ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
និស្សិតថ្នាក់បរិញ្ញាបត្រចំនួន ៤១៨នាក់ ដែលធ្លាប់សិក្សាក្រោមអាហារូបករណ៍របស់លោក «ចេន ហ្ស៊ី» នៅតាមសាកលវិទ្យាល័យនានា ក្នុងទីក្រុងភ្នំពេញ នឹងទទួលបានអាហារូបករណ៍ពីសម្តេច ហ៊ុន សែន ជាជំនួសវិញ។
អាហារូបករណ៍ «ចេន ហ្ស៊ី» បង្កើតឡើងនៅឆ្នាំ២០២១ ជាគម្រោងមួយជួយដល់និស្សិតក្រីក្រដើម្បីឱ្យពួកគេអាចបន្តការសិក្សាថ្នាក់ឧត្តមសិក្សា។ ក្រៅពីទទួលបានការបង់ថ្លៃសិក្សា និស្សិតអាហាររូបករណ៍ ក៏ទទួលបានប្រាក់ឧបត្ថម្ភចំនួន ៥០ដុល្លារជារៀងរាល់ខែផងដែរ។ ក៏ប៉ុន្តែអាហារូបករណ៍នេះមិនអាចដំណើរការទៀតឡើយ ក្រោយពីលោក ចេន ហ្ស៊ី (Chen Zhi) ស្ថាបនិក និងជាម្ចាស់សម្ព័ន្ធក្រុមហ៊ុនព្រីនស៍គ្រុប ត្រូវបានចាប់ខ្លួន និងចោទប្រកាន់ពីបទឆបោកតាមប្រព័ន្ធអនឡាញនៅកម្ពុជា។ ហើយកាលពីថ្ងៃទី៧ ខែមករា លោក Chen Zhi និងបក្សពួកចំនួន ២នាក់ផ្សេងទៀត ត្រូវបានអាជ្ញាធរកម្ពុជាចាប់បញ្ជូនទៅប្រទេសចិន តាមសំណើរបស់អាជ្ញាធរមានសមត្ថកិច្ចនៃសាធារណរដ្ឋប្រជាមានិតចិន។
កាលពីថ្ងៃព្រហស្បត្តិ៍ ទី២២ ខែមករា ក្រសួងអប់រំ យុវជន និងកីឡា បានបើកកិច្ចប្រជុំមួយជាមួយក្រុមនិស្សិតដែលជួបបញ្ហាទាំងនេះ។ ក្នុងពេលនោះ ក្រសួងក៏បានជូនដំណឹងដល់ពួកគេថា សម្តេច ហ៊ុន សែន ប្រធានព្រឹទ្ធសភា នឹងផ្តល់អាហារូបករណ៍ដល់ពួកគេដើម្បីអនុញ្ញាតឱ្យពួកគេបញ្ចប់ការសិក្សាផ្នែកបរិញ្ញាបត្រតាមជំនាញដែលពួកគេបានជ្រើសរើស។ នេះបើតាមក្រុមនិស្សិតដែលបានឱ្យដឹងក្រោយពីកិច្ចប្រជុំដែលសារព័ត៌មាននានាបានស្រង់សម្តី។
របាយការណ៍ពីក្រសួងអប់រំ យុវជន និងកីឡា បង្ហាញថា និស្សិតដែលទទួលបានអាហារូបករណ៍ «ចេន ហ្ស៊ី» ទាំង ៤១៨នាក់ ក្នុងនោះមាននិស្សិតស្រី ១២៨នាក់ កំពុងសិក្សាផ្នែកវិស្វកម្មបច្ចេកវិទ្យាព័ត៌មាន ព័ត៌មានវិទ្យា ការគ្រប់គ្រងពាណិជ្ជកម្មអន្តរជាតិ ប្រព័ន្ធផ្សព្វផ្សាយ និងសារគមនាគមន៍ ផ្នែកសេដ្ឋកិច្ចឌីជីថល និងទេសចរណ៍ និងផ្នែកវិស្វកម្មសំណង់ស៊ីវិល នៅសាកលវិទ្យាល័យភូមិន្ទភ្នំពេញ នៅសាកលវិទ្យាល័យជាតិគ្រប់គ្រង និងវិទ្យាស្ថាន បច្ចេកវិទ្យាកម្ពុជា។
ក្រុមនិស្សិតបន្ថែមទៀតថា អាហារូបករណ៍សម្តេច ហ៊ុន សែន នឹងរ៉ាប់រងថ្លៃសិក្សា ប៉ុន្តែនឹងមិនមានប្រាក់ឧបត្ថម្ភប្រចាំខែទៀតឡើយ។
លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មិនទាន់ឆ្លើយតបនឹងបណ្តាញសារព័ត៌មាន AMS នៅឡើយគិតត្រឹមរសៀលថ្ងៃទី២៣ ខែមករានេះ៕
