កាលពីដើមសប្តាហ៍នេះ រដ្ឋមន្រ្តីក្រសួងអប់រំ យុវជន និង​កីឡា ឯកឧត្តម ហង់ជួន ណារ៉ុន រួមជាមួយ ឯកឧត្តម Igor Driesmans ឯកអគ្គរដ្ឋទូត​សហភាព​អឺរ៉ុប​ប្រចាំ​នៅ​កម្ពុជា បានប្រកាស​ដាក់​ឱ្យ​អនុវត្ត​ជាផ្លូវការ​គម្រោង​កំណែទម្រង់​ការ​អប់រំ​បច្ចេកទេស សម្ព័ន្ធមេត្រីភាព Twinning កម្ពុជា-សហភាពអឺរ៉ុប ដែលជាកិច្ចសហការ​ក្នុងការធ្វើទំនើបកម្មកម្មវិធីសិក្សា ក៏​ដូចជា​ការ​បណ្តុះបណ្តាល​គ្រូ​កម្ពុជាសម្រាប់ការ​អប់រំ​បច្ចេកទេស។

ឯកឧត្តមឯកអគ្គរដ្ឋទូតសហភាពអឺរ៉ុប​ មានប្រសាសន៍ថា គម្រោងសម្ព័ន្ធមេត្រីភាព Twinning នេះ គឺជាការបោះជំហានឆ្ពោះទៅមុខយ៉ាងសំខាន់មួយ ដែលបង្ហាញអំពីការប្តេជ្ញាចិត្តរបស់សហភាពអឺរ៉ុបក្នុងការគាំទ្រកំណែទម្រង់វិស័យអប់រំនៅកម្ពុជា តាមរយៈការសហការជាមួយអ្នកជំនាញអឺរ៉ុប និងអ្នកជំនាញក្នុងប្រទេស ដោយផ្តោតលើការរួមបញ្ចូលការរៀននៅក្នុងថ្នាក់ជាមួយនឹងបទពិសោធន៍ជាក់ស្តែង ជាពិសេសក្នុងវិស័យបច្ចេកវិទ្យាថ្មីៗ និងការរីកចម្រើនក្នុងបច្ចេកវិទ្យា​ឌីជីថល ដើម្បីធានាបាននូវឱកាសការងារល្អៗសម្រាប់សិស្សានុសិស្សក្នុងប្រទេសកម្ពុជា។ គម្រោងនេះផ្តោតសំខាន់ទៅលើតម្រូវការរបស់វិស័យឯកជន ជាពិសេសតម្រូវការរបស់ក្រុមហ៊ុនមកពីអឺរ៉ុប ដែលអាចឱ្យក្រុមហ៊ុនទាំងនោះធ្វើការវិនិយោគបន្ថែមទៀតនៅក្នុងប្រទេសកម្ពុជា។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា តាមរយៈកិច្ចសហការនេះ នឹងអនុញ្ញាតឱ្យកម្ពុជាអាចសម្រិតសម្រាំងប្រព័ន្ធអប់រំឱ្យស្របតាមស្តង់ដា នៃការអប់រំបច្ចេកទេសដូចទៅនឹងប្រទេសហ្វាំងឡង់ បារាំង និងអាល្លឺម៉ង់ជាដើម ដែលប្រទេសទាំងនេះមានបទពិសោធន៍ស៊ីជម្រៅលើវិស័យភាពជាដៃគូរវាងរដ្ឋ និងឯកជន។ កិច្ចសហការនេះ នឹងជួយបណ្តុះបណ្តាលសមត្ថភាពរបស់សិស្សានុសិស្ស​កម្ពុជាឱ្យកាន់តែប្រសើរឡើង ដើម្បីអាចឆ្លើយតប និងអាចបំពេញតម្រូវការសម្រាប់ការវិនិយោគបរទេសនៅកម្ពុជាផងដែរ។

ឯកឧត្តមរដ្ឋមន្រ្តីមានប្រសាសន៍បញ្ជាក់ថា ប្រទេសកម្ពុជា គឺជាប្រទេសដំបូងគេបំផុតនៅទ្វីបអាស៊ី ដែលទទួលបានអត្ថប្រយោជន៍ពីគម្រោងសម្ព័ន្ធមេត្រីភាព Twinning នេះ ហើយ​តាមរយៈគម្រោងនេះ មន្ត្រីរាជការកម្ពុជានឹងធ្វើទស្សនកិច្ចសិក្សានៅទ្វីបអឺរ៉ុប ដើម្បីសិក្សាពីបទពិសោធន៍ និងឧត្តមានុវត្តន៍ ពាក់ព័ន្ធនឹងការសិក្សាជំនាញដែលផ្សារភ្ជាប់នឹងការងារ ការធ្វើទំនើបកម្មកម្មវិធីសិក្សា និងការបណ្តុះបណ្តាលគ្រូសម្រាប់ការអប់រំបច្ចេកទេស។

សូមបញ្ជាក់ថា ការអនុវត្តគម្រោង Twinning នឹងចាប់ពីពេលនេះ រហូតដល់ខែសីហា ឆ្នាំ២០២៧ ដែលមានរយៈពេលសរុប៣៦ខែ។ គម្រោងនេះនឹងធ្វើការសាកល្បងលើកំណែទម្រង់ការអប់រំបច្ចេកទេសនៅកម្ពុជា ដោយបំផុសគំនិតតាមរបៀបអឺរ៉ុបនៅតាមវិទ្យាល័យចំណេះទូទៅ និងបច្ចេកទេសចំនួន៥ និងសាកលវិទ្យាល័យចំនួន២ នៅក្នុងប្រទេសកម្ពុជា ដោយរួមបញ្ចូលទាំងការជំរុញឱ្យមានការងារធ្វើ ការលើកកម្ពស់បរិយាបន្ន យេនឌ័រ និងការត្រៀមជំនាញរួចជាស្រេច ដើម្បីឆ្ពោះទៅរកនិរន្តរភាពនៃកំណើនសេដ្ឋកិច្ច។

បច្ចុប្បន្ន​កម្ពុជា​មាន​វិទ្យាល័យ​ចំណេះទូទៅ និងបច្ចេកទេសប្រមាណ៤០ ទាំងរដ្ឋ និង​ឯកជន​​នៅទូទាំងប្រទេស។ វិទ្យាល័យ​ចំណេះទូទៅ និង​បច្ចេកទេស គឺជា​វិទ្យាល័យ​ដែលមាន​ផ្តល់​សេវាផ្នែកអប់រំ​ចំណេះទូទៅ និង​ផ្នែកអប់រំ​បច្ចេកទេស ក្នុងនោះ​សម្រាប់​ផ្នែកអប់រំ​ចំណេះទូទៅ ផ្តល់សេវារៀន និង​បង្រៀន​តាម​កម្មវិធី​សិក្សា​ចំណេះ​ទូទៅ​ចាប់ពីថ្នាក់ទី១០ ដល់ថ្នាក់ទី១២ ហើយផ្នែកអប់រំ​បច្ចេកទេស ផ្តល់សេវា​រៀន និង​បង្រៀន​មុខ​វិជ្ជាចំណេះទូទៅ មុខវិជ្ជា​បច្ចេកទេស​វិជ្ជាជីវៈ មុខវិជ្ជាជម្រើស កម្មសិក្សា និង​ទស្សនកិច្ច​សិក្សា ដោយ​រៀន និង​បង្រៀន​ផ្នែក​ទ្រឹស្តី និង​ប្រតិបត្តិ។ ការផ្តល់សេវាអប់រំ​បច្ចេកទេស​មាន​រយៈពេល ៣ឆ្នាំ គឺឆ្នាំទី១ (ថ្នាក់ទី១០) ឆ្នាំទី២ (ថ្នាក់ទី១១) និង ឆ្នាំទី៣ (ថ្នាក់ទី១២)។ សិស្សដែលបញ្ចប់​ការសិក្សា នឹង​ទទួលបាន​សញ្ញាបត្រ​បច្ចេកទេស និង​វិជ្ជាជីវៈកម្រិត៣ ដែលសមមូលនឹងសញ្ញាបត្រ​មធ្យមសិក្សា​ទុតិយភូមិ​៕