ភ្នំពេញ- ចង់មានទម្លាប់អានសៀវភៅ ឬមានវប្បធម៌នៃការអាន យើងមិនអាចធ្វើវានៅថ្ងៃនេះ ហើយបានផលភ្លាមនៅថ្ងៃស្អែកនោះឡើយ គឺទាមទារពេលវេលាយូរទើបអាចបណ្ដុះទម្លាប់នោះបាន។ ទន្ទឹមគ្នានេះ ដើម្បីអាចអានបាន គឺទាមទារឱ្យយើងចង់អានជាមុនសិន ហើយតើសៀវភៅបែបណាដែលយើងចូលចិត្តអាន? នេះជាការលើកឡើងរបស់លោក ហុក សុទ្ធិ ប្រធានសមាគមបណ្ណាល័យកម្ពុជា។

លោក ហុក សុទ្ធិ ប្រធានសមាគមបណ្ណាល័យកម្ពុជា មានប្រសាន៍ថា ប្រសិនបើយុវជនចង់បង្កើតទម្លាប់អាន គឺចាប់ផ្ដើមអានពីចំណុចដែលខ្លួនចូលចិត្តអាន និងស្រឡាញ់សៀវភៅជាមុនសិន។ ឧទាហរណ៍ ចាប់ផ្ដើមអានដំបូងជាសៀវភៅប្រលោមលោក ដោយសារវាស្អាត ហើយងាយស្រួលអាន បន្ទាប់មកពេលយើងមានទម្លាប់អានទើបអាចចាប់ផ្ដើមអានសៀវភៅស្រាវជ្រាវកាន់តែលំបាកបន្ថែមទៀត។

លោក ហុក សុទ្ធិ ប្រធានសមាគមបណ្ណាល័យកម្ពុជា

“កាលណាយើងមិនបានបណ្ដុះទម្លាប់អាន នៅពេលចាប់កាន់សៀវភៅយកមកអានតែ១០ទំព័រ នឹងធ្វើឱ្យយើងឈឺក្បាល ហើយទុកសៀវភៅចោលឈប់អានតែម្ដង”

លោក ហុក សុទ្ធិ ប្រធានសមាគមបណ្ណាល័យកម្ពុជា មានប្រសាសន៍ថា ទម្លាប់អាន ឬមានវប្បធម៌នៃការអាន គឺគេត្រូវបណ្ដុះទម្លាប់ល្អនោះតាំងពីក្មេងមក មានន័យថា ជាការបណ្ដុះទម្លាប់អានតាមបែបធម្មជាតិ។ ការបណ្ដុះទម្លាប់នៃការអានមួយទៀត គឺតាមរយៈការបង្ខំ ឬដាក់សម្ពាធ មានន័យថា សិស្សត្រូវស្វែករកសៀវភៅមកអាន ដើម្បីឆ្លើយសំណួរកិច្ចការស្រាវជ្រាវដែលគ្រូបង្រៀនដាក់ឱ្យធ្វើនៅសាលា។ ការបង្ខំបែបនេះ យូរៗទៅនឹងអាចជួយសិស្សឱ្យក្លាយជាអ្នកអាន ប៉ុន្តែវាក៏ជះផលពីរផងដែរ គឺ ទី១. សិស្សអាចគិតថាអានសៀវភៅទទួលបានចំណេះដឹង និងទី២. សិស្សគិតថាជាការដាក់សម្ពាធនៅពេលគេរៀនចប់នឹងឈប់អាន។

លោក ហុក សុទ្ធិ ប្រធានសមាគមបណ្ណាល័យកម្ពុជា

“ការអានដែលល្អជាងគេ គឺបណ្ដុះវប្បធម៌នៃការអានតាមបែបធម្មជាតិ ដោយត្រូវបណ្ដុះទម្លាប់អានតាំងពីក្មេងមក”

ប្រធានសមាគមបណ្ណាល័យកម្ពុជា បន្ថែមថា តម្រូវការផ្នែកព័ត៌មាន ឬចំណេះដឹងក្នុងផ្នែកណាមួយ អាចនឹងជួយឱ្យយុវជន ឬសិស្សានុសិស្សចង់អានសៀវភៅ។ លោកថា នៅពេលយុវជន ឬសិស្សានុសិស្សចាប់អារម្មណ៍លើរឿងអ្វីមួយ ឬចង់ស្វែងរកព័ត៌មានអ្វីមួយ ហើយស្វែងរកកន្លែងណាក៏មិនមាន ដោយមានតែក្នុងសៀវភៅ នោះនឹងធ្វើឱ្យយុវជនអានសៀវភៅ។ ត្រង់ចំណុចនេះ ធ្វើឱ្យយុវជន និងសិស្សានុសិស្សស្វែងរកសៀវភៅអានដោយខ្លួនឯង គ្រាន់តែសកម្មភាពបែបនេះ គឺកម្រមានដោយសារយុវជនយើងមិនសូវមានទម្លាប់អាន។

លោក ហុក សុទ្ធិ បន្ថែមថា ដោយសារសម័យបច្ចុប្បន្នបច្ចេកវិទ្យារីកចម្រើនលឿន យុវជនយើងភាគច្រើនចំណាយពេលវេលាប្រើប្រាស់ទូរស័ព្ទច្រើន ដូច្នេះ យុវជនគួរតែដាក់ផែនការចំណាយពេលមកអានសៀវភៅឱ្យបានច្រើនជៀសជាងចំណាយលេងបណ្ដាញសង្គម។ លោកថា យុវជនក៏អាចប្រើប្រាស់ទូរស័ព្ទសម្រាប់អានបានដែរ ប៉ុន្តែការអានបែបនេះ វាមិនគ្រប់ជ្រុងជ្រោយនោះឡើយ មានតែការអានសៀវភៅប៉ុណ្ណោះទើបយុវជន និងសិស្សានុសិស្សអាចទទួលបានព័ត៌មាន និងចំណេះដឹងបានគ្រប់ជ្រុងជ្រោយ។

ប្រធានសមាគមបណ្ណាល័យកម្ពុជា ក៏បានលើកទឹកចិត្តដល់យុវជនដែរថា ដើម្បីអភិវឌ្ឍសមត្ថភាព យុវជន និងសិស្សានុសិស្សរៀនជំនាញអ្វី គួរអានសៀវភៅតាមជំនាញនោះ ដូចជា បើរៀនជំនាញពេទ្យ គួរអានសៀវភៅពេទ្យ, រៀនជំនាញវិស្វកម្ម គួរអានសៀវភៅបច្ចេកទេស, រៀនជំនាញអក្សរសិល្ប៍ត្រូវតែអានរឿងអក្សរសិល្ប៍ឱ្យបានច្រើន។ លើសពីនេះ យុវជនអាចជ្រើសរើសសៀវភៅផ្សេងទៀតសម្រាប់អានទុកជាការកម្សាន្ត ព្រោះនៅពេលដែលយុវជនមានអារម្មណ៍ថា ការអានជាការកម្សាន្តមិនមែនជាសម្ពាធ នោះនឹងនាំឱ្យយុវជនមានទម្លាប់អាន ឬវប្បធម៌នៃការអានជាមិនខាន៕