របៀបរៀនរបស់សិស្សមានរូបភាពប្លែកៗទៅតាមបុគ្គលិកលក្ខណៈ និងនិស្ស័យពិសេសរបស់សិស្សម្នាក់ៗ។ ដូច្នេះគ្រូបង្រៀនត្រូវមានបច្ចេកទេសបង្រៀន និងប្រើប្រាស់សម្ភារៈឧបទេសគាំទ្រការរៀន និងបង្រៀន ដែលសមស្របនឹងបុគ្គលិកលក្ខណៈរបស់សិស្ស ដើម្បីជួយឱ្យលទ្ធផលសិក្សាកាន់តែប្រសើរ។

បើតាមសៀវភៅការអភិវឌ្ឍកុមារ ផ្សារភ្ជាប់នឹងការអប់រំបឋមសិក្សា បានបង្ហាញរបៀបរៀនខុសប្លែកគ្នារបស់សិស្ស ដែលគ្រូបង្រៀន ឬអ្នកអប់រំ អាចស្វែងយល់។

ទី១. រៀនតាមរយៈការមើល ៖ សិស្សរៀនរបៀបនេះ ជាអ្នកពូកែភ្នែក គ្រាន់តែបានមើលគេអាចចាំបាន។ បើមិនបានមើល គេមិនងាយចងចាំបានឡើយ។ សិស្សដែលមានចំណូលចិត្តរៀនរបៀបនេះ គឺមានទំនោរបកស្រាយ ឬរ៉ាយរ៉ាប់តាមរូបភាពវត្ថុដែលមើលឃើញពីខាងក្រៅ ដូចជា រូបថត ដ្យាក្រាម ផែនទី…។ លើសពីនេះ ពួកគេក៏ចូលចិត្តសិក្សាបែបស្រាវជ្រាវ ហើយពូកែខាងសរសេរកិច្ចការ។ វិធីដែលធ្វើឱ្យគេទទួលការសិក្សាបានល្អ គឺគ្រូត្រូវឱ្យគេបំពេញកិច្ចការតាមរយៈការសរសេរ ការគណនា ការបង្កើតផែនទីគំនិត ការពណ៌នាតាមរយៈរូបភាព។ល។

ទី២. រៀនតាមរយៈការស្តាប់ ៖ សិស្សរៀនរបៀបនេះ ជាមនុស្សមានត្រចៀកវាងវៃ គេចូលចិត្តស្តាប់ពេលគេរៀន គេត្រូវការស្តាប់ទើបឆាប់ចាំ ការពន្យល់ការបកស្រាយរបស់គ្រូធ្វើឱ្យគេយល់បានភ្លាមៗ។ សិស្សដែលមានទំនោរបែបនេះ គេចូលចិត្តថតសំឡេងគ្រូ ឬមេរៀនបែប E-Learning ដើម្បីអាចរៀនឡើងវិញតាមរយៈការស្ដាប់។ វិធីដែលធ្វើឱ្យពួកគេទទួលការសិក្សាបានជោគជ័យ គឺកិច្ចការ ឬមេរៀនដែលបានរៀបចំជាសំឡេង ឬការបង្រៀនប្រើសំឡេងខ្លាំងៗ។

ទី៣. រៀនតាមរយៈការធ្វើសកម្មភាព ៖ សិស្សរៀនរបៀបនេះ អាចចងចាំបានឆាប់ពេលគេបានធ្វើសកម្មភាព។ គេតែងចូលចិត្តមុខវិជ្ជាណាដែលតម្រូវឱ្យបញ្ចេញសកម្មភាពដូចជា របាំ រាំ ច្រៀង កីឡា អត្តពលកម្ម។ ប៉ុន្តែគេក៏អាចរៀនមុខវិជ្ជាផ្សេងៗទៀតបានដែរ ឱ្យតែនៅពេលរៀនគេបានចូលរួមធ្វើសកម្មភាពដោយផ្ទាល់។ វិធីដែលធ្វើឱ្យពួកគេទទួលការសិក្សាល្អបំផុត គឺរៀបចំសកម្មភាពក្រៅថ្នាក់ កិច្ចការបែបគម្រោង និងកិច្ចការស្រាវជ្រាវ។

ទី៤. រៀនតាមរយៈការអាន ៖ សិស្សរៀនរបៀបនេះមិនទាមទារលក្ខខណ្ឌច្រើនទេ ពេលគេរៀនសូត្រ ពេលគេអាន គេអាចទទួលបានចំណេះដឹងថ្មី។ ជួនកាលគេអានឮៗទើបគេឆាប់ចងចាំ គេមិនចូលចិត្តស្តាប់ឬមើលទេ គេស្រឡាញ់តែអំណាន។

ទី៥. រៀនតាមរយៈការជជែកដេញដោល ៖ សិស្សរៀនរបៀបនេះចូលចិត្តជជែក វែកញែករកហេតុផល ផ្តល់មតិ បញ្ចេញយោបល់ ទើបគេរៀនសូត្របានល្អប្រសើរ៕