ជំនាន់ Z (Gen Z) ជាជំនាន់មនុស្សដែលកើតនៅក្នុងសម័យកាល ដែលបច្ចេកវិទ្យា និងប្រព័ន្ធផ្សព្វផ្សាយសង្គមផ្លាស់ប្ដូរយ៉ាងឆាប់រហ័ស ហើយបញ្ហាទាំងនេះ នាំឱ្យគេប្រឈមនឹងសម្ពាធ និងភាពស្មុគស្មាញជាច្រើន។ ការកើត និងរស់នៅក្នុងលក្ខខណ្ឌជីវិត នៃយុគ្គសម័យឌីជីថល បានធ្វើឱ្យមនុស្សជំនាន់ Z ទទួលសម្ពាធពីគ្រប់ទិដ្ឋភាពនៃជីវិត ក្នុងនោះបញ្ហាផ្លូវចិត្តជាវិបត្តិមួយដែលត្រូវយកចិត្តទុកដាក់។

យោងតាមការសិក្សាថ្មីៗនេះ ដោយ Ogilvy បានរកឃើញថា ៧០ភាគរយ នៃមនុស្សជំនាន់ Z (Gen Z) ជឿថា សុខភាពផ្លូវចិត្តរបស់ពួកគេ ទាមទារឱ្យមានការយកចិត្តទុកដាក់ និងពង្រឹងបន្ថែម ។ លើសពីនេះ សមាគមន៍អ្នកចិត្តសាស្ត្រសហរដ្ឋអាមេរិក បានគូសបញ្ជាក់ថា មនុស្សជំនាន់ Z កំពុងប្រឈមនឹងកង្វល់នៃបញ្ហាសុខភាពផ្លូវចិត្ត ដោយសារមនុស្សជំនាន់នេះ បានជួបប្រទះនឹងបញ្ហាច្រើនជាងជំនាន់ផ្សេងៗ រាប់ចាប់តាំងពីបញ្ហាវីរុសរាតត្បាតកូវីដ-១៩ រហូតដល់វិបត្តិសង្គ្រាមជុំវិញពិភពលោក។ ទន្ទឹមនឹងនេះ លោកស្រី Diksha Singh អ្នកជំនាញប្រឹក្សាចិត្តសាស្រ្ត បានបង្ហាញពីបញ្ហាទូទៅ ចំនួន ៤ ដែលនាំឱ្យសុខភាពផ្លូវចិត្តមនុស្សជំនាន់ Z ចុះខ្សោយ ព្រមទាំងលើកឡើងពីដំណោះស្រាយសម្រាប់បញ្ហានីមួយៗ។

១. ការថប់បារម្ភ និងបាក់ទឹកចិត្ត ៖ មនុស្សជំនាន់ Z មានភាគរយខ្ពស់ដែលអាចធ្លាក់ទៅក្នុងការថប់បារម្ភ និងបាក់ទឹកចិត្ត ដោយសារសម្ពាធក្នុងការសិក្សា ការប្រៀបធៀបជីវិតគ្នាតាមប្រព័ន្ធផ្សព្វផ្សាយសង្គម ភាពមិនច្បាស់លាស់ នៃស្ថានភាពសេដ្ឋកិច្ចជាតិ និងពិភពលោក រួមទាំងសម្ពាធជីវិតជាច្រើនទៀត។ ស្របនឹងបញ្ហានេះ អ្នកជំនាញខាងលើ បានបង្ហាញដំណោះស្រាយចំនួនបីចំណុចសម្រាប់ការជួយមនុស្សជំនាន់ Z ឱ្យមានស្ថានភាពផ្លូវចិត្តល្អប្រសើរ។

• អ្នកជិតស្និទ្ធគួរលើទឹកចិត្តឱ្យពួកគេនិយាយអារម្មណ៍ដែលលាក់ទុកក្នុងចិត្ត បន្ទាប់មកស្ដាប់ការលើកឡើងរបស់ពួកគេ ដោយយកចិត្តទុកដាក់ ដោយមិនធ្វើឱ្យគេមានអារម្មណ៍ថាគ្មានសុវត្ថិភាព ឬត្រូវបានវាយតម្លៃ ឬវិនិច្ឆ័យ។
• យកចិត្តទុកដាក់ថែសុខភាព តាមរយៈការហាត់ប្រាណ សម្មាធិ ការសរសេរកំណត់ហេតុ ឬក៏ធ្វើសកម្មភាពណាមួយ ដែលជួយគ្រប់គ្រងភាពថប់បារម្ភ និងការបាក់ទឹកចិត្ត។
• ស្វែងរកជំនួយពីអ្នកជំនាញ ដែលអាចព្យាបាល ប្រឹក្សា និងផ្ដល់ថ្នាំក្នុងករណីចាំបាច់។

២. ឥទ្ធិពលប្រព័ន្ធផ្សព្វផ្សាយសង្គម ៖ មនុស្សជំនាន់ Z បានកើត និងធំធាត់ឡើងក្នុងបរិយាកាសដែលរុំព័ទ្ធដោយប្រព័ន្ធផ្សព្វផ្សាយសង្គម ដែលធ្វើឱ្យមនុស្សជំនាន់នេះ ងាយរងការគម្រាមកំហែងតាមប្រព័ន្ធអ៊ីនធឺណិត ការប្រៀបធៀបជីវិតគ្នាតាមបណ្ដាញសង្គម និងការបាត់បង់ភាពជឿជាក់លើខ្លួន​ឯង។ ដើម្បីដោះស្រាយបញ្ហាទាំងនេះ អ្នកជំនាញបានបង្ហាញគន្លឹះចំនួនបីចំណុច។

• កាត់បន្ថយការលេងបណ្ដាញសង្គម និងចំណាយពេលធ្វើកិច្ចការ ដែលជួយឱ្យសុខភាពផ្លូវចិត្តប្រសើរឡើង។
• លេងបណ្ដាញសង្គមដោយផ្ដោតលើជ្រុងវិជ្ជមានដូចជា តាមដានការផ្សព្វផ្សាយអំពីវិធីធ្វើឱ្យសុខភាពផ្លូវកាយ និងផ្លូវចិត្តប្រសើរឡើង និងការអភិវឌ្ឍផ្នត់គំនិតជាដើម។
• បង្កើនការរៀន និងគិតបែបវិភាគ (Critical thinking) ដើម្បីមានសមត្ថភាពគ្រប់គ្រងការប្រើប្រាស់បណ្ដាញសង្គម។

៣. ភាពឯកោ និងការផ្ដាច់ខ្លួននៅម្នាក់ឯង ៖ បើទោះជាពិភពលោកបច្ចុប្បន្នងាយស្រួលបង្កើតទំនាក់ទំនងជាងមុន ប៉ុន្តែមនុស្សជំនាន់ Z ជារឿយៗគឺមានអារម្មណ៍ឯកា និងចង់ផ្ដាច់ខ្លួនពីសង្គម ហើយនៅម្នាក់ឯង។ ដូច្នេះ អ្នកជំនាញបានបង្ហាញវិធីសាស្ត្រចំនួន ៣ ដើម្បីគាំទ្រ និងជួយដល់ពួកគេ។

• លើកទឹកចិត្តឱ្យពួកគេចូលរួមក្នុងសង្គម តាមរយៈការចូលរួមកម្មវិធីផ្សេងៗ ឬការធ្វើសកម្មភាពស្ម័គ្រចិត្ត។
• លើកទឹកចិត្តឱ្យពួកគេ ទៅកន្លែងណាមួយ​ដែលគេគិតថា មានមនុស្សដែលមានចំណង់ចំណូលចិត្តស្រដៀង ឬដូចគ្នា ដើម្បីភ្ជាប់ទំនាក់ទំនង ឬធ្វើកិច្ចការអ្វីមួយជាមួយគ្នា។
• ចូលរួមកម្មវិធីមនុស្សធម៌ ឬធ្វើសកម្មភាពណាមួយ ដែលអាចជួយអ្នកដទៃបាន ដើម្បីធ្វើឱ្យខ្លួនឯងដឹងពីតម្លៃរបស់ខ្លួន និងកាត់បន្ថយការចង់ផ្ដាច់ខ្លួនពីសង្គម។

៤. សម្ពាធក្នុងការសិក្សា និងអាជីព ៖ សម្ពាធដ៏ធំបំផុតរបស់មនុស្សជំនាន់ Z គឺត្រូវប្រឹងប្រែងរៀនសូត្រឱ្យបានពូកែ និងមានសមត្ថភាពគ្រប់គ្រាន់អាចប្រកួតប្រជែងក្នុងទីផ្សារការងារ ព្រមទាំងមានអាជីពមួយដែលអាចទទួលបានប្រាក់ចំណូលសមរម្យសម្រាប់ទ្រទ្រង់ជីវភាព។ ដើម្បីគ្រប់គ្រងសម្ពាធទាំង ២នេះ អ្នកជំនាញបានបង្ហាញគន្លឹះសំខាន់ៗចំនួន ៣ចំណុច។

• កំណត់គោលដៅដែលមានលក្ខណៈជាក់ស្ដែង ដែលស្របនឹងសក្តានុពលរបស់ខ្លួនឯង ។ ម្យ៉ាងទៀត អ្នកជិតស្និទ្ធគួររំលឹកពួកគេថា តម្លៃរបស់ពួកគេមិនមែននៅលើភាពជោគជ័យក្នុងការសិក្សា ឬអាជីពនោះទេ។
• រក្សាតុល្យភាពជីវិត និងការងារ ត្បិតថា ការសិក្សា និងការងារសំខាន់សម្រាប់ជីវិត ប៉ុន្តែការថែទាំសុខភាព សកម្មភាពកម្សាន្ត និងការសម្រាកលំហែក៏មានសារៈសំខាន់ដែរ។ ដូច្នេះ ចំណុចទាំងពីរនេះ មិនអាចខ្វះមួយណាបានឡើយ។
• ស្វែងរកការណែនាំ និងតម្រង់ទិសសម្រាប់ការសិក្សា និងអាជីព ដើម្បីកាត់បន្ថយភាពមិនច្បាស់លាស់ ក្នុងការកំណត់គោលដៅជីវិត និងភាពតានតឹងដែលបណ្ដាលមកពីអនាគតដែលស្រពិចស្រពិល៕