បញ្ហាសុខភាពផ្លូវចិត្តជាកត្តាជាក់ស្តែងមួយដែលកើតមានឡើងចំពោះកុមារ ឬយុវជនអាចតិច ឬច្រើន តែពេលខ្លះយុវជនគិតថាវាជាបញ្ហាបុគ្គល ហើយត្រូវរ៉ាប់រងម្នាក់ឯង ដែលជាហេតុមិនសូវមានការបង្ហាញចេញនៅដំណាក់កាលបឋមទេ តែគេអាចឃើញនៅដំណាក់កាលធ្ងន់ធ្ងរ ឬក៏ឃើញតាមរយៈសុខភាពផ្លូវកាយ។ តាមរយៈការ​សិក្សា​គេ​រកឃើញថា ការជជែកអំពីកត្តាប្រឈម និងដំណោះស្រាយ​ បានរួមចំណែកភាពជាវិជ្ជមានទៅកាន់អាណាព្យាបាល និងកូនៗ។

តាមរយៈ Teenlife បានបង្ហាញអំពីបច្ចេកទេសសួរសំណួរ, ការកសាងទំនុកចិត្តជាគោល និងភាពសំខាន់នៃការចាប់ផ្តើមតូចៗ និងសាមញ្ញ ដោយមានរៀបរាប់លម្អិតបន្ថែមនៅខាងក្រោម ៖

ការប្រើប្រាស់សំណួរ ៖ ការសួរក៏អាស្រ័យលើស្ថានភាពជាក់ស្តែង ប៉ុន្តែការត្រៀមទុកមុន និងសួរតាមបែបបច្ចេកទេសកាន់តែបង្កបាននូវប្រសិទ្ធភាពក្នុងការជួយឱ្យកុមារ ឬយុវជនហ៊ាននិយាយដោយបើកចំហ។​អាណាព្យាបាល គួរបង្ហាញពីការចង់ដឹង ចង់ឮ រួមទាំងការបារម្ភពីកូនៗ តាមរយៈសំណួរដូចជា តើមួយរយៈចុងក្រោយនេះគិតអ្វីខ្លះ? អ្វីដែលបណ្តាលឱ្យកើតមាននូវភាពស្មុគស្មាញ? ប្រសិនបើសុខៗ កូនៗស្ងាត់ក៏គួរសួរបញ្ជាក់ដែរថា តើពួកគេមានបញ្ហាអ្វី? ហើយទំនាក់ទំនងជាមួយមិត្តនៅសាលាយ៉ាងម៉េចដែរ? មានអារម្មណ៍ស្រេ្តស ឬក៏បារម្ភអំពីអ្វីខ្លះ? មានអ្វីដែលចង់ផ្លាស់ប្តូរក្នុងការរស់នៅដែរឬទេ? តើប៉ាម៉ាក់អាចជួយអ្វីបានខ្លះ? ឬត្រូវការ ការគាំទ្របែបណា? សូមបញ្ជាក់ថា ការ​សាកសួរ គួរធ្វើទៅតាមភាសាធម្មតាៗ ឬក៏ភាសានិយាយទៅតាមទម្លាប់ និងតាមតំបន់ដែលរស់នៅ ដើម្បីបង្កើតបានភាពងាយស្រួលនិងស្និទ្ធស្នាល។

កសាងទំនុកចិត្ត ៖ កុមារ ឬក៏មនុស្សវ័យទំនង់ មិនមែនត្រូវការតែភាពស្និទ្ធស្នាល និងភាពប្រសព្វនៃការសួរសំណួរនោះទេ ប៉ុន្តែពួកគេក៏ត្រូវការប្រាកដចិត្តដែរថា អ្វីដែលបាននិយាយនឹងមិនលេចឮទៅកាន់មនុស្សដែលពួកគេមិនបាននិយាយប្រាប់។ ដូចនេះ អាណាព្យាបាល គួរបង្ហាញឱ្យពួកគាត់បានដឹងពីការរក្សាការសម្ងាត់ និងគោរពទៅតាមការស្នើសុំ រួមទាំងមិនវាយតម្លៃនៅពេលស្តាប់សាច់រឿងរបស់កុមារ ឬមនុស្សវ័យជំទង់ ជាពិសេសជៀសវាងការផ្តល់យោបល់ភ្លាមៗកំឡុងពេលពួកគាត់និយាយ។ ជាមួយគ្នានោះ ព្យាយាមចងចាំសាច់រឿងដែលពួកគេបានប្រាប់ មិនថាជាសាច់រឿងវិជ្ជមានក្ដី ឬអវិជ្ជមានក្ដី ដែលជាវិធីមួយក្នុងការផ្សារភ្ជាប់សាច់រឿងចាស់ៗ និងបង្កើនកិច្ចសន្ទនា នៅពេលបន្ទាប់។

ជ្រើសកន្លែង ឬបរិយាកាស ៖ ពិនិត្យមើលដែរ ប្រសិនបើកូនៗ ឬកុមារកំពុងស្រេ្តស កុំបង្ខំ ឬប្រញាប់ប្រញាល់ក្នុងការសួរដេញដោល ឬបង្កការរំខានដល់ពួកគេ ព្រោះការបង្ហាញរបស់កុមារត្រូវការបរិយាកាសផាសុកភាព ស្ងប់ និងពេលវេលាក្នុងការចាប់ផ្តើម។ បើអាចស្វែងរកកន្លែងណាដែលមានបរិយាកាសត្រជាក់ ស្ងាត់ មានឯកជនភាព ដែលធ្វើយ៉ាងណាឱ្យភាគីទាំងពីរ អាចផ្តោតក្នុងការសន្ទនាគ្នាបាន។

ចាប់ផ្តើមដោយតូចៗនិងសាមញ្ញ ៖ អាណាព្យាបាលក្ដី អ្នកប្រឹក្សាក្ដី ជារួមអ្នកមានតួនាទីគាំទ្រសុខភាពផ្លូវចិត្តកុមារនិងយុវជន ពុំគួរចាប់ផ្តើមដោយតក់ក្រហល់ពេក ឬសួរឱ្យចំៗតាមការណែនាំពីបច្ចេកទេសពេកនោះទេ ហើយក៏មិនចាំបាច់ សួរម្តងសរុបគ្រប់សំណួរនោះដែរ អាចសួរបន្តិចម្តងៗ ឬក៏សួរអំពីសុខទុក្ខប្រចាំថ្ងៃ រួចសឹមជ្រៀតចូលនូវសំណួរពាក់ព័ន្ធនឹងសុខភាពផ្លូវចិត្ត៕