ដំណេកខ្វះផាសុកភាព នាំឱ្យការប្រើប្រាស់ពេលវេលា​ពេញ​មួយយប់ក្នុងការគេងមិនមានប្រសិទ្ធភាពនោះទេ បីទោះបីជាការទទួលទានដំណេករបស់យើងបានគ្រប់ម៉ោងក៏ដោយ។ ការគេងមិនបានល្អ អាចបណ្តាលឱ្យមានបញ្ហាស្រ្តេស តាងតឹងក្នុងចិត្ត និងធុញថប់អារម្មណ៍ ឬក្រោកពីដំណេកម្តងៗតែងមានអាការៈអស់កម្លាំងជារឿយៗ ។ បរិយាកាសនៃការគេងមានផាសុកភាព ជួយឱ្យគេងឆាប់លក់ និងស្ងប់ ហើយចំណុចសំខាន់គឺជួយទាំងសុខភាពផ្លូវកាយនិងចិត្ត។ តើការគេងយ៉ាងដូចម្តេច ទើបមានអនាម័យ និងគុណភាព?

បើតាមគេហទំព័រ GOOD MEN PROJECT បានបង្ហាញពីវិធីសាស្រ្ត៤ចំណុចដូចខាងក្រោម ៖

១. ធ្វើលំហាត់ប្រាណ ៖ នៅពេលដែលរាងកាយរបស់អ្នកចាប់ផ្តើមបាត់បង់ភាពស្វាហាប់ ការហាត់ប្រាណប្រហែលជាសកម្មភាពមួយដែលអ្នកចង់ធ្វើ ប៉ុន្តែវាអាចជាអ្វីដែលអ្នកមិនមែនគ្រាន់តែចង់នោះទេ គឺត្រូវធ្វើតែម្តង និងតម្រូវឱ្យអនុវត្តន៍ជាពិសេសនៅពេលដែលអ្នកមានអារម្មណ៍ថានឿយណាយដែលបណ្តាលមកពីភាពតាងតឹងនានា ឬការគេងមិនគ្រប់គ្រាន់។ បើនិយាយចំពោះយុវវ័យវិញ នៅពេលបានបញ្ចេញកម្លាំងកាន់តែច្រើន នោះនឹងជួយឱ្យការគេងកាន់តែឆាប់លក់ និងស្កប់ក្នុងរយៈពេលយូរ។ ហើយវិធីនៃការហាត់នៅត្រង់ន័យនេះ គឺមិនចាំបាច់ទាល់តែទៅទីតាំង ឬមានអ្នកជំនាញបង្រៀននោះទេ លោកអ្នកអាចហាត់ដោយការដើរចុះឡើងៗ ក្រោយពិសាអាហារពេលល្ងាចរួចក៏បាន ឬសកម្មភាពសាមញ្ញៗឯទៀត។

២. កាត់បន្ថយពន្លឺខ្លាំងក្នុងបន្ទប់គេង ៖ ពន្លឺដែលជះចេញពីអេក្រង់ទូរស័ព្ទ និងកុំព្យូទ័រនៅពេលយប់ច្រើន ជាកត្តានាំឱ្យមនុស្សមានស្មារតីយល់ថា ទោះជាកាលរាត្រីក៏ដោយវាមិនខុសគ្នាពីពេលថ្ងៃនោះទេ ដែលនាំឱ្យមនុស្សពិបាកក្នុងការផ្តោតអារម្មណ៍គេង។ ដូច្នេះបិទពន្លឺដែលភ្លឺខ្លាំង និងពន្លឺដែលជះចេញពីអេក្រង់ទាំងឡាយឱ្យបានពីរ ទៅបីម៉ោង មុនពេលចូលគេង។ ប្រសិនបើត្រូវការកំណត់ពេលក្រោកពីព្រលឹម ឬប្រើប្រាស់បន្ទប់ទឹកនៅពេលយប់ គួរប្រើនាឡិការោទិ៍ ជំនួសឱ្យការប្រើសំឡេងម៉ោងរោទិ៍តាមរយៈទូរស័ព្ទ កាលដែលធ្វើបែបនេះ គឺដើម្បីជៀសវាងសម្លឹងមើលពន្លឺលើសលប់។

៣. រៀបបន្ទប់គេងឱ្យក្លាយជាទីតាំងគួរឱ្យចង់សម្រាក ៖ បន្ទប់គេងគួរតែជាកន្លែងសម្រាប់សម្រាក ឬបន្ធូរអារម្មណ៍តែប៉ុណ្ណោះ ដោយកាត់បន្ថយសកម្មភាពផ្សេងៗដែលមិនចាំបាច់ ។ មួយវិញទៀតបើសិនជាបន្ទប់មានពន្លឺជះចូលខ្លាំង ត្រូវបាំងវាំងននដែលមានសភាពក្រាស់ៗ។ ចំណែកអ្នកដែលត្រូវធ្វើការពីផ្ទះ គួរបែងចែកតុធ្វើការ និងគ្រែគេងឱ្យដាច់ពីគ្នា ដើម្បីកុំឱ្យមានអារម្មណ៍ថាបន្ទប់គេងជាកន្លែងសម្រាប់ការងារ។

៤. កំណត់ពេលចូលគេងឱ្យទៀងទាត់ ៖ មនុស្សជាអ្នកបង្កើតទម្លាប់ ហើយរាងកាយរបស់យើងនឹងសម្របទៅតាមសកម្មភាពណាមួយ ដែលយើងប្រព្រឹត្តជារៀងរាល់ថ្ងៃ ជាពិសេសប្រសិនបើអ្នកបានអនុវត្តន៍ក្នុងរយៈពេលមួយដែលវែង។ អ្នកគួរតែកំណត់ពេលចូលគេង និងការក្រោកពីគេង ទៅតាមម៉ោងធម្មតាឱ្យបានជាប្រចាំមិនថានៅថ្ងៃចុងសប្តាហ៍ក៏ដោយ៕