ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងដំណើរទស្សនកិច្ចនៅវិទ្យាល័យសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើមឫស ខេត្តកណ្ដាល កាលពីពេលកន្លងទៅថ្មីៗនេះ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ក្រសួងនឹងប្រែក្លាយវិទ្យាល័យសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដើមឬសទៅជាសាលារៀនជំនាន់ថ្មី។
ឯកឧត្ដមបណ្ឌិតសភាចារ្យ ហង់ជួន ណារ៉ុន បញ្ជាក់បន្ថែមថា គោលដៅក្នុងការទស្សនកិច្ចនេះ គឺដើម្បីជម្រាបជូនដល់លោកគ្រូ អ្នកគ្រូ ថា ក្រសួងមានជម្រើសពីរសំខាន់ ទី១. ការបន្តពង្រឹងដំណើរការសាលារៀនជាសាលាគំរូបន្តទៀត និងទី២. ប្រែក្លាយវិទ្យាល័យសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដើមឬសនេះ ទៅជាសាលារៀនជំនាន់ថ្មី ដើម្បីអាចឱ្យលោកគ្រូ អ្នកគ្រូ មានឱកាសពង្រឹងបន្ថែមនូវវិធីសាស្ត្របង្រៀន និងរៀនសូត្របន្ថែមទៀតនូវវិធីសាស្ត្រថ្មីៗ និងប្រើប្រាស់បច្ចេកវិទ្យាក្នុងការរៀន និងការបង្រៀន ។
ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី ក៏បានលើកឡើងអំពីគោលការណ៍ នៃការអនុវត្តកម្មវិធីសាលារៀនជំនាន់ថ្មី រួមមាន ១. សាលារៀនមានបរិស្ថានសិក្សាល្អប្រសើរ ហេដ្ឋារចនាសម្ព័ន្ធទំនើប រួមមានបន្ទប់ពិសោធន៍ បណ្ណាល័យសតវត្សទី២១ បន្ទប់កុំព្យូទ័រ និងទីលានកីឡាជាដើម ២. ការលើកកម្ពស់ការអប់រំស្ទែម ការអប់រំឌីជីថល ៣. គ្រូបង្រៀនទទួលបានការអភិវឌ្ឍសមត្ថភាពជាប្រចាំ ទាំងវិធីសាស្ត្របង្រៀនថ្មីៗ និងការប្រើប្រាស់បច្ចេកវិទ្យាក្នុងការបង្រៀន និងការសិក្សាស្រាវជ្រាវ ៤. ការជួយឱ្យសិស្សចេះសិក្សាស្រាវជ្រាវដោយខ្លួនឯង ជាមួយនឹងការសិក្សាបន្ថែមក្នុងបណ្ណាល័យ ស្រាវជ្រាវតាមអ៊ីនធឺណិត ចេះប្រើកុំព្យូទ័រ កាត់បន្ថយការមានពេលវេលាទៅដើរលេងឥតប្រយោជន៍ ជៀសវាងការប្រើប្រាស់គ្រឿងញៀន និងមានមូលដ្ឋានគ្រឹះរឹងមាំក្នុងការបន្តការសិក្សានៅឧត្តមសិក្សា។
ជាការឆ្លើយតប គណៈគ្រប់គ្រងសាលា លោកគ្រូ អ្នកគ្រូ តំណាងសហគមន៍ និងអាជ្ញាធរដែនដី បានសម្ដែងការគាំទ្រ និងប្ដេជ្ញាចិត្តចូលរួមអនុវត្តយ៉ាងម៉ឺងម៉ាត់នូវរាល់គោលការណ៍របស់ក្រសួង ក៏ដូចជាគោលនយោបាយថ្មីៗរបស់រាជរដ្ឋាភិបាល ដើម្បីកែលម្អបរិស្ថានសិក្សា និងសាលារៀនឱ្យមានហេដ្ឋារចនាសម្ព័ន្ធទំនើប បង្កើនសមត្ថភាពគ្រូបង្រៀនប្រកបដោយឧត្ដមភាព ជំរុញការចូលរួមរបស់សហគមន៍ ក្នុងគោលដៅឈានទៅផ្ដល់ការអប់រំសតវត្សទី២១ ផ្សារភ្ជាប់នឹងភាសាបរទេស បំណិនឌីជីថល ដល់សិស្សានុសិស្ស ដែលជាចលករជំរុញ និងលើកកម្ពស់លទ្ធផលសិក្សារបស់សិស្ស ឱ្យកាន់តែប្រសើរឡើងថែមទៀត។
ក្នុងឱកាសនេះដែរ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់គណៈអភិបាលខេត្ត ដែលតែងតែគិតគូរយកចិត្តទុកដាក់ ចំពោះវិស័យអប់រំ និងសូមកោតសរសើរដល់ គណៈគ្រប់គ្រងសាលា លោកគ្រូ អ្នកគ្រូ តំណាងសហគមន៍ និងអាជ្ញាធរដែនដី ដែលបានប្រឹងប្រែងយកអស់កម្លាំងកាយចិត្តបំពេញតួនាទីភារកិច្ចប្រកបដោយការទទួលខុសត្រូវខ្ពស់ និងសូមឱ្យបន្តរក្សាស្មារតីសហការគ្នា ចូលរួមគាំទ្រការអនុវត្តកំណែទម្រង់វិស័យអប់រំនៅកម្ពុជាឱ្យកាន់តែរីកចម្រើនទៅមុខទៀត៕
