ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការជ្រើសរើសរបបអាហារដែលពោរពេញដោយជីវជាតិ គឺជាគ្រឹះដ៏សំខាន់សម្រាប់សុខភាពរាងកាយទាំងមូល។ ប្រសិនបើលោកអ្នកកំពុងស្វែងរកផ្លែឈើបន្ថែមទៅក្នុងរបបអាហារប្រចាំថ្ងៃ ផ្លែល្ហុងគឺជាជម្រើសដ៏ប្រសើរដែលលោកអ្នកមិនគួររំលង ដោយសារមូលហេតុសំខាន់ៗដូចខាងក្រោម៖
១. កាត់បន្ថយហានិភ័យ នៃជំងឺភ្លេចភ្លាំង
ជំងឺភ្លេចភ្លាំង ឬជំងឺអាល់ហ្សៃមើរ គឺជាជំងឺចុះខ្សោយប្រព័ន្ធប្រសាទដែលបំផ្លាញកោសិកាខួរក្បាល បណ្តាលឱ្យបាត់បង់ការចងចាំ និងសមត្ថភាពបញ្ញា។ ការសិក្សាមួយចំនួនបានបង្ហាញថា ល្ហុងអាចជួយប្រឆាំងនឹងផលប៉ះពាល់នៃស្ត្រេសអុកស៊ីតកម្ម (ការកើនឡើងជាតិពុលក្នុងរាងកាយ) និងកាត់បន្ថយការផលិតរ៉ាឌីកាល់សេរីចំពោះអ្នកជំងឺភ្លេចភ្លាំង។
២. ពង្រឹងប្រព័ន្ធការពាររាងកាយឱ្យកាន់តែរឹងមាំ
ផ្លែល្ហុងគឺជាប្រភពដ៏សម្បូរបែបនៃវីតាមីន C ដែលក្នុងមួយចំណិតអាចផ្តល់រហូតដល់ ១៤០ មីលីក្រាម។ ការទទួលទានផ្លែល្ហុងជាប្រចាំ អាចជួយឱ្យប្រព័ន្ធភាពស៊ាំរបស់លោកអ្នកកាន់តែខ្លាំងក្លា ក្នុងការប្រយុទ្ធប្រឆាំងនឹងជំងឺផ្សេងៗ ស្រដៀងទៅនឹងការទទួលទានផ្លែឈើអម្បូរក្រូច ស្ពៃ ខាត់ណា និងម្ទេសប្លោកផងដែរ។
៣. ការពារសុខភាពបេះដូង
នៅក្នុងផ្លែល្ហុងមានផ្ទុកនូវសារធាតុចិញ្ចឹមសំខាន់ៗដូចជា ជាតិសរសៃ (Fiber) ប៉ូតាស្យូម និងសារធាតុប្រឆាំងអុកស៊ីតកម្ម។ ជាតិសរសៃជួយកាត់បន្ថយកម្រិតកូឡេស្តេរ៉ុល និងសម្ពាធឈាម ខណៈដែលប៉ូតាស្យូមជួយគ្រប់គ្រងសម្ពាធឈាមឱ្យមានលំនឹង ហើយសារធាតុប្រឆាំងអុកស៊ីតកម្មជួយកាត់បន្ថយការរលាក និងការពារបេះដូង។
៤. ដើរតួនាទីសំខាន់ក្នុងការប្រឆាំងការរលាក
តាមបែបបុរាណ ល្ហុងខ្ចីត្រូវបានគេយកមកប្រើប្រាស់ដើម្បីជួយឱ្យរបួសឆាប់ជាសះស្បើយ។ ការសិក្សាក្នុងមន្ទីរពិសោធន៍បានរកឃើញថា ផ្លែល្ហុងអាចជួយសម្រួលដល់ការរលាកតាមរយៈក្រុមប្រូតេអ៊ីនម្យ៉ាងហៅថា Cytokines ។
៥. ជួយការពារសុខភាពភ្នែក
ផ្លែល្ហុងមានផ្ទុកសារធាតុប្រឆាំងអុកស៊ីតកម្មសំខាន់ៗដូចជា Lutein, Zeaxanthin និងវីតាមីន E ដែលជួយការពារកែវភ្នែក និងទប់ស្កាត់ជំងឺភ្នែកផ្សេងៗ ជាពិសេសជំងឺភ្នែកឡើងបាយ ឬការចុះខ្សោយនៃចក្ខុវិញ្ញាណទៅតាមវ័យ។
៦. សម្រួលដល់ប្រព័ន្ធរំលាយអាហារ
ដោយសារវាជាផ្លែឈើដែលសម្បូរទៅដោយជាតិទឹក ផ្លែល្ហុងជួយឱ្យការរំលាយអាហារកាន់តែប្រសើរ និងកាត់បន្ថយការទល់លាមក។ ជាពិសេស វាក៏មានអង់ស៊ីមរំលាយអាហារដែលជួយបំបែកប្រូតេអ៊ីន កាត់បន្ថយការហើមពោះ៕
