ភ្នំពេញ- ការជ្រើសរើសរៀនជំនាញដែលយើងស្រលាញ់ក្នុងការបន្តការសិក្សានៅថ្នាក់សាកលវិទ្យាល័យ គឺពិតជាសំខាន់ ព្រោះវាទាក់ទងនឹងអនាគត ក៏ដូចជាទាក់ទងនឹងអាជីពការងាររបស់យើងនៅថ្ងៃអនាគត ។ ទន្ទឹមគ្នានេះ ប្រសិនបើយើងចំណាយពេលរៀនជំនាញដែលមិនស្រឡាញ់ គឺនឹងពិបាកដោយសារយើងអត់ចូលចិត្ត នាំឱ្យកើតជាស្រ្តេស រៀនអត់ចេះ រហូតមានអារម្មណ៍ចង់បោះបង់ការសិក្សាដែលនាំឱ្យខាតពេលវេលា។ នេះជាការលើកឡើងរបស់ កញ្ញា ឃុន សម្ផស្ស អតីតសិស្សនិទ្ទេស A ឆ្នាំ២០១៦ និងជាអតីតនិស្សិតដេប៉ាតឺម៉ងប្រព័ន្ធផ្សព្វផ្សាយ និងសារគមនាគម នៃសាកលវិទ្យាល័យភូមិន្ទភ្នំពេញ។

កញ្ញា ឃុន សម្ផស្ស អតីតសិស្សនិទ្ទេស A ឆ្នាំ២០១៦ បានប្រាប់ឱ្យដឹងថា កាលនៅក្មេងនាងចូលចិត្តអានសៀវភៅ និងចូលចិត្តការនិយាយ ហើយនៅពេលឃើញគេនិយាយនៅក្នុងទូរទស្សន៍ ក៏ចាប់ផ្ដើមដឹងថាខ្លួនឯងចូលចិត្តបែបនិយាយព័ត៌មាន ឬជាពិធីការិនី ។ កញ្ញាបន្តថា ក្រោយប្រឡងចប់ថ្នាក់ទី១២ ក៏មានជំនាញដែលខ្លួនឯងស្រឡាញ់ហើយសម្រេចចិត្តចូលរៀនផ្នែកសារព័ត៌មាន ព្រមទាំងមានគ្រឹះផ្នែកសង្គមដែលនាំឱ្យពូកែផ្នែកសរសេរ និងការនិយាយបានល្អដើម្បីបន្តការសិក្សានៅថ្នាក់សាកលវិទ្យាល័យ។

កញ្ញា ឃុន សម្ផស្ស

“ខ្ញុំចង់រៀនជំនាញដែលខ្លួនឯងស្រឡាញ់ដោយគិតថា នៅថ្ងៃអនាគតខ្ញុំចង់ធ្វើអ្វី ព្រោះនៅពេលរៀនចប់យើងនឹងយកជំនាញដែលបានរៀនទៅធ្វើការងារទាក់ទងទៅនឹងជំនាញដែលយើងរៀន។ កាលណាយើងស្រឡាញ់យើងនឹងសប្បាយចិត្តនឹងធ្វើវា កាលណាយើងអត់ចូលចិត្តទេ មានន័យថា យើងឃើញមុខវិជ្ជារៀន ឬការងារនឹងធ្វើឱ្យយើងស្រ្តេស”

កញ្ញា សម្ផស្ស បន្ថែមថា ក្នុងឆ្នាំ២០១៧ កញ្ញាបានបន្តការសិក្សាថ្នាក់បរិញ្ញាបត្រផ្នែកសារព័ត៌មាន នៅសាកលវិទ្យាល័យភូមិន្ទភ្នំពេញ ក្នុងដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ (DMC)  ព្រោះដឹងថាខ្លួនចូលចិត្តផ្នែកព័ត៌មាន ក៏ចាប់ផ្ដើមសម្រួចចំណេះដឹង ទាក់ទងនឹងផ្នែកសង្គមឱ្យបានច្រើន អានសៀវភៅឱ្យបានច្រើន ខំប្រឹងរៀនភាសាអង់គ្លេស ភាសាខ្មែរ និងចំណេះដឹងទូទៅ ទើបនៅពេល ចូលរៀនថ្នាក់សាកលវិទ្យាល័យរៀនទាន់គេ និងមិនសូវពិបាក ។

អតីតសិស្សនិទ្ទេស A ឆ្នាំ២០១៦រូបនេះ បានផ្តល់ជាដំបូន្មាន​ដល់​សិស្ស​ដែល​ទើបប្រឡងបាក់ឌុបរួច ហើយ​ត្រូវការជ្រើសរើសជំនាញ គួរតែជ្រើសរើសជំនាញដែលខ្លួនឯងស្រឡាញ់ ប៉ុន្តែទន្ទឹមនឹងនេះ ត្រូវតែស្វែងយល់ពីខ្លួនឯងថាចូលចិត្តអ្វីឱ្យច្បាស់លាស់ ឱ្យប្រាកដប្រជា នៅពេលរៀនទៅទើបអាចចាប់បាន ហើយត្រូវគិតថាប្រសិនបើយើងឱ្យអ្នកដទៃ ឬគ្រួសារជាអ្នកជ្រើសរើសឱ្យ គាត់មិនប្រាកដថា យើងចូលចិត្តអ្វីនោះឡើយ។

កញ្ញា ឃុន សម្ផស្ស

“យុវជនគួរតែជ្រើសរើសជំនាញដែលខ្លួនឯងស្រឡាញ់ បានរៀនទៅជោគជ័យ រៀនទៅពូកែ មានចំណេះជំនាញពិតប្រាកដ ហើយកុំជឿតាមការអូសទាញតាមមិត្តភក្ដិ ឬក្រុមគ្រួសារ ដែលថារៀនជំនាញនេះល្អ រៀនជំនាញនោះល្អ រៀនជំនាញនេះបានលុយច្រើន ព្រោះពេលរៀនក៏មិនប្រាកដថាដូចអ្វីដែលគេនិយាយដែរ ដូចនេះយើងត្រូវប្រាកដចិត្ត និងសិក្សាស្វែងយល់ពីខ្លួនឯងពីអ្វីដែលយើងចូលចិត្ត”

ជាមួយ​គ្នានេះ ប្រសិនបើ​ជ្រើសរើស​ជំនាញដែលខ្លួនស្រឡាញ់ពេញចិត្តបានហើយ គឺត្រូវតែរៀនហើយរៀនទៀត រៀនឱ្យចេះ មានន័យថា ត្រូវដាក់កម្លាំងកាយកម្លាំងចិត្តក្នុងការប្រឹងប្រែងរៀនសូត្រ ដើម្បីឱ្យយើងចេះនូវជំនាញមួយបានច្បាស់លាស់។ ទន្ទឹមគ្នានេះ នៅពេលបញ្ចប់ការសិក្សា យើងត្រូវយកចំណេះដឹងរបស់យើងទៅធ្វើការងារ ហើយកាលណាយើងរៀននូវអ្វីដែលយើងស្រឡាញ់ ពេលចូលធ្វើការងារនឹងមានភាពងាយស្រួល៕