ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពង្រឹងផលិតភាពការងារឱ្យដូចពេលមានគ្នានៅការិយាល័យ ចាំបាច់ត្រូវមានវិន័យ កំណត់ម៉ោងធ្វើការ និងចេះបង្កើតបរិយាកាសផ្ទាល់ខ្លួន រួមទាំងសកម្មភាពភាពសំខាន់ៗដទៃបន្ថែមទៀត។ តាមរយៈគេហទំព័រ Yardbarker បានបង្ហាញគន្លឹះប្រាំចំណុចសម្រាប់អ្នកបំពេញភារកិច្ចពីចម្ងាយ ឬអ្នកធ្វើការក្រៅការិយាល័យ។
១. ច្នៃកន្លែងផ្ទាល់ខ្លួនមួយឱ្យដូចការិយាល័យ ៖ បរិវេណកន្លែងស្នាក់អាស្រ័យយ៉ាងណាក៏ដោយមិនថា ធំឬតូចនោះទេ មុនពេលចាប់ផ្តើមធ្វើការ គឺត្រូវរៀបចំកន្លែងអង្គុយឱ្យដូចជាការិយាល័យធ្វើការមួយដ៏សមរម្យ ឬកែច្នៃយ៉ាងណាឱ្យស្របនឹងតម្រូវការការងារផ្ទាល់ខ្លួន។ ធ្វើបែបនេះដើម្បីជាជំនួយជួយសម្រួលដល់ការប្រមូលអារម្មណ៍បំពេញការងារ ផ្តោតលើអ្វីដែលខ្លួនកំពុងតែអនុវត្តន៍ និងបញ្ចៀសកុំឱ្យស្មារតីភ័ន្តច្រឡំថាខ្លួនកំពុងតែនៅផ្ទះ ឬកុំឱ្យភ្លេចកាតព្វកិច្ចសំខាន់ៗ។
២. កំណត់ម៉ោងធ្វើការ ៖ ប្រសិនបើអ្នកយកកាងារទៅធ្វើនៅខាងក្រៅផ្ទះ ដូចជានៅហាងកាហ្វេ ឬទីតាំងណាមួយ អ្វីដែលត្រូវធ្វើដំបូងនោះគឺ កំណត់ម៉ោងធ្វើការឱ្យបានជាក់លាក់ ឬក៏កំណត់ដូចម៉ោងការងារនៅការិយាល័យទូទៅបានធ្វើ រួមទាំងសរសេរ ឬធ្វើតារាងកាលវិភាគឱ្យច្បាស់លាស់ រួមទាំងបែងចែកម៉ោងធ្វើការ។ មួយវិញទៀត កាត់បន្ថយការឆ្លើយឆ្លងសារការងារខណៈចំណាយពេលនៅជាមួយគ្រួសារ ឬក្រោយពេលការងារត្រូវបានបំពេញរួចរាល់ កំណត់ឱ្យច្បាស់បែបនេះដើម្បីរក្សាតុល្យភាពក្នុងការរស់នៅ។
៣. ដាក់ដែនកំណត់ជាមួយសមាជិកគ្រួសារ ៖ ធ្វើការងារពីផ្ទះផ្តល់ភាពងាយស្រួលក្នុងការទំនាក់ទំនងជាមួយអ្នកផ្ទះ ប៉ុន្តែផលពិបាកនោះគឺសមាជិកក្នុងផ្ទះក៏ងាយធ្វើឱ្យអ្នកបាត់បង់ការផ្តោតចំពោះការងារបានដូចគ្នាដែរ។ ដូច្នេះត្រូវជជែកគ្នាឱ្យច្បាស់ និងបែងចែកម៉ោងឱ្យបានច្បាស់ថា ចន្លោះម៉ោងណាខ្លះដែលអាចនិយាយឆ្លើយឆ្លងគ្នាបាន។
៤. ចាកចេញពីប្រព័ន្ធផ្សព្វផ្សាយ ៖ បណ្តាញសង្គមគឺជាប្រភពទាញស្មារតីកុំឱ្យផ្តោតទៅលើការងារ។ ដូច្នេះការកាត់ផ្តាច់ប្រព័ន្ធផ្សព្វផ្សាយកំឡុងថ្ងៃធ្វើការ ជាចំណែកពង្រឹងបាននូវផលិតភាពខ្ពស់។ ប៉ុន្តែប្រសិនបើចាំបាច់ក្នុងការប្រើ គឺត្រូវប្រើប្រាស់កម្មវិធីឌីជីថល ដើម្បីកំណត់ពេលក្នុងបរិមាណមួយដែលមិនប៉ះពាល់ដល់ការងារ។
៥. បិទទូរទស្សន៍ ៖ ប្រសិនបើច្បាស់ថាអេក្រង់ទូរស្សន៍ ជាចំណែកមួយនៃការផ្តាច់ចង្វាក់ការងារ គឺត្រូវតែបិទចោលតែម្តង។ រង់ចាំទាល់តែការងាររួចរាល់ជាមុនសិន សឹមបើកវិញ។ យ៉ាងណា ប្រសិនបើទម្លាប់ធ្វើការដោយមានសម្លេង ឬភ្លេងដើម្បីអម ឬកំដរពេលធ្វើការ សូមប្រើប្រាស់ឧបកណ៍ចាក់ភ្លេងដើម្បីជំនួសឱ្យការបើកទូរសទ្សន៍។ ប៉ុន្តែបើក្នុងករណីចាំបាច់ត្រូវតែមើល គឺមើលតែពេលទទួលទានអាហារថ្ងៃត្រង់ប៉ុណ្ណោះ៕
