ការធ្វើសមាធិត្រូវបានគេដឹងជាទូទៅថា គឺជាវិធីមួយជួយកាត់បន្ថយការថប់បារម្ភ តានតឹង, តែយ៉ាងណា នៅមានវិធីសាស្រ្តជាច្រើនទៀត ដើម្បីគ្រប់គ្រងស្រ្តេសដោយមិនចាំបាច់ទាមទារឱ្យចេះពីរៀបធ្វើសមាធិនោះទេ។

ស្ថិតនៅក្នុងស្ថានភាព ដែលមានបន្ទុកការងារ ការបង់ថ្លៃវិក័យប័ត្រច្រើន និងការព្យាយាមរស់នៅឱ្យមានផាសុកភាព រួមទាំងសកម្មភាពប្រចាំថ្ងៃជាច្រើនបានរុញច្រានឱ្យមនុស្សកើននូវភាពតានតឹង។ មិនថាភាពតានតឹងកើតនៅក្នុងកាលទេសៈណាទេ អ្វីដែលសំខាន់គឺត្រូវទាញចិត្ត និងរិះរកវិធីដោះស្រាយត្រឡប់មកវិញដោយវិធីសាស្រ្តជាច្រើន ដូចជាពិគ្រោះជាមួយអ្នកជំនាញ និងការទទួលទានឱសថជាដើម។ យ៉ាងណាក៏ដោយ ការព្យាបាលតាមរយៈវិធីនេះ មិនមែនជាជម្រើសតែមួយនោះទេ យោងតាមគេហទំព័រ healthline បានបង្ហាញគន្លឹះ៨ចំណុចបន្ថែមក្នុងការដោះស្រាយជាមួយភាពតានតឹងទាំងនេះ ៖

១​. ស្រែកបញ្ចេញសំឡេងមកក្រៅ ៖ ការដែលមានឱកាសនិយាយទៅកាន់មិត្តស្និទ្ធស្នាលជារឿងមួយល្អហើយ ប៉ុន្តែនៅមានវិធីមួយដែលល្អជាងនេះទៀតនោះគឺ ស្រែកឱ្យឮៗចេញមកក្រៅ ដើម្បីជួយឱ្យអារម្មណ៍ដែលពោរពេញដោយភាពតានតឹងទាំងនោះ មានសភាពធូរស្រាល។

២. ធ្វើឱ្យរាងកាយមានសកម្មភាព ឬចលនា ៖ លំហាត់ប្រាណ គឺជាអ្វីដែលអ្នកចង់ធ្វើបន្ទាប់ពីខួរក្បាលត្រូវបានផ្ទុកនូវរឿងរ៉ាវជាច្រើន។ ចំពោះអ្នកដែលមិនមានទម្លាប់ក្នុងការធ្វើលំហាត់ប្រាណ លោកអ្នកអាចនឹងកំពុងបារម្ភអំពីបញ្ហាគាំងបេះដូង ភាពឈឺចាប់នៃរាងកាយក្រោយធ្វើឱ្យមានចលនាភ្លាមៗ។ យ៉ាងណាការធ្វើលំហាត់ប្រាណ វាបានជួយឱ្យអ្នកមានអារម្មណ៍ធូរស្រាល និងកាត់បន្ថយភាពតាងតឹងបាន។ ដូច្នេះដើម្បីកាត់បន្ថយនូវភាពតានតឹង ការធ្វើលំហាត់ប្រាណគឺជាជម្រើសមួយដែលឆ្លើយតបប្រកបដោយប្រសិទ្ធភាព។

៣. ប្រើប្រាស់ជាតិកាហ្វេអ៊ីនក្នុងសភាពសមល្មម ៖ ទទួលទានកាហ្វេ សូកូឡា ឬក៏ភេសជ្ជៈត្រជាក់ៗ ត្រឹមតែមួយកែវ ក៏ជាចំណែកជួយឱ្យលោកអ្នកមានអារម្មណ៍ប្រសើរ និងបង្កើនថាមពល ប៉ុន្តែក៏ត្រូវកំណត់បរិមាណក្នុងការទទួលទានដែរ។

៤. គេងឱ្យបានគ្រប់ម៉ោង ៖ ខណៈភាពមមាញឹកជាមួយនឹងកាលវិភាគជាច្រើន វាធ្វើឱ្យលោកអ្នកស្ទើតែមិនមានពេលគ្រប់គ្រាន់ ក្នុងការទទួលទានដំណេកនោះទេ ដែលកត្តានេះវាក៏បង្កនូវភាពតានតឹង។ ដូច្នេះដើម្បីទទួលបានដំណេកដែលល្អ មិនត្រឹមតែគេងឱ្យគ្រប់ចំនួនម៉ោងនោះទេ ប៉ុន្តែក៏ត្រូវយកចិត្តទុកដាក់អំពីសកម្មភាពមុនពេលគេងផងដែរ ដោយត្រូវការរៀបចំកន្លែងគេងឱ្យបានស្អាតល្អ និងធ្វើឱ្យបរិយាកាសមុនពេលគេងមានភាពរីករាយ តាមរយៈការបង្កើតទម្លាប់ល្អៗមុនពេលចូលគេង ដូចជា អានសៀវភៅ ស្តាប់តន្រ្តី ដែលធ្វើយ៉ាងណាបង្កើនគុណភាព​នៃការគេង ក៏ជាហេតុនាំឱ្យពេលព្រឹកកាន់តែស្រស់ស្រាយផងដែរ។

៥. ច្រានចោលរឿងដែលមិនចាំបាច់ ៖ ការចេះពីរបៀបបដិសេធ និងហ៊ានបោះចោលសកម្មភាពដែលមិនចាំបាច់ វាមិនមែនជារឿងសាមញ្ញពេកនោះទេ ហើយបើក្នុងករណីលោកអ្នកហាក់ទទួលបាននូវអារម្មណ៍លើសចំណុះ និងមានកិច្ចការច្រើនដែលត្រូវទទួលខុសត្រូវ ឬក៏មានរឿងដែលត្រូវដោះស្រាយដោយខ្លួនឯងហើយ នោះការទទួលកិច្ចការដែលលើសដែនសមត្ថភាព បានបង្កឱ្យមានភាពតានតឹង។

៦. កុំទម្លាប់បង្អត់អាហារខ្លួនឯង ៖ ភាពធុញថប់ ពេលខ្លះជំរុញឱ្យអ្នកនឿយណាយនឹងអាហារ ឬក៏បរិភោគអាហារមិនល្អ តែយ៉ាងណាបើអ្នកបង្អត់អាហារខ្លួនឯង វានឹងកាន់តែបង្កឱ្យមានភាពតានតឹង និងធ្វើឱ្យអារម្មណ៍មិនល្អកាន់តែកើតមាន។ បន្ថែមពីការញ៉ាំ គឺចាំបាច់ត្រូវតែបរិភោគអាហារដែលមានសារធាតុ​​ចិញ្ចឹម និងអាហារដែលមានប្រូតេអ៊ីនគ្រប់គ្រាន់។

៧. ទុកចន្លោះសម្រាក ៖ ពេលខ្លះផ្លូវចិត្តមិនល្អ វាបណ្តាលមកពីគ្រប់គ្រងអារម្មណ៍មិនបានល្អ ហើយយើងមិនអាចធ្វើនូវសកម្មភាពគ្រប់យ៉ាងក្នុងពេលតែមួយនោះទេ ដូច្នេះត្រូវដឹងអំពីយុទ្ធសាស្រ្តដែលត្រូវសម្រាក ដោយកំណត់អំពីបញ្ហា និងពេលវេលា ក៏ដូចជាវិធីដោះស្រាយទៅនឹងបញ្ហាប្រឈមទាំងនោះ។

៨. រៀនរស់ក្នុងបច្ចុប្បន្នភាព ៖ ជាដំបូងត្រូវដាក់សំណួរ សួរខ្លួនឯង តើបច្ចុប្បន្ននេះ លោកអ្នកកំពុងតែគិតអំពីអ្វី? ឬក៏អ្នកកំពុងតែបារម្ភអំពីហេតុការណ៍ដែលមិនទាន់កើតមាន ឬក៏អ្នកកំពុងតែស្រ្តេសជាមួយស្ថានភាពសេដ្ឋកិច្ចនាពេលខាងមុខ? ឬក៏បារម្ភអំពីការកសាងគ្រួសារមួយ ដែលមានភាពពេញលេញ? បើចំណុចទាំងនេះជាចំណែកមួយនៃភាពមន្ទិលរបស់អ្នក នោះគឺមានន័យថា លោកអ្នកហាក់មិនបានចាប់អារម្មណ៍អំពីបច្ចុប្បន្នភាពនោះទេ។ ត្រង់ចំណុចនេះដែរគួរជ្រាបថា យើងមិនអាចគ្រប់គ្រងអំពីអនាគតកាលបាននោះទេ ដូច្នេះគឺយកចិត្តទុកដាក់អំពីការប្រើប្រាស់ពេលវេលាក្នុងពេលបច្ចុប្បន្នឱ្យបានល្អ តាមរយៈការថែទាំផ្លូវចិត្ត សមាធិ ជារួមគឺថែសុខភាពចិត្តនិងកាយឱ្យបានល្អតាមដែលអាចធ្វើបាន៕