អង្គការទស្សនៈពិភពលោកអន្តរជាតិ ប្រចាំនៅកម្ពុជា បាន​ប្រកាស​កាលពីចុងសប្តាហ៍​កន្លងទៅនេះថា អង្គការ​មនុស្ស​ធម៌​មួយ​នេះ នឹងបិទបញ្ចប់កម្មវិធីតំបន់ចំនួន៣របស់ខ្លួន ក្នុងស្រុកបរិបូណ៍ ស្រុកជីក្រែង និងស្រុកស្អាង ក្រោយ​អនុវត្ត​អស់​រយៈពេលជាងមួយទសវត្សរ៍ ដោយ​បានផ្តល់ផលដល់ប្រជាពលរដ្ឋកម្ពុជាចំនួនជាង ១០ម៉ឺននាក់ ក្នុងនោះជាងមួយភាគបី គឺជាកុមារ និងជាងមួយម៉ឺននាក់ គឺជាកុមារងាយរងគ្រោះបំផុត។

អង្គការ​ទស្សនៈពិភពលោក បានបង្ហាញពីសមិទ្ធផលរបស់ខ្លួនក្នុងការលើកម្ពស់សុខភាព និងអនាម័យនៅ​ស្រុកទាំងបី ដោយ​បានបញ្ចប់ការបន្ទោរបង់ពាសវាលពាសកាលទាំងស្រុង (ODF)។ នៅស្រុកបរិបូណ៍ ខេត្តកំពង់ឆ្នាំង អត្រាបំបៅទឹកដោះម្តាយតែមួយមុខគត់ បានកើនឡើងយ៉ាងខ្លាំងពី ១៣% ដល់ ៩៤% ខណៈដែលអត្រាកុមារក្រិសក្រិន បានថយចុះជាងពាក់កណ្តាល។ នៅស្រុកជីក្រែង ខេត្តសៀមរាប អត្រានៃការសម្រាលកូនដោយបុគ្គលិកជំនាញបានកើនឡើងពី ១៥% ដល់ ១០០% ខណៈនៅស្រុកស្អាង ខេត្តកណ្ដាល សម្រេចបាននូវការកាត់បន្ថយអត្រាកុមារក្រិសក្រិន និងការទទួលបានទឹកស្អាតប្រើប្រាស់ស្ទើរតែទាំងស្រុង។

លោក ជេនេស អ៉ីម៉ានូអ៊ែលហ្គីនទីញ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជា បានសង្កត់ធ្ងន់ថា ​«សមិទ្ធផលទាំងនេះ មិនមែនគ្រាន់តែជាសមិទ្ធផលសម្រេចប៉ុណ្ណោះទេ ប៉ុន្តែជាមូលដ្ឋានគ្រឹះសម្រាប់វឌ្ឍនភាពបន្តបន្ទាប់ទៀត។ កុមារនឹងបន្តរីកចម្រើន ដោយសារតែមានសហគមន៍ជាអ្នកនាំផ្លូវ»។

នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជាបន្ថែមថា សមិទ្ធផលទាំងនេះ មិនអាចកើតមានឡើងបានទេ ប្រសិនបើគ្មានការសហការយ៉ាងសស្រាក់សស្រាំជាមួយក្រុមជំនុំគ្រិស្តបរិស័ទ សហគមន៍កសិកម្ម សាលារៀន ក្លឹបយុវជន មណ្ឌលសុខភាព ក្រុមសហគមន៍ គណៈកម្មការគ្រប់គ្រងទឹកស្អាត និងអាជ្ញាធរមូលដ្ឋាន រួមទាំងមន្ទីរ និងការិយាល័យស្រុក។ ការសហការទាំងនេះធានាថា នៅពេលកម្មវិធីបិទបញ្ចប់ សហគមន៍នឹងនៅតែបន្តលើកកម្ពស់សុខុមាលភាពកុមារ និងការអភិវឌ្ឍដោយខ្លួនឯងបាន។

លោកស្រី តាំ រ៉ានី ប្រធានមណ្ឌលសុខភាពឃុំពេជ្រចង្វារ នៅស្រុកបរិបូណ៍ មានប្រសាសន៍ថា «តាមរយៈការសហការជាមួយអង្គការទស្សនៈពិភពលោក យើងបានឃើញការផ្លាស់ប្រែជាច្រើនរបស់ប្រជាពលរដ្ឋក្នុងសហគមន៍។ ស្ត្រីមានផ្ទៃពោះទទួលបានការថែទាំសុខភាពពីបុគ្គលិកមានជំនាញ ចំណែកឯមណ្ឌលសុខភាព ក៏បានកែលម្អ តាមរយៈការពង្រឹងសមត្ថភាពរបស់បុគ្គលិកមណ្ឌលសុខភាព និងការកែលម្អហេដ្ឋារចនាសម្ព័ន្ធ»។

សម្រាប់លទ្ធផល​នៃ​ការ​អប់រំ​មាន​ការ​កើន​ឡើង​នៅ​ទូទាំង​​ស្រុកទាំងបី ដោយ​សហគមន៍​នីមួយៗ​បានបង្ហាញ​ពី​ការ​រីក​ចម្រើន​គួរ​ឱ្យ​កត់​សម្គាល់។ នៅស្រុកជីក្រែង សិស្សថ្នាក់ទី៣ អាចអានបានល្អ បានកើនឡើង២ដង ធៀបនឹងកាលពីពីរ​ បី ឆ្នាំកន្លងទៅ។ នៅក្នុងស្រុកស្អាងដែលធ្លាប់ប្រឈមនឹងអត្រាបោះបង់ការសិក្សាខ្ពស់ បានធ្លាក់ចុះគួរឱ្យគួរកត់សម្គាល់ ពី ៦៣% មកត្រឹមទាបជាង ៣% ។ ទន្ទឹមនឹងនេះ នៅស្រុកបរិបូណ៍ ឪពុកម្តាយកំពុងដើរតួនាទីកាន់តែសំខាន់ក្នុងការរៀនសូត្រកម្រិតមូលដ្ឋានរបស់កូនពួកគេ ហើយជិត ៩០% នៃជំរំអំណានពីកម្មវិធីតំបន់ស្រុកបរិបូណ៍ កំពុងឈានដល់ស្តង់ដាគុណភាពដែលត្រូវបានទទួលស្គាល់។

លោក អ៊ឹង ថារិន អនុប្រធានការិយាល័យអប់រំស្រុកស្អាង បានលើកឡើងថា «សាលាបឋមសិក្សាទាំងអស់ក្នុងឃុំស្វាយប្រទាល និងឃុំស្អាងភ្នំ ​មានហេដ្ឋារចនាសម្ព័នរីកចម្រើនជាខ្លាំង។ ការរីកចម្រើននេះ​គឺដោយសារតែមានការជួយជ្រោមជ្រែងពីអង្គការទស្សនៈពិភពលោក ដោយគ្រប់អគារសិក្សាដែលចាស់ៗ ហើយទ្រុឌទ្រោម ត្រូវបានជួសជុល ហើយបានបំពាក់បន្ថែមដោយបរិក្ខារចាំបាច់នានា»។

សម្រាប់ផ្នែកយុវជន និងភាពជាអ្នកដឹកនាំសហគមន៍វិញ កម្មវិធីទាំងបី បានផ្តោតលើអភិបាលកិច្ចប្រកបដោយបរិយាបន្ន និងការពង្រឹងសិទ្ធិអំណាចយុវជន។ នៅស្រុកជីក្រែង យន្តការការការពារកុមារបានដំណើរការយ៉ាងពេញលេញនៅគ្រប់ភូមិទាំងអស់ ហើយការចូលរួមរបស់យុវជនក្នុងការសម្រេចចិត្តក្នុងមូលដ្ឋាន ក៏បានកើនឡើង រួមចំណែកកាត់បន្ថយអំពើហិង្សាក្នុងគ្រួសារ។ នៅស្រុកស្អាង ក្លឹបយុវជនបានចាប់ផ្តើមគម្រោងដឹកនាំដោយសហគមន៍ចំនួន ១៦ ដើម្បីដោះស្រាយបញ្ហាអំពើហិង្សា ការប្រែប្រួលអាកាសធាតុ និងអនាម័យ។

លោកស្រី កង ម៉ាឡៃ ប្រធានសហគមន៍កសិកម្មអភិវឌ្ឍន៍ឃុំអន្លង់សំណរ មានប្រសាសន៍ថា «សហគមន៍កសិកម្មរបស់យើង មិនត្រឹមតែបានជួយដល់កុមារដែលងាយរងគ្រោះប៉ុណ្ណោះទេ ប៉ុន្តែក៏ជួយការងារអភិវឌ្ឍសហគមន៍ផងដែរ។ យើងនឹងនៅតែបន្ដកិច្ចការទាំងនេះទៅមុខទៀត ទោះបីជាអង្គការបានចាកចេញក៏ដោយ»។

បើតាមអង្គការទស្សនៈពិភពលោក បច្ចុប្បន្ន​នេះ អ្នកផ្តល់សេវាដូចជាគ្រូបង្រៀន បុគ្គលិកសុខាភិបាល និងមន្ត្រីឃុំ បានធ្វើឱ្យប្រសើរឡើងនូវរបៀបដែលពួកគេគាំទ្រសហគមន៍ រួមទាំងគ្រួសារក្រីក្រ និងក្រុមងាយរងគ្រោះដូចជា ជនមានពិការភាព កុមារ ស្ត្រីមានផ្ទៃពោះ និងមនុស្សចាស់។ ទន្ទឹមនឹងនេះ សហគមន៍ក៏​បានយល់ដឹងកាន់តែច្រើនអំពីសិទ្ធិរបស់ពួកគេចំពោះសេវាមូលដ្ឋាន ដែលនាំឱ្យមានឥរិយាបថដែលធ្វើឱ្យសុខភាពកាន់តែប្រសើរ ការចុះឈ្មោះចូលរៀនកើនឡើង និងតម្រូវការកាន់តែច្រើនសម្រាប់ឯកសារសំខាន់ៗដូចជាសំបុត្រកំណើតជាដើម។ ដោយឡែកអាជ្ញាមូលដ្ឋាន បានពង្រឹងនូវវឌ្ឍនភាពទាំងនោះ តាមរយៈការបែងចែកកញ្ចប់ថវិកាសម្រាប់សកម្មភាពគណនេយ្យភាពសង្គម នៅក្នុងផែនការវិនិយោគឃុំ ខណៈដែលអ្នកដឹកនាំមូលដ្ឋាន ក្រុមយុវជន និងអ្នកផ្តល់សេវាមានភាពម្ចាស់ការ ដើម្បីធានានិរន្តរភាព និងកសាងនូវសមិទ្ធិផលទាំងនេះ នៅពេលដែលអង្គការទស្សនៈពិភពលោកចាកចេញ៕