ការប្រើប្រាស់ប្រយោគវិជ្ជមានក្នុងការរស់នៅប្រចាំថ្ងៃ ជាចំណែកជួយបង្កើនថាមពលវិជ្ជមាន ទប់ទល់ទៅនឹងកត្តាប្រឈមជាច្រើន ជាពិសេសប្រើដើម្បីលើកទឹកចិត្តនៅពេលបំពេញបេសកកម្មការងារ ការរក្សាទំនាក់ទំនង ការអភិវឌ្ឍផ្នត់គំនិត ក៏ដូចជាប្រើដើម្បីរឭកខ្លួនឯងអំពីគោលដៅដែលនឹងត្រូវចាប់យកនៅពេលអនាគត។ តាមរយៈគេហទំព័រ Heragenda បានបង្ហាញប្រយោគ៤ប្រភេទ ក្នុងការប្រើប្រាស់ប្រចាំថ្ងៃដើម្បីបង្កើនថាមពលផ្លូវចិត្តបន្ថែម។

១. ខ្ញុំនឹងឆ្លងផុតឧបសគ្គទាំងនេះ ៖ នៅក្នុងស្ថានភាពមួយដែលមានភាពធុញថប់ខ្លាំង គួរតែចងចាំថា មិនយូរមិនឆាប់ទេទុក្ខទាំងឡាយក្នុងជីវិតនឹងរសាយ បន្តិចម្តងៗ ព្រោះបញ្ហាមួយចំនួនចំបាច់ត្រូវការពេលវេលាក្នុងការបន្សាប។ ទន្ទឹមគ្នានោះ ចូរក្រឡេកទៅមើលអតីតកាលបន្តិច នោះអ្នកនឹងបានដឹងថា អ្នកបានឆ្លងកាត់ស្ថានភាពលំបាកៗជាច្រើន។ ដូច្នេះបង្ហាញឱ្យឃើញថា ស្ថានភាពដែលកំពុងប្រឈមនាពេលបច្ចុប្បន្ន នឹងអាចដោះស្រាយបាន។

២. ផ្តោតលើដំណាះស្រាយនិងអ្វីដែលអាចធ្វើបាន ៖ ប្រាប់ខ្លួនឯងជាប្រចាំឱ្យ គិតទៅលើអ្វីដែលស្ថិតក្នុងដែនកំណត់ដែលខ្លួនអាចដោះស្រាយបាន​ ឬបញ្ហាដែលអាចគ្រប់គ្រងបាន រួមទាំងព្យាយាមឱ្យអស់លទ្ធភាពក្នុងការទុកឱកាសឱ្យខ្លួនបានសម្រាក។ ការទទួលយកបញ្ហាដែលកំពុងកើតមាន អាចថា មិនមែនជារឿងងាយស្រួលប៉ុន្មាននោះទេ។ យ៉ាងណា ការប្រាប់ខ្លួនឯងជារឿយៗ អំពីប្រភេទបញ្ហា ដែលអាចដោះស្រាយបាន ជំរុញឱ្យកាន់តែចាប់អារម្មណ៍ ទៅលើការព្យាយាមផ្លាស់ប្តូរខ្លួនឯង ក៏ដូចជាការទប់ទល់នឹងបញ្ហាដែលកើតមាន។

៣. ស្វាគមន៍រាល់ជំនួយដែលគួរតែទទួល ៖  ក្នុងករណីខ្លះ ការមិនព្រមទទួលជំនួសពីមជ្ឈដ្ឋានខាងក្រៅ ក៏ជាចំណែកនៃការបង្រួមឱកាសចំពោះខ្លួនឯង ត្បិតថា អ្នកអាចដោះស្រាយ ឬក៏ទប់ទល់ រាល់បញ្ហាដែលកើតមានបានក៏ដោយ។  តែយ៉ាងណា គួរផ្តល់ពេលទៅខ្លួនឯងក្នុងការទទួលយកជំនួយ មិនថាតាមរយៈអាជីពវិជ្ជាជីវៈ ទំនាក់ទំនង ឬក៏អ្នកជំនាញផ្នែកសុខភាពផ្លូវចិត្តនោះទេ។ ចំពោះអត្ថប្រយោជន៍ពីការហ៊ានទទួលយកជំនួយ អាចជួយពន្លឿនភាពរីកចម្រើន រួមទាំងផ្តល់ភាពរីករាយទៅកាន់អ្នកដទៃតាមរយៈការទុកចន្លោះឱ្យពួកគាត់មានឱកាសក្នុងការរួមចំណែកទៅកាន់ភាពលូតលាស់របស់អ្នក។

៤. ជ្រើសវិធីសាស្រ្តវិជ្ជមានដើម្បីដោះស្រាយបញ្ហា ៖ ការដោះស្រាយបញ្ហាដោយវិធីវិជ្ជមាន ត្រូវការរបៀបរបបច្បាស់ការ ការតាំងចិត្តមោះមុត ទទួលបានគំរូល្អពីប្រព័ន្ធផ្សព្វផ្សាយ ការហ្វឹកហាត់ចិត្ត និងកត្តាជាច្រើនទៀត។ យ៉ាងណាមិញមានគន្លឹះសាមញ្ញៗ មួយចំនួនក្នុងការពង្រឹងខ្លួនឯងឱ្យជ្រើសយកវិធីសាស្រ្តវិជ្ជមានទៅដោះស្រាយបញ្ហានីមួយៗ តាមរយៈការសង្កេតពីប្រភេទដំណោះស្រាយដែលបានធ្វើកន្លងមកថាតើមានប្រសិទ្ធភាពកម្រិតណា? ការបង្ហាញអារម្មណ៍ទៅក្នុងក្រដាសនិងប៊ិក ទោះបីស្ថិតនៅក្នុងស្ថានភាពអារម្មណ៍មិនចង់ធ្វើអ្វីសោះក៏ដោយ សូមដើរក្នុងរយៈពេល ខ្លីៗ ឬការធ្វើសកម្មភាពផ្លូវកាយឱ្យបានច្រើន៕