ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ធនាគារពិភពលោក បានបង្ហាញពីគោលជំហរបន្តគាំទ្រក្រសួងអប់រំ យុវជន និងកីឡា ក្នុងការអនុវត្តគម្រោងអប់រំសំខាន់ៗដែលមានគោលដៅកែលម្អគុណភាព និងអភិវឌ្ឍវិស័យអប់រំនៅកម្ពុជា ដើម្បីធានាថា ប្រជាជនកម្ពុជាទាំងអស់នឹងទទួលបានឱកាសសិក្សាដែលមានគុណភាព និងសមធម៌ ជាពិសេសត្រៀមខ្លួនរួចរាល់សម្រាប់ទីផ្សារការងារនាពេលអនាគត។
ក្នុងជំនួបជាមួយ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា កាលពីរសៀលថ្ងៃចន្ទ (៧ កក្កដា) លោកជំទាវ Manuela V. Ferro អនុប្រធានប្រចាំតំបន់ នៃធនាគារពិភពលោក បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា ក្នុងការអភិវឌ្ឍវិស័យអប់រំជាច្រើនឆ្នាំកន្លងមកនេះ ដោយបានកត់សម្គាល់ឃើញពីវឌ្ឍនភាពសំខាន់ៗ ជាពិសេសក្នុងការលើកកម្ពស់គុណភាពបង្រៀន និងរៀន ការពង្រឹកឱកាសអប់រំសម្រាប់មនុស្សគ្រប់គ្នា ក៏ដូចជាការបន្តកែទម្រង់កម្មវិធីសិក្សាដើម្បីឆ្លើយតបទៅនឹងតម្រូវការទីផ្សារការងារនាពេលបច្ចុប្បន្ន និងអនាគត។
លោកជំទាវបញ្ជាក់ថា នៅក្នុងបរិបទនៃការរីកចម្រើនយ៉ាងឆាប់រហ័សនាពេលបច្ចុប្បន្ននេះ កុមារ និងយុវជនចាំបាច់ត្រូវតែសិក្សាស្វែងយល់នូវជំនាញថ្មីៗ ជាពិសេសពាក់ព័ន្ធនឹងបញ្ញាសិប្បនិម្មិត(AI) ដោយធនាគារពិភពលោក បានត្រៀមខ្លួនក្នុងការបន្តជួយគាំទ្រដល់កម្ពុជា តាមរយៈក្របខណ្ឌគំនិត និងគម្រោងនានា ដើម្បីគាំទ្រវិស័យអប់រំកម្ពុជាឱ្យកាន់តែមានប្រសិទ្ធភាព។
ជាការឆ្លើយតប ឯកឧត្តមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា ក្រសួងអប់រំ យុវជន និងកីឡា បាននិងកំពុងបន្តអនុវត្តផែនការយុទ្ធសាស្ត្រកំណែទម្រង់ស៊ីជម្រៅក្នុងវិស័យអប់រំ ដែលផ្តោតសំខាន់លើការពង្រឹងគុណភាពគ្រូបង្រៀន, ការអភិវឌ្ឍជំនាញបច្ចេកវិទ្យាឌីជីថលដែលផ្តោតលើការអភិវឌ្ឍជំនាញឌីជីថល និងបច្ចេកវិទ្យាទំនើប រួមទាំងAI, លើកកម្ពស់ការអប់រំលើមុខវិជ្ជា(STEM), ប្រើប្រាស់បច្ចេកវិទ្យាដើម្បីតាមដានវត្តមានសិស្ស ក៏ដូចជាប្រសិទ្ធភាពការងាររបស់គ្រូបង្រៀន, លើកកម្ពស់គុណភាពអប់រំកុមារតូច, ពង្រឹងតេស្ត SEA-PLM និង PISA និងការបណ្តុះបណ្តាលវិជ្ជាជីវៈជាដើម ដើម្បីធានាថា កុមារ និងយុវជនកម្ពុជា មានលទ្ធភាព និងសមត្ថភាពគ្រប់គ្រាន់ក្នុងការប្រកួតប្រជែងលើទីផ្សារការងារជាតិ និងអន្តរជាតិ។
ជាថ្មីម្តងទៀត តាងនាមក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យ ក៏បានថ្លែងអំណរគុណយ៉ាងជ្រាលជ្រៅចំពោះ ការគាំទ្រដ៏យូរអង្វែងរបស់ធនាគារពិភពលោកមកកាន់វិស័យអប់រំនាពេលកន្លងមកនេះ ដែលបានរួមចំណែកយ៉ាងសំខាន់ក្នុងការអភិវឌ្ឍវិស័យអប់រំនៅកម្ពុជា និងមានការសង្ឃឹមយ៉ាងមុតមាំថា កិច្ចសហប្រតិបត្តិការដ៏ល្អប្រសើរនេះ នឹងបន្តរីកចម្រើនកាន់តែខ្លាំងក្លាទៅមុខទៀត ដើម្បីសម្រេចបាននូវចក្ខុវិស័យរួមក្នុងការកសាងប្រព័ន្ធអប់រំមួយដែលមានគុណភាព គ្រប់ជ្រុងជ្រោយ និងប្រកបដោយបរិយាបន្នសម្រាប់ប្រជាជនគ្រប់រូបនៅក្នុងប្រទេសកម្ពុជា។
បើតាមឯកឧត្តម ហង់ជួន ណារ៉ុន កន្លងមកធនាគារពិភពលោកតែងតែផ្តល់នូវការគាំទ្រផ្នែកបច្ចេកទេស និងហិរញ្ញវត្ថុ ដល់ការអភិវឌ្ឍវិស័យអប់រំនៅកម្ពុជា ជាពិសេសតាមរយៈគម្រោងនានាដូចជា SIEP, GEIP, HEIP, និងគម្រោងនាពេលខាងមុខ HEIP-2 និង BEIP ដែលទាំងអស់នេះបានចូលរួមចំណែកយ៉ាងសំខាន់ក្នុងការលើកកម្ពស់គុណភាពអប់រំ ការពង្រឹងសមត្ថភាពគ្រូបង្រៀន និងការបង្កើនលទ្ធភាពទទួលបានការអប់រំសម្រាប់សិស្សានុសិស្សគ្រប់រូប៕
