ក្នុងសន្និសីទអន្តរជាតិស្ដីពី សាលារៀនស្វយ័តជាគន្លឹះដើម្បីកំណែទម្រង់ការអប់រំ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា រាជរដ្ឋាភិបាលកម្ពុជាពិតជាមានកិត្តិយសដែលបានធ្វើជាម្ចាស់ផ្ទះ ក្នុងការរៀបចំសន្និសីទអន្តរជាតិនេះ និងចូលរួមចែករំលែកបទពិសោធន៍ក្នុងការអនុវត្ត គំនិតផ្តួចផ្តើមបង្កើតសាលារៀនជំនាន់ថ្មី (NGS) និងសិក្សាបទពិសោធន៍ពីប្រទេសដទៃដើម្បី បន្តជំរុញការអនុវត្តកម្មវិធីនេះកាន់តែប្រសើរ។

ឯកឧត្ដមបណ្ឌិតសភាចារ្យ ហង់ជួន ណារ៉ុន មានប្រសាសន៍ថា បច្ចុប្បន្ននៅប្រទេសកម្ពុជា មានសាលារៀនជំនាន់ថ្មីចំនួន ១១ រួចមកហើយ ដូចនេះ ដើម្បីឆ្លើយតបនឹងផែនការយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋភិបាល ក្នុងនីតិកាលទី៧ នៃរដ្ឋសភា ក្រសួងអប់រំ យុវជន និងកីឡា នឹងព្យាយាមពង្រីកសាលារៀនជំនាន់ថ្មីបន្ថែមទៀត ។

បើតាមឯកឧត្តមរដ្ឋមន្ត្រី ក្រសួងអប់រំនឹងបន្តយុទ្ធសាស្ត្រពង្រីកឱ្យមានសាលាជំនាន់ថ្មីកាន់តែច្រើន និងបន្តពង្រឹងការគ្រប់គ្រងតាមសាលារៀនឆ្ពោះទៅលើកកម្ពស់លទ្ធផលសិក្សារបស់សិស្សតាមរយៈការផ្លាស់ប្តូរវប្បធម៌សាលារៀន និងការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថល្អរបស់បុគ្គលិកអប់រំ និងសិស្សានុសិស្ស។

ឯកឧត្តម ហង់ជួន ណារ៉ុន មានប្រសាសន៍ថា យោងតាមបទពិសោធន៍រយៈពេល ០៨ ឆ្នាំ មកនេះ សង្កេតឃើញថា កំណែទម្រង់សាលារៀនជំនាន់ថ្មី អាចសម្រេចទៅបាន ត្រូវផ្អែកជាសំខាន់ទៅលើការអនុវត្តវិធីសាស្ត្របង្រៀនសម្បូរបែប ការកែលម្អអភិបាលកិច្ច ការវាយតម្លៃដោយយុត្តិធម៌​ (Fair Assessment) និងតម្លាភាពក្នុងការបង្រៀន។

គួរជម្រាបជូនថា សន្និសីទអន្តរជាតិស្ដីពីសាលារៀនស្វយ័ត ជាគន្លឹះដើម្បីកំណែទម្រង់ការអប់រំ រៀបចំឡើងក្នុងគោលបំណងផ្តោតសំខាន់លើការសិក្សាពីរបៀបដែលសាលាស្វយ័តចូលរួមលើកកម្ពស់កំណែទម្រង់វិស័យអប់រំ មិនថាតែនៅកម្ពុជាប៉ុណ្ណោះទេ គឺទូទាំងតំបន់អាស៊ីអាគ្នេយ៍ តាមរយៈការចែករំលែកបទពិសោធន៍ ព័ត៌មាន ដែលធ្វើឱ្យសាលាស្វយ័តដំណើរការបានល្អ និងរបៀបនៃការដោះស្រាយបញ្ហាប្រឈមនានា៕