ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រុមប្រឹក្សាធនាគារពិភពលោក កាលពីថ្ងៃទី២៩ ខែសីហា ឆ្នាំ២០២៥ បានអនុម័តថវិកាហិរញ្ញប្បទានចំនួន១០០លានដុល្លារអាមេរិក ពីសមាគមអភិវឌ្ឍន៍អន្តរជាតិ (IDA) និងជំនួយឥតសំណងចំនួន ៥លានដុល្លារអាមេរិក ពីមូលនិធិបរធនពហុម្ចាស់ជំនួយ សម្រាប់គម្រោងកែលម្អការអប់រំកម្រិតមូលដ្ឋាននៅប្រទេសកម្ពុជា។
យោងតាមសេចក្តីប្រកាសព័ត៌មានដែលចេញផ្សាយកាលពីព្រឹកថ្ងៃទី១ កញ្ញា នេះ ធនាគារពិភពលោកអះអាងថា គម្រោងនេះនឹងជួយពង្រឹងជំនាញអក្ខរកម្ម និងគណិតវិទ្យាមូលដ្ឋាននៅតាមសាលាបឋមសិក្សាទូទាំងប្រទេស។ លើសពីនេះ គម្រោងក៏នឹងពង្រីកលទ្ធភាពទទួលបានសេវាអប់រំកុមារតូច និងសេវាថែទាំកុមារ, កែលម្អគុណភាពនៃការបង្រៀន, ធ្វើឱ្យប្រសើរឡើងនូវហេដ្ឋារចនាសម្ព័ន្ធសាលារៀន និងពង្រឹងប្រព័ន្ធគ្រប់គ្រងវិស័យអប់រំផងដែរ។
ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា «គម្រោងនេះឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាលកម្ពុជា ក្នុងការវិនិយោគលើមូលធនមនុស្ស និងធានាថាកុមារគ្រប់រូបមានឱកាសរៀនសូត្រ។ តាមរយៈការផ្តោតលើការរៀនសូត្រជាមូលដ្ឋាន យើងកំពុងរៀបចំមូលដ្ឋានគ្រឹះសម្រាប់អនាគតមួយដែលកាន់តែមានភាពធន់ និងវិបុលភាពជាងមុន»។
លោកស្រី តានញ៉ា ម៉េយ័រ (Tania Meyer) ប្រធានគ្រប់គ្រងការិយាល័យធនាគារពិភពលោកប្រចាំប្រទេសកម្ពុជា បានមានប្រសាសន៍ថា «កំណើនវែងឆ្ងាយទៅមុខរបស់កម្ពុជា អាស្រ័យលើភាពរឹងមាំនៃមូលធនមនុស្សរបស់ប្រទេសនេះ។ គម្រោងនេះនឹងជួយធានាថាកុមារទទួលបានជំនាញមូលដ្ឋានដែលពួកគេត្រូវការ ដើម្បីឈានទៅសម្រេចជោគជ័យនៅក្នុងសាលា និងការងាររបស់ពួកគេនាអនាគត។ ធនាគារពិភពលោកមានមោទនភាពក្នុងការជួយគាំទ្រការកសាងប្រព័ន្ធអប់រំមួយកាន់តែរឹងមាំ និងមានភាពធន់ជាងមុន ដែលអាចជួយរៀបចំដល់កុមារកម្ពុជាសម្រាប់ការងារនាពេលខាងមុខ»។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការវិនិយោគទៅលើធនធានមនុស្ស គឺជាការវិនិយោគមួយដែលចាំបាច់ ដែលមិនមែនគ្រាន់តែសំដៅទៅលើការអភិវឌ្ឍប្រទេស និងសេដ្ឋកិច្ចតែប៉ុណ្ណោះទេ ប៉ុន្តែសំដៅទៅលើរកាអភិវឌ្ឍទាំងការរស់នៅប្រចាំថ្ងៃនិងការអវិវឌ្ឍសង្គមមួយដែលប្រកបដោយពុទ្ធិ និងបង្កើតជាសង្គមមួយដែលមានការរីកចម្រើនពិតប្រាកដ។
បើតាមអ្នកនាំពាក្យ ថវិការទាំងអស់នោះ នឹងត្រូវយកមកប្រើប្រាស់ទាំងផ្នែករឹង និងផ្នែកទន់ ដោយនៅក្នុងនោះ ក្រសួងអប់រំយុវជន និងកីឡា រំពឹងទុកថា នឹងអាចពង្រឹងសមត្ថភាពគ្រូបង្រៀនប្រមាណ ៣ម៉ឺន ៧ពាន់នាក់ទូទាំងប្រទេស ដោយផ្អែកទៅលើកម្មវិធីអំណាន និងកម្មវិធីគណិតវិទ្យាថ្នាក់ដំបូងនៅទូទាំងប្រទេស។ លោកជំទាវបន្តថា ក្នុងកញ្ចប់អំណានដំបូង ក៏មានផលិតជាកម្មវិធីថ្នាលបឋមសិក្សាតាមប្រព័ន្ធអនឡាញ ហៅថា PLP ដែលអនុញ្ញាតឱ្យលោកគ្រូ អ្នកគ្រូ និងសិស្សានុសិស្សប្រើប្រាស់ទម្រង់កម្មវិធីនេះ នៅក្នុងការរៀន និងបង្រៀន ព្រមទាំងមានការធ្វើតេស្ត និងការអភិវឌ្ឍសមត្ថភាពជាប្រចាំនៅលើទម្រង់កម្មវិធីនេះដែរ។
ក្រៅពីការគាំទ្រកម្រិតបឋមសិក្សា ថវិកានេះក៏នឹងគាំទ្រថ្នាក់មត្តេយ្យសិក្សា ដោយរំពឹងទុកថា នឹងមានកុមារប្រមាណជាង៥ម៉ឺននាក់ នឹងទទួលផលពីកម្មវិធីនេះ។ រីឯផ្នែកហេដ្ឋារចនាសម្ព័ន្ធ សំដៅលើការរៀបចំឱ្យមានមជ្ឈមណ្ឌលថែទាំកុមារសាធារណៈ ដែលនៅក្នុងផែនការគ្រោងទុកមានប្រមាណ៦០កន្លែង និងការសាងសង់ជួសជុលអគារថ្មីសម្រាប់កម្រិតបឋមសិក្សាប្រមាណ ៦០០បន្ទប់បន្ថែមទៀត៕
