ភ្នំពេញ – ChatGPT គួរតែត្រូវបានប្រើសម្រាប់ជាជំនួយក្នុងការសិក្សា និងស្រាវជ្រាវ ព្រោះវាអាចជួយសិស្សនិស្សិតពង្រឹងការគិតបែបត្រិះរិះ ព្រមទាំងជាមធ្យោបាយសិក្សាមួយដ៏ឆ្លាតវៃ ក្នុងយុគសម័យនៃការរីកចម្រើននៃបច្ចេកវិទ្យាជាន់ខ្ពស់។ នេះបើតាមការលើកឡើងរបស់លោក ហេង សុខឡាយ អ្នកស្រាវជា្រវ និងគ្រូបង្រៀន នៅបណ្ឌិតសភាបច្ចេកវិទ្យាឌីជីថលកម្ពុជា ក្នុងសិក្ខាសាលាក្រោមប្រធានបទ «ChatGPT for Higher Education: To Ban, or Not To Ban» ដែលរៀបចំ​ឡើងដោយ​សាកលវិទ្យាល័យខេមតិច កាលពីពេលថ្មីៗនេះ។

លោក ហេង សុខឡាយ បានពន្យល់អំពីបច្ចេកវិទ្យា ChatGPT ថា វាជាបច្ចេកវិទ្យាថ្មី និងចុងក្រោយបង្អស់របស់មជ្ឈមណ្ឌលស្រាវជ្រាវ Open AI ដែលមានមូលដ្ឋាននៅសហរដ្ឋអាមេរិក។ វាគឺជា Chatbot ដែលផ្ទុកនូវទិន្នន័យយ៉ាងទូលំទូលាយ និងមានសមត្ថភាពឆ្លើយនូវរាល់សំណួរបានយ៉ាងឆាប់រហ័ស នៅពេលមនុស្សចោទសួរ។ បច្ចេកវិទ្យានេះ មានលក្ខណៈខុសគ្នាបន្តិចទៅនឹង Google ត្រង់ថា តាមរយៈ Google យើងអាចស្វែងរកប្រភពព័ត៌មាន និងទិន្នន័យជាច្រើននៅលើអ៊ីនធឺណិត ប៉ុន្តែវេទិកានេះមានតែទិន្នន័យ ដែលត្រូវបានគេបញ្ចូលទៅក្នុងអ៊ីនធឺណិតប៉ុណ្ណោះ។ ខណៈការសន្ទនាជាមួយ ChatGPT ប្រៀបដូចជា យើងកំពុងសន្ទនាជាមួយអ្នកជំនាញ ឬសាស្ត្រាចារ្យតែម្ដង។

លោកបន្តថា បច្ចុប្បន្ន យើងអាចប្រើ ChatGPT ដើម្បីសរសេរកូដ បកប្រែអត្ថបទ រៀបចំកម្មវិធីសិក្សា ដោះស្រាយលំហាត់គណិតវិទ្យា សង្ខេបអត្ថបទ ធ្វើការរំលឹកទ្រឹស្តីសម្រាប់អ្នកស្រាវជ្រាវ (literature review) សរសេរគោលនយោបាយ (research policy) បង្កើតគម្រោងអាជីវកម្ម បង្កើតយុទ្ធសាស្ត្រទីផ្សារ រួមទាំងសរសេរសំណេររឿង និងអត្ថបទជាដើម។

បើទោះជា ChatGPT ផ្ដល់នូវអត្ថប្រយោជន៍ច្រើនពិតមែន ប៉ុន្តែវាក៏មានគុណវិបត្តិមួយចំនួនផងដែរ ដូចជា ទិន្នន័យ និងព័ត៌មានផ្សេងៗក្នុងឆាត ChatGPT គឺមាននៅត្រឹមឆ្នាំ ២០២១ប៉ុណ្ណោះ។ ប្រសិនបើចង់ដឹងព្រឹត្តិការណ៍ ឬរឿងរ៉ាវដែលកើតក្រោយឆ្នាំនេះ ChatGPT មិនមានទិន្នន័យនោះទេ។ ម្យ៉ាងទៀត វាមិនអាចផ្ដល់នូវចម្លើយត្រឹមត្រូវគ្រប់ពេលឡើយ មានទិន្នន័យ ព័ត៌មាន និងប្រភពមួយចំនួន មានភាពលម្អៀង និងមិនត្រឹមត្រូវ។ លើសពីនេះ ប្រសិនបើអ្នកកំពុងធ្វើការនៅស្ថាប័ន ឬក្រុមហ៊ុន ដែលតម្រូវឱ្យរក្សាទិន្នន័យជាសម្ងាត់ អ្នកមិនគួរប្រើ ChatGPT ដើម្បីបំពេញការងារនោះទេ ព្រោះទិន្ន័យទាំងនោះ អាចនឹងត្រូវគ្រប់គ្រងដោយ OpenAI ឬលួចដោយក្រុមហ៊ុនដែលជាគូប្រជែង។

លោក ហេង សុខឡាយ សង្កត់ធ្ងន់ថា

“យើងគួរប្រើ ChatGPT ដើម្បីផ្ទៀងផ្ទាត់ចម្លើយ ឬកិច្ចការ ដែលយើងបានធ្វើរួចរាល់ ជាជាងសួរសំណួរត្រង់ៗទៅកាន់វា។ ព្រោះការសួរសំណួរត្រង់ៗដោយមិនបានចំណាយពេលគិតដោយខ្លួន​ឯង យើងនឹងមិនអាចពង្រឹងសមត្ថភាពនោះទេ”

លោក ហេង សុខឡាយ បានបង្ហាញទស្សនៈចំពោះការវិវត្តន៍នៃបច្ចេកវិទ្យានេះថា យើងមិនគួរនៅទ្រឹង ដោយមិនបើកចិត្តសម្របខ្លួនទៅនឹងបច្ចេកវិទ្យាថ្មីៗនោះទេ។ យ៉ាងណាមិញ ក្នុងករណីដែលយើងសម្រេចចិត្តប្រើប្រាស់វា យើងគួរប្រើក្នុងផ្លូវដ៏ត្រឹមត្រូវ។ ប៉ុន្តែបច្ចុប្បន្ន មានសាធារណៈជនកម្ពុជាជាច្រើន ដែលមិនទាន់ស្គាល់ថា អ្វីទៅជា ChatGPT? ម្ល៉ោះហើយ នេះគឺជាពេលវេលាមួយ ដែលយើងគួរបង្កើនការផ្សាព្វផ្សាយអំពីវាឱ្យបានកាន់តែទូលំទូលាយ ដើម្បីឱ្យប្រជាជនកម្ពុជាមានការយល់ដឹងកាន់តែច្រើន និងដឹងពីមូលដ្ឋានក្នុងការប្រើប្រាស់។ យ៉ាងណាមិញ ChatGPT មិនទាន់អាចដំណើរការបាននៅក្នុងប្រទេសកម្ពុជានោះទេ ករណីដែលយើងចង់ប្រើប្រាស់បច្ចេកវិទ្យានេះ អាចប្រើបានតាមរយៈការប្រើ VPN ជាជំនួយ។ គួរជម្រាបជូនថា ក្រោយពីបានដាក់ឱ្យប្រើប្រាស់ជាផ្លូវការនៅចុងខែ វិច្ឆិកា ឆ្នាំ២០២២ បច្ចេកវិទ្យា ChatGPT បានក្លាយជាប្រធានបទមួយដែល​សិស្សនិស្សិត ក្រុមអ្នកស្រាវជ្រាវ សាស្ត្រាចារ្យ អ្នកជំនាញបច្ចេកវិទ្យា អ្នករៀបចំគោលនយោបាយ បញ្ញាវន្ត និងប្រជាជនគ្រប់មជ្ឈមដ្ឋាន លើកយកមកពិភាក្សាដោយមានអ្នកខ្លះបង្ហាញពីក្ដីបារម្ភ ដែលមនុស្សបានដាក់ឱ្យប្រើប្រាស់បច្ចេកវិទ្យានេះ។ ខណៈមនុស្សមួយចំនួនទៀត បានចាត់ទុកថា របកគំហើយថ្មីនេះ ជាឧបករណ៍ជំនួយការដ៏ពិសេស ដែលអាចជួយមនុស្សបានច្រើន ជាពិសេសសម្រាប់ការសិក្សា ស្រាវជ្រាវ និងបំពេញការងារ៕​