រដ្ឋមន្រ្តីក្រសួងអប់រំយុវជន និង​កីឡា ឯកឧត្តមបណ្ឌិតសភាចារ្យ ហង់ជួន ណារ៉ុន បានលើកឡើងថា ក្រសួងអប់រំ នឹងបន្តអនុវត្ត​កំណែទម្រង់​នៅឧត្តមសិក្សា ដើម្បីធានា​បាន​នូវ​ការ​បណ្តុះបណ្តាលធនធាន​មនុស្ស សម្រាប់បម្រើ​ដល់​ការ​អភិវឌ្ឍសង្គម-សេដ្ឋកិច្ច​កម្ពុជា។ ប្រសាសន៍នេះ បានធ្វើ​ឡើង​ក្នុង​ឱកាស​ដែល​ឯកឧត្តម​ចូលរួមពិធីប្រកាស​ចូល​កាន់តំណែងសាកលវិទ្យាធិការ នៃសាកលវិទ្យាល័យ​ជាតិមានជ័យ ខេត្ត​បន្ទាយមានជ័យ កាលពីថ្មីៗនេះ។

ឯកឧត្តមបណ្ឌិតសភាចារ្យ មានប្រសាសន៍ថា សម្រាប់ទិសដៅចម្បងរបស់ក្រសួងអប់រំនាពេលនេះ គឺ ការកសាងសមត្ថភាពស្ថាប័ន និងបង្កើតឱ្យមានប្រព័ន្ធអេកូឡូស៊ីពេញលេញមួយ ដើម្បីលើកកម្ពស់ឧត្តមភាពរបស់អ្នកស្រាវជ្រាវ និងការបណ្តុះឱ្យមានចរន្តស្រាវជ្រាវជាប្រចាំ នៅតាមគ្រឹះស្ថានឧត្ដមសិក្សា ដែលកិច្ចការស្រាវជ្រាវនេះជា គន្លឹះដ៏សំខាន់ក្នុងការជំរុញកំណើនសេដ្ឋកិច្ចកម្ពុជា ឱ្យប្រែក្លាយជាប្រទេសមានចំណូលមធ្យមកម្រិតខ្ពស់ក្នុងឆ្នាំ២០៣០ និងប្រទេសមានចំណូលខ្ពស់ក្នុងឆ្នាំ២០៥០។

ក្នុងនោះ សម្រាប់កំណែទម្រង់ឧត្តមសិក្សា នឹងផ្តោត​ទៅ​លើ៥ចំណុច ដែលរួមមាន៖ ១.​ ការពង្រឹងអភិបាលកិច្ចនៅតាមគ្រឹះស្ថានឧត្តមសិក្សា, ២.​ ការលើកកម្ពស់គុណវុឌ្ឍិសាស្ត្រាចារ្យឱ្យមានសញ្ញាបត្រថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត, ៣.​ ការជំរុញការសិក្សា ការបណ្តុះបណ្តាល និងកសាងជំនាញផ្នែកឌីជីថល និងជំនាញថ្មីៗ, ៤.​ ការជំរុញសកម្មភាពស្រាវជ្រាវ និងអភិវឌ្ឍន៍ ព្រមទាំងនវានុវត្តន៍ផ្នែកឌីជីថល និង ៥.​ ការកសាងភាពជាដៃគូជាមួយនឹងវិស័យឯកជនក្នុងការជំរុញ និងការអភិវឌ្ឍការងារស្រាវជ្រាវ អភិវឌ្ឍន៍ និងនវានុវត្តន៍។

ជាមួយគ្នានេះ ឯកឧត្តមរដ្ឋមន្រ្តី ក៏​បានលើក​យកអនុសាសន៍​របស់ឯកឧត្តមកិត្តិទេសាភិបាលបណ្ឌិតនាយករដ្ឋមន្ត្រី នៅក្នុងកិច្ចប្រជុំដំបូង គណៈរដ្ឋមន្ត្រី សម្រាប់នីតិកាលទី៧ (ថ្ងៃទី២៤ ខែសីហា ឆ្នាំ២០២៣) ដើម្បីលើកកម្ពស់គុណភាពអប់រំ ដោយផ្តោតលើការពង្រឹងគុណភាពគ្រឹះស្ថានសិក្សារដ្ឋ ចាប់ពីថ្នាក់មត្តេយ្យសិក្សា ដល់មធ្យមសិក្សា តាមរយៈការពង្រឹងកិច្ចការសំខាន់ៗ រួមមាន៖ ទី១. ការពង្រឹងអភិបាលកិច្ចសាលារៀន, ទី២. ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស, ទី៣. ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន, ទី៤. ការជំរុញ និងលើកទឹកចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ក្នុងការអប់រំ ស្របតាមពាក្យស្លោក ភាពជាដៃគូ រដ្ឋ និងសហគមន៍ ដើម្បីការអប់រំ។

គួរបញ្ជាក់ថា ការអភិវឌ្ឍមូលធនមនុស្ស ត្រូវ​បាន​រាជរដ្ឋាភិបាល​អាណត្តិទី៧ បានចាត់ទុកជាអាទិភាពទី១ នៅ​ក្នុងកិច្ចការអាទិភាពទាំង៥ ៕