ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
អ្នកនាំពាក្យក្រសួងអប់រំ យុវជន និងកីឡា លោកជំទាវ ឃួន វិច្ឆិកា បានអះអាងថា ពេលនេះក្រសួងអប់រំកំពុងបើកការស្រាវជ្រាវ ដើម្បីសិក្សារកការពិត និងចាត់វិធានការ ទៅលើករណីចោទប្រកាន់នាយកសាលាមួយរូបថា បានសុំប្រាក់ខែគ្រូបង្រៀនកិច្ចព្រមព្រៀងចំនួនមួយខែ។
កាលពីថ្ងៃចន្ទ ទំព័រហ្វេសប៊ុកមួយដែលមានឈ្មោះថា “គ្រូ” បានបង្ហោះនៅលើបណ្តាញសង្គមថា «មាននាយកសាលាបឋមសិក្សាម្នាក់ ត្រូវគ្រូកិច្ចព្រមព្រៀងរាយការណ៍ថា បានសុំប្រាក់ខែគាត់ចំនួន១ខែ ដូចគ្រូកិច្ចសន្យាទាំងអស់ដែលបង្រៀននៅសាលានោះ…» ទំព័រមួយនេះ បានទាមទារឱ្យបញ្ឈប់សកម្មភាពរបៀបនេះជាបន្ទាន់។ ជាបន្តបន្ទាប់ ទំព័រហ្វេសប៊ុក “គ្រូ” ដដែល ក៏បានបង្ហាញពីសារដែលគេជឿថា គឺជាគ្រូបង្រៀនកិច្ចព្រមព្រៀង ក៏ដូចជាគ្រូបង្រៀនកិច្ចសន្យា បានចូលទៅត្អួញត្អែពីករណីដូចគ្នានេះ។
អ្នកប្រើប្រាស់បណ្តាញសង្គមជាច្រើនបានចូលទៅបញ្ចេញមតិ ដោយថា ករណីនេះមិនមែនទើបតែមាននោះទេ ពោលគឺវាមានយូរមកហើយតែមិនមានអ្នកណាហ៊ាននិយាយ ព្រោះតែគេខ្លាចអស់ការងារ។ ខ្លះទៀតថា គ្រូកិច្ចសន្យាក៏មានស្ថានភាពដូចគ្នានេះដែរ។
គ្រូបង្រៀនផ្អែកលើកិច្ចព្រមព្រៀងការងារ គឺជាគ្រូបង្រៀនដែលត្រូវបានជ្រើសរើសដោយក្រសួងមុខងារសាធារណៈ ដើម្បីទៅបង្រៀននៅតាមសាលាបឋមសិក្សាដែលខ្វះខាតគ្រូ។ ដោយឡែកគ្រូបង្រៀនជាប់កិច្ចសន្យាវិញ ត្រូវបានជ្រើសរើសដោយមន្ទីរអប់រំ យុវជន និងកីឡា និងមានការចូលរួមពីមន្ទីរមុខងារសាធារណៈ។
យ៉ាងណាក៏ដោយ ប៉ុន្មានម៉ោងក្រោយមក ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានចូលទៅបញ្ចេញមតិ ដោយថា នេះជា “ទម្លាប់អាក្រក់, សាលាណា ដកចោលជាគំរូ” ។ ជាមួយគ្នានេះ ឯកឧត្តមរដ្ឋមន្រ្តី ក៏បានស្នើឱ្យរាយការណ៍នេះទៅឯកឧត្តមផ្ទាល់តាមរយៈសារជាអក្សរ ឬក៏ផ្ទាល់មាត់។
លោកបណ្ឌិត កាន់ ពុទ្ធី ប្រធាននាយកដ្ឋានបឋមសិក្សា មានប្រសាសន៍ប្រាប់ AMS ថា ក្រោយទទួលបានដំណឹងនេះ កាលពីថ្ងៃចន្ទម្សិលមិញ លោកបានចុះទៅដល់ទីតាំងដែលត្រូវចោទប្រកាន់ថា នាយកសាលាបានទារលុយពីគ្រូកិច្ចព្រមព្រៀងនោះ។ លោកបណ្ឌិត កាន់ ពុទ្ធី បញ្ជាក់ថា ចំពោះករណីនាយកសាលារូបនេះ ក្រុមការងារ កំពុងរៀបចំរបាយការណ៍ជូនឯកឧត្តមបណ្ឌិតសភាចារ្យ ហង់ជួន ណារ៉ុន និងកំពុងរង់ចាំការសម្រេច៕
