ដើម្បីជំរុញការបន្តការសិក្សារបស់កុមារ ទោះស្ថិតក្នុងស្ថានភាពភៀសសឹកក្តី ក្រសួងអប់រំ យុវជន និងកីឡា សហការជាមួយ អង្គការទស្សនៈពិភពលោកអន្តរជាតិប្រចាំនៅកម្ពុជានិងក្នុងភាពជាដៃគូជាមួយក្រុមហ៊ុន កុងហ្វូ ឃីតឈិន បានផ្ដល់សម្ភារបង្រៀន និងរៀន ដល់កុមារនិងគ្រូជាង៦ពាន់នាក់ ក្នុងជំរំសុវត្ថិភាពខេត្តឧត្តរមានជ័យ។

បើតាមសេចក្ដីប្រកាសព័ត៌មាន កាលពីចុងសប្តាហ៍នេះ ក្រសួងអប់រំ និងដៃគូពាក់ព័ន្ធ បានផ្តល់ជូនសម្ភារៈបង្រៀននិងរៀន ចំនួនជាង ៤១ប្រភេទ ដល់សិស្សានុសិស្សចំនួនជាង៥៨៨០ នាក់ លោកគ្រូអ្នកគ្រូចំនួន៩៤នាក់ ដែលកំពុងរៀន និងបង្រៀនក្នុងសាលាបណ្ដោះអាសន្ន នៃជំរុំសុវត្ថិភាព ខេត្តឧត្តរមានជ័យ។ ក្នុងនោះ កុមារប្រមាណជាង ៤០០នាក់ និងគ្រូបង្រៀនចំនួន៤០នាក់ កំពុងរៀន និងបង្រៀន ក្នុងជំរំសុវត្ថិភាពវត្តបាត់ថ្កៅ បានទទួលបានកញ្ចប់សម្ភាររៀននិងបង្រៀនផងដែរ។

សម្ភារៈសិក្សាដែលត្រូវបានចែកចាយ រួមមាន ប៊ិច សៀវភៅ ជ័រលុប ទឹកលុប ក្តារខៀន តុរៀន អំពូលអានសៀវភៅ អំពូលបំភ្លឺផែនទីសកលលោក និងសម្ភារៈចាំបាច់ផ្សេងៗទៀតដែលនឹងជួយបង្កើតបរិយាកាសសិក្សាដែលមានសុវត្ថិភាព និងគាំទ្រដល់ការអភិវឌ្ឍសមត្ថភាពសិក្សារបស់កុមារ។ ការផ្ដល់សម្ភារសិក្សាដល់កុមារនៅជំរំភៀសសឹកនេះ គិតជាទឹកប្រាក់មានចំនួន៦ម៉ឺនដុល្លារ។

លោក ជេនេស អ៊ីម៉ានូអ៊ែល ហ្គីនទីញ នាយកប្រចាំប្រទេសអង្គការទស្សនៈពិភពលោក ប្រចាំនៅកម្ពុជា មាន ប្រសាសន៍ថា «ទោះមានវិបត្តិយ៉ាងណាក៏ដោយ កុមារគ្រប់រូបមិនគួរបាត់បង់ការសិក្សាឡើយ។ ការចែកចាយ សម្ភារៈសិក្សានេះ បង្ហាញពីការប្តេជ្ញាចិត្តយ៉ាងមុះមុត របស់អង្គការទស្សនៈពិភពលោក រួមជាមួយរាជរដ្ឋាភិបាលកម្ពុជា និងដៃគូផ្តល់ជំនួយ ដើម្បីឈរជាមួយកុមារ និងធានាថា ការសិក្សា របស់ពួកគេនៅតែបន្ត សូម្បីតែក្នុងកាលៈទេសៈដ៏លំបាកបំផុតក៏ដោយ»។

លោក ជេនេស អ៊ីម៉ានូអ៊ែល ហ្គីនទីញ បញ្ជាក់ថា ការគាំទ្រទាន់ពេលវេលាពីដៃគូ និងសប្បុរសជន គឺមានសារៈសំខាន់យ៉ាងខ្លាំង ក្នុងការការពារកុមារ និងធានាថា ការសិក្សារបស់ពួកគេអាចបន្តទៅមុខបានទោះស្ថិតក្នុងស្ថានភាពលំបាកក្តី។

ចាប់តាំងពីខែកក្កដា ឆ្នាំ២០២៥ រហូតមកទល់ពេលនេះ អង្គការទស្សនៈពិភពលោកអន្តរជាតិ ប្រចាំនៅកម្ពុជា បានផ្តល់ជំនួយមនុស្សធម៌ជាបន្តបន្ទាប់ ដល់ប្រជាពលរដ្ឋភៀសសឹកចំនួនជាង១៤ម៉ឺននាក់ រួមមានកុមារជាង ៤ ម៉ឺននាក់ ស្ត្រីមានផ្ទៃពោះ និងបំបៅដោះកូនជាង ២ពាន់នាក់ និងជនភៀសសឹកដែលមានពិការភាពជាង ១ពាន់នាក់ តាមរយៈជំនួយជាសាច់ប្រាក់ ការអប់រំ សន្តិសុខស្បៀង សុខមាលភាព និងអាហារូបត្ថម្ភ ការការពារ និងការគាំទ្រផ្លូវចិត្តសង្គម ជម្រកបណ្តោះអាសន្ន សម្ភារៈប្រើប្រាស់ចាំបាច់ ទឹកស្អាត និងសម្ភារៈអនាម័យជាដើម៕