ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មជ្ឈមណ្ឌលបណ្ដុះបណ្ដាលវិជ្ជាជីវៈ នៃរាជធានីខេត្តទូទាំងប្រទេសកម្ពុជាកំពុងធ្វើការផ្ដល់វគ្គសិក្សាវែង និងខ្លីសម្រាប់សិក្សាជំនាញជាច្រើនដែលផ្ដល់ឱ្យ យុវជន យុវនារី បេក្ខជនមានជីវភាពខ្វះខាតក្នុងការសិក្សា អ្នកបោះបង់ ឬផ្អាកការសិក្សានិងបងប្អូនប្រជាពលរដ្ឋដែលមិនទាន់ចេះជំនាញសម្រាប់ប្រកបមុខរបរការងារ។ ជាមួយគ្នានេះមជ្ឈមណ្ឌលបណ្ដុះបណ្ដាលវិជ្ជាជីវៈខេត្តកំពង់ឆ្នាំង ក៏បានត្រៀមរួចរាល់សម្រាប់វគ្គសិក្សាថ្មីដែលមានសិស្សចុះឈ្មោះចូលរៀនជាង២០០នាក់។
លោក លី ចន្ទរិទ្ធ នាយកមជ្ឈមណ្ឌលបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង បានឱ្យដឹងថា នៅក្នុងវគ្គសិក្សាឆ្នាំថ្មីនេះ មជ្ឈមណ្ឌលបណ្ដុះបណ្ដាលវិជ្ជាជីវៈខេត្តកំពង់ឆ្នាំងនឹងចូលរៀននៅថ្ងៃទី១៥ ខែមករា ឆ្នាំ២០២៤ ខាងមុខ។ ហើយក្នុងវគ្គសិក្សានេះនឹងមានចំនួនសិស្សចូលសិក្សាចំនួន២១៨នាក់ ដែលមានសិស្សស្រីចំនួន៧៩នាក់។
លោក ចន្ទរិទ្ធ បន្តថា ចំនួន២១៨នាក់នេះជាចំនួនច្រើន និងល្អផងដែរដែលមានទាំងសិស្សប្រុស និងសិស្សស្រីចូលរៀន ដោយមានអាយុចាប់ពី ១៥ឆ្នាំ ដល់ ៥៥ឆ្នាំ ប៉ុន្តែលោកលើកទឹកចិត្តឱ្យមានអ្នកចូលរួមសិក្សាឱ្យបានកាន់តែច្រើនដើម្បីមានជំនាញក្នុងខ្លួនកាន់តែប្រសើរ និងចំណេញពេលវេលាក្នុងការសិក្សា។
បើតាមលោក លី ចន្ទរិទ្ធ ជំនាញដែលសិស្សបានចុះឈ្មោះចូលរៀនរួមមាន ជំនាញសេវាកម្មកុំព្យូទ័រចំនួន៨៤នាក់ ស្រី៤៩នាក់ ជំនាញជួសជុលរថយន្តចំនួន២៩ នាក់ ស្រី ២នាក់។ ជំនាញតបណ្ដាញអគ្គិសនីក្នុងអគារ ចំនួន១៦នាក់ស្រី២នាក់ ជំនាញម៉ាស៊ីនត្រជាក់ចំនួន៦០នាក់ និងជំនាញកែច្នៃបន្លែផ្លែឈើ ចំនួន២៩នាក់ស្រី២៦នាក់។
ឱកាសនេះផងដែរ ក្នុងនាមជានាយកនៃមជ្ឈមណ្ឌលបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង លោក លី ចន្ទរិទ្ធ ពិតជាចង់ឃើញយុវជនមានជំនាញច្បាស់លាស់ ជាពិសេសក្នុងរៀនជំនាញ រៀនឱ្យចប់ រៀនឱ្យចេះ និងមានការងារធ្វើ។
គួរបញ្ជាក់ដែរថា នេះជាចក្ខុវិស័យវែងឆ្ងាយរបស់រដ្ឋាភិបាល ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសដាក់ឱ្យអនុវត្ត “កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ” កាលពីថ្ងៃទី១៤ ខែវិច្ឆិកា ឆ្នាំ២០២៣ សម្រាប់យុវជនចំនួន ១លាន ៥សែននាក់ មកពីគ្រួសារក្រីក្រ និងគ្រួសារងាយរងហានិភ័យ ដើម្បីទទួលបាននូវចំណេះជំនាញច្បាស់លាស់ និងក្លាយជាផ្នែកមួយក្នុងការជំរុញសេដ្ឋកិច្ចជាតិ ដោយមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការក្នុងការបណ្តុះបណ្តាលលើវិស័យចំនួន១០ ក្នុងការសិក្សា៕
