានទាំង សិស្សនិស្សិត មន្រ្តីរាជការ និងប្រជាជន មកពីគ្រប់ទិសទីរួមកម្លាំងគ្នាបោះឆ្នោតជូននាងខ្ញុំ និងយកជ័យជំនះជូនកម្ពុជា”
អតីតសិស្សនិទ្ទេស A ឆ្នាំ២០២២ រូបនេះ លើកឡើងដែរថា ក្នុងតួនាទីជា ទូតសុឆន្ទៈពិភពលោកនេះ នាងមានបេសកកម្មជាតំណាងយុវជនតំបន់អាស៊ីប៉ាស៊ីហ្វិក ក្នុងការដឹកនាំ និងចូលរួមកិច្ចការសហគមន៍ ចែករំលែកចំណេះដឹងក្នុងព្រឹត្តិការណ៍ ឬវេទិកាអន្តរជាតិ និងជំរុញទំនាក់ទំនងជាមួយតំបន់នានា ដើម្បីបញ្ជ្រាបការធ្វើបរិវត្តកម្មឌីជីថលលើពិភពលោក ជាពិសេសធ្វើជាយុវជនតំណាងឱ្យកម្មវិធីគ្រាប់ពូជដើម្បីអនាគត (Huawei Seeds for the Future) សម្រាប់ឆ្នាំ២០២៥។
និស្សិតឆ្នាំទី២ វ័យ២០ឆ្នាំ រូបនេះ ក៏សង្ឃឹមថា សមិទ្ធផលមួយនេះ នឹងអាចចូលរួមចំណែកលើកទឹកចិត្តយុវជនកម្ពុជា ស្វះស្វែងក្នុងការខិតខំរៀនសូត្រ ដើម្បីពង្រឹងសមត្ថភាពក្នុងការប្រកួតប្រជែងនានា តំណាងឱ្យកម្ពុជា និងចូលរួមចំណែកក្នុងការអភិវឌ្ឍប្រទេសជាតិយើង ឆ្ពោះទៅមុខ និងបង្ហាញប្រាប់ពិភពលោកថា “ខ្មែរធ្វើបាន”។
គួរជម្រាបជូនថា កញ្ញា ហ៊ុត ម៉ីឡាង ធ្លាប់បានចូលរួមកិច្ចការសង្គម កម្មវិធីបណ្ដុះបណ្ដាល និងកម្មវិធីប្រកួតប្រជែងជាច្រើនតាំងពីកម្រិតវិទ្យាល័យមកទល់នឹងបច្ចុប្បន្ន ដោយនាងទទួលបានមេដាយជាច្រើន រួមមាន មេដាយមាស កម្រិតមធ្យមសិក្សាទុតិយភូមិ ក្នុងការប្រកួតប្រជែងផ្នែកផែនដីវិទ្យាឆ្នាំ២០២១ រៀបចំដោយ ក្លឹបធរណីវិទ្យាកម្ពុជា និងជ័យលាភីលេខ១ ក្នុងការប្រកួត Faulkner Challenge Championship ឆ្នាំ២០២៤ រៀបចំដោយសាកលវិទ្យាល័យរដ្ឋហ្វតហេយស៍ (Fort Hays State University) របស់សហរដ្ឋអាម៉េរិក ជាដើម៕
