Football 5-side ជាកីឡាបាល់ទាត់ត្រូវបានបង្កើតឡើងជាពិសេស សម្រាប់អត្តពលិក ដែលមានពិការភាពភ្នែក។ កីឡានេះ ត្រូវបានគ្រប់គ្រងដោយសហព័ន្ធកីឡាពិការភ្នែកអន្តរជាតិ (IBSA) ចាប់ពីឆ្នាំ ១៩៩៦ ហើយនៅពេលលេង ត្រូវគោរពតាមច្បាប់ដែល FIFA បានរៀបចំឡើង។ កីឡានេះត្រូវបានដាក់ឱ្យចូលរួមប្រកួតក្នុងព្រឹត្តិការណ៍ប៉ារ៉ាឡាំពិកលើកដំបូងនៅទីក្រុងអាតែន ប្រទេសក្រិក នាឆ្នាំ២០០៤ ហើយត្រូវបានដាក់បញ្ចូលជាវិញ្ញាសាកីឡាសម្រាប់ព្រឹត្តិការណ៍លំដាប់ពិភពលោកនេះ ចាប់ពីពេលនោះមក។

ក្រុមកីឡាបាល់ទាត់ជនពិការភ្នែក (Football 5-side) ដែលអាចចូលរួមប្រកួតបាន ត្រូវមានសមាជិក ៥នាក់នៅលើទីលាន ក្នុងនោះមានម្នាក់ជាអ្នកចាំទី។ កីឡាករបួននាក់ក្រៅពីអ្នកចាំទី ត្រូវតែជាកីឡាករដែលមានពិការភាពភ្នែកទាំងស្រុង (ប្រភេទ B1) មានន័យថា ពួកគេមានកម្រិតមើលឃើញទាបបំផុត ឬគ្មានពន្លឺទាល់តែសោះ។ ខណៈអ្នកចាំទីត្រូវតែមើលឃើញ ឬមើលឃើញក្នុងកម្រិត B2 ឬ B3។

ដើម្បីធានាបាននូវការប្រកួតប្រជែងដែលយុត្តិធម៌ កីឡាករក្រៅពីអ្នកចាំទី ត្រូវពាក់ឧបករណ៍ Eyeshades សម្រាប់បញ្ជាក់ថា ពួកគាត់មិនអាចមើលឃើញបាល់។ ក្រុមទាំងអស់អាចមានអ្នកមគ្គុទេសន៍ក្រៅទីលាន ដើម្បីជួយ និងទាមទារឱ្យមានការស្រែកប្រាប់ និងឱ្យសញ្ញាពីសំណាក់គ្រូបង្វឹក ដើម្បីអាចឱ្យក្រុមកីឡាករពិការភ្នែកលេងបានល្អទៅតាមលក្ខណៈបច្ចេកទេស។ ម្យ៉ាងទៀត បាល់សម្រាប់ការប្រកួតបាល់ទាត់ជនពិការភ្នែក ចាំបាច់ត្រូវតែមានសំឡេង ដើម្បីផ្ដល់ភាពងាយស្រួលដល់កីឡាករ សម្រាប់ការកំណត់គោលដៅដែលគេចង់ទាត់។ ចំណែកអ្នកគាំទ្រ ចាំបាច់ត្រូវរក្សាភាពស្ងៀមស្ងាត់ អំឡុងពេលទស្សនា រហូតដល់មានការសុតបញ្ចូលទី។

បាល់ទាត់ជនពិការភ្នែក ត្រូវលេងនៅលើទីលានរាងចតុកោណកែង ដែលមានប្រវែង ៤០ម៉ែត្រ និងទទឹង២០ម៉ែត្រ។ នៅជុំវិញទីលានត្រូវមានរបាំង ដើម្បីការពារមិនឱ្យបាល់ចេញទៅក្រៅទីលាន។ ការប្រកួតមានរយៈពេល ៥០នាទី ដោយត្រូវបែងចែកជា ២តង់ ហើយក្រុមនីមួយៗ អាចស្នើសុំពេលមួយនាទី ដើម្បីសម្រាកនៅក្នុងតង់នីមួយៗ។ សូមជម្រាបថា កីឡាបាល់ទាត់ Football 5-side ក៏ត្រូវបានដាក់បញ្ចូលជាវិញ្ញាសាកីឡាសម្រាប់ប្រកួតក្នុងព្រឹត្តិការណ៍ប៉ារ៉ាហ្គេម លើកទី១២ ដែលកម្ពុជាធ្វើជាម្ចាស់ផ្ទះដែរ៕