ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អាការៈថប់បារម្ភ ធ្វើឱ្យមនុស្សឆាប់ភ័យខ្លាច តានតឹង ហើយជារឿយៗតែងកើតក្ដីទោមនស្ស។ ភាពតានតឹងបានកើនឡើងចំពោះមនុស្សគ្រប់គ្នា គ្រាន់តែតិច ឬច្រើនប៉ុណ្ណោះ ហើយភាពខុសគ្នាទៀតសោធ អាស្រ័យលើបទពិសោធន៍ នៃបុគ្គលម្នាក់ៗ ដែលកត្តាទាំងនេះក៏ដោយសារតែរបៀបរស់នៅមានលក្ខណៈខុសគ្នា ។ យ៉ាងណាមិញ កាលដែលបន្តឱ្យមានអាការៈថប់បារម្ភយូរៗទៅ បណ្តាលឱ្យប៉ះពាល់ដល់បញ្ហាផ្លូវចិត្ត សុខភាពរាងកាយទ្រុឌទ្រោម ប៉ះពាល់ដល់ទំនាក់ទំនង ហើយផលិតភាពការងារធ្លាក់ចុះ។
តាមរយៈគេហទំព័រ ASKME បានឱ្យដឹងថា ការគ្រប់គ្រង ឬកាត់បន្ថយអាការៈទាំងនេះបាន ត្រូវចាប់ផ្តើមពីការតាំងចិត្តដោះស្រាយជាមួយនឹងខ្លួនឯង ពង្រឹងស្មារតីឱ្យនឹងន ធ្វើលំហាត់ប្រាណទៀងទាត់ រក្សារបៀបរស់នៅឱ្យមានផាសុកភាព ដឹងពីវិធីដកដង្ហើម គ្រប់គ្រងពេល រួមទាំងស្វែងរកជំនួយនៅពេលមានបញ្ហាណាមួយកើតមាន។ ខាងក្រោមមាន ប្រាំបួនវិធី ក្នុងការដោះស្រាយអាការៈថប់បារម្ភ។
១. សង្កេតអាកប្បកិរិយាផ្ទាល់ខ្លួន ៖ ស្វែងយល់បន្ថែម អំពីគន្លឹះនៃការកំណត់សម្គាល់ថា អ្វីទៅជាសកម្មភាពដែលបង្កឱ្យមានផលអវិជ្ជមានព្យាយាមរកវិធីជំនះនឹងការគិតអវិជ្ជមាន ហើយបន្តអភិវឌ្ឍន៍បន្ថែមជានិច្ចអំពីរបៀបរស់នៅដែលមានផាសុកភាព និងទម្លាប់គិតវិជ្ជមានឡើងវិញ ព្រោះការបណ្តោយឱ្យផ្នត់គំនិតលង់ជាមួយការគិតមិនល្អ គឺជាដើមហេតុនាំឱ្យមានបញ្ហាផ្លូវចិត្ត ឬក៏ភាពតានតឹង។
២. សតិរលឹកដឹង និងសមាធិ ៖ ការអនុវត្តន៍ឱ្យចិត្តមានស្មារតីនឹងធឹង ចិត្តស្ងប់ រួមទាំងការធ្វើសមាធិទៀតទាត់ មិនត្រឹមតែជួយអភិវឌ្ឍចិត្តឱ្យត្រជាក់ ឬកាត់បន្ថយភាពតានតឹងនោះទេ ប៉ុន្តែជាកាតាលីករជំរុញឱ្យអារម្មណ៍ប្រសើរ ថែមទាំងជួយឱ្យបុគ្គលនីមួយៗ មានសមត្ថភាពក្នុងរក្សាចិត្តឱ្យស្ថិតក្នុងបច្ចុប្បន្នភាព។
៣. ធ្វើលំហាត់ប្រាណ ឬក៏ចលនារាងកាយ ៖ ផ្តល់ឱកាសឱ្យរាងកាយ មានចលនាបានទៀងទាត់ប្រចាំថ្ងៃ អាចកាត់បន្ថយកម្រិតនៃភាពតានតឹងដែលកំពុងតែជួបប្រទះ តាមរយៈការបញ្ចេញអរម៉ូនសុភមង្គល រួមទាំងពង្រឹងសុខភាពរាងកាយដោយផ្ទាល់។
៤. ជ្រើសរើសរបៀបរស់នៅប្រកបដោយផាសុកភាព ៖ ការទទួលទានអាហារមានតុល្យភាព គេងបានគ្រប់គ្រាន់ កាត់បន្ថយភេសជ្ជៈមានជាតិកាហ្វេអ៊ីន ឬមានជាតិអាលកុល និងពង្រឹងរបបអាហារឱ្យបានត្រឹមត្រូវទៅតាមប្រភេទសុខភាព នៃមនុស្សម្នាក់ៗ។
៥. របៀបដកដង្ហើមដើម្បីបន្ធូរអារម្មណ៍ ៖ ដើម្បីកាត់បន្ថយភាពតានតឹង ឬដោះស្រាយនឹងអាការៈថប់បារម្ភ ការដឹងពីវិធីដកដង្ហើមសម្រួលអារម្មណ៍ សុទ្ធសឹងជាចំណែកសំខាន់ក្នុងការដោះស្រាយបញ្ហា។ ដំបូងៗ ព្យាយាមដកដង្ហើមវែងៗមួយៗក្នុងរយៈពេលសមស្របណាមួយដែលអាចធ្វើបាន ជាទូទៅអនុវត្តន៍ការដកដង្ហើមបែបនេះ ឱ្យបាន៤ទៅ៨ដង។
៦. ឱសថ ៖ ការប្រើប្រាស់ថ្នាំ ដើម្បីកាត់បន្ថយ ឬបំបាត់អាការៈថប់បារម្ភ តាមរយៈពេទ្យជំនាញ ដែលមានឯកទេសត្រឹមត្រូវ គឺជាវិធីមួយមានប្រសិទ្ធភាពក្នុងការទប់ទល់នឹងអាការៈតានតឹង។
៧. ស្វែងរកការគាំទ្រពីមជ្ឈដ្ឋានខាងក្រៅ ៖ ការនិយាយជាមួយមិត្តជិតស្និទ្ធ សមាជិកគ្រួសារ ឬក៏ចូលរួមក្នុងក្រុមមនុស្សណាមួយដើម្បីពង្រឹងស្ថានភាពផ្លូវចិត្ត ក៏ដូចជាកាត់បន្ថយការផ្តាច់ខ្លួនឱ្យនៅដាច់ដោយឡែកបានមួយផ្នែកដែរ។
៨. គ្រប់គ្រងពេលវេលា ៖ ជ្រើសយកវិធីសាស្រ្ត គ្រប់គ្រងពេលវេលា អាចកាត់បន្ថយស្រ្តេស អាការៈថប់បារម្ភ ឬការពារភាពលើសចំណុះពីស្ថានភាពណាមួយ។
៩. ស្នើឱ្យអ្នកជំនាញជួយ ៖ ការជជែកជាមួយអ្នកជំនាញផ្លូវចិត្ត អ្នកប្រឹក្សាយោបល់ផ្នែកសុខភាពផ្លូវចិត្ត ឬក៏អ្នកចិត្តសាស្រ្ត ជាគន្លឹះក្នុងការទទួលបាននូវវីធីល្អៗ ក្នុងការអនុវត្តត្រឹមត្រូវ និងការគាំទ្រមានប្រសិទ្ធភាព៕
