ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – មជ្ឈមណ្ឌលអាស៊ាន-ជប៉ុន (ASEAN Japan Center) ប្រកាសជ្រើសរើសយុវជនអាយុពី១៥-១៨ឆ្នាំ ឱ្យចូលរួមបណ្តាញអ្នកដឹកនាំបរិស្ថានវ័យក្មេងអាស៊ាន-ជប៉ុន ដើម្បីចូលរួមដោះស្រាយបញ្ហាបំពុលដោយប្លាស្ទិកនៅក្នុងតំបន់អាស៊ាន និងប្រទេសជប៉ុន។
បណ្តាញអ្នកដឹកនាំបរិស្ថានវ័យក្មេងអាស៊ាន-ជប៉ុន ឬជាភាសាអង់គ្លេស ASEAN-Japan Young Environmental Leaders Network (AJYELN) គឺជាបណ្ដាញនៃយុវជនឆ្នើមដែលមានឆន្ទៈក្នុងការដោះស្រាយបញ្ហានៃការបំពុលប្លាស្ទិកនៅក្នុងតំបន់អាស៊ាន-ជប៉ុន។ បណ្តាញនេះ ត្រូវបានបង្កើតឡើងដោយមជ្ឈមណ្ឌលអាស៊ាន-ជប៉ុន ក្នុងគោលបំណងគាំទ្រសកម្មភាពច្នៃប្រឌិតនានាដែលដឹកនាំដោយយុវជនដើម្បីដោះស្រាយបញ្ហានៃការបំពុលប្លាស្ទិកនៅក្នុងតំបន់។
លក្ខខណ្ឌដែលអាចក្លាយជាសមាជិកនៃបណ្តាញ AJYELN រួមមាន បេក្ខជន និងបេក្ខនារីជាយុវជន ឬក្រុមដែលមានសមាជិកយ៉ាងច្រើន៤នាក់ មានអាយុចាប់ពី១៥ដល់១៨ឆ្នាំ មានចំណាប់អារម្មណ៍និងឆន្ទៈក្នុងការចូលរួមកម្មវិធី និងបំពេញលក្ខខណ្ឌ ដូចជា ទី១. មានទីលំនៅក្នុងប្រទេសនៃសមាជិកអាស៊ាន ឬជប៉ុន ទី២. ធ្លាប់រៀបចំគម្រោងឬចូលរួមក្នុងសកម្មភាពគាំពារបរិស្ថាននៅសាលារៀនឬក្នុងសហគមន៍ (អាទិភាព) ទី៣. អាចទំនាក់ទំនងជាភាសាអង់គ្លេសបាន និងទី៤. អាចទទួលបានការគាំទ្រពីគ្រូប្រឹក្សាក្នុងអំឡុងពេលអនុវត្តគម្រោង។
បេក្ខជននឹងទទួលបានអត្ថប្រយោជន៍បន្ទាប់ពីក្លាយជាសមាជិកនៃបណ្តាញ AJYELN រួមមាន បេក្ខជន ឬក្រុមដែលទទួលបានជ័យលាភី នឹងទទួលបានប្រាក់ឧបត្ថម្ភចំនួន ១០ម៉ឺនយ៉េន សម្រាប់ការអនុវត្តគម្រោងដែលបានស្នើឡើង ដើម្បីចូលរួមដោះស្រាយបញ្ហានៃការបំពុលប្លាស្ទិកនៅក្នុងសហគមន៍របស់ខ្លួន។ មិនតែប៉ុណ្ណោះ យុវជននឹងមានឱកាសជជែកពិភាក្សាជាមួយអ្នកដឹកនាំវ័យក្មេងប្រចាំតំបន់ដទៃទៀត អមដោយវគ្គបណ្តុះបណ្តាលអំពីភាពជាអ្នកដឹកនាំ និងចំណេះដឹងចាំបាច់ក្នុងការគ្រប់គ្រងគម្រោង ព្រមទាំងការប្រឹក្សាយោបល់ផ្សេងៗនាអំឡុងពេលអនុវត្តគម្រោង។
បេក្ខជនត្រូវបំពេញពាក្យអនឡាញ និងត្រៀមឯកសារចាំបាច់ផ្សេងៗជាភាសាអង់គ្លេសរួមមាន ទី១.ប្រវត្តិរូបសង្ខេប (១០០ ពាក្យ) ស្តីអំពីសកម្មភាពនិងបទពិសោធន៍នានាទាក់ទងនឹងការគាំពារបរិស្ថាន ទី២. មូលហេតុ និងការប្ដេជ្ញាចិត្ត (២៥០ ពាក្យ) ស្តីពីមូលហេតុនៃការដាក់ពាក្យចូលរួម និងការប្ដេជ្ញាចិត្តរបស់ខ្លួនក្នុងការដោះស្រាយបញ្ហាបរិស្ថាន ទី៣. វីដេអូខ្លីមួយនាទី រៀបរាប់អំពីការណែនាំខ្លួន (និងសមាជិកក្រុម) ព្រមទាំងបង្ហាញត្រួសៗអំពីការយល់ឃើញរបស់អ្នកចំពោះបញ្ហាសំណល់ប្លាស្ទិកនៅក្នុងសហគមន៍អ្នក និងដំណោះស្រាយដែលអ្នកបានលើកឡើងនៅក្នុងគម្រោង។ ទី៤. សំណើគម្រោងមួយទំព័រ ដែលសង្ខេបអំពីការរៀបចំគម្រោងដើម្បីដោះស្រាយបញ្ហាសំណល់ប្លាស្ទិកនៅក្នុងសហគមន៍អ្នក (បំពេញតាមបែបបទគម្រូ) និងទី៥. ឈ្មោះរបស់គ្រូប្រឹក្សាយោបល់នៅសាលា។
បេក្ខជន ឬក្រុមដែលមានចំណាប់អារម្មណ៍ចំពោះកម្មវិធីនេះ អាចចុះឈ្មោះតាមរយៈតំណភ្ជាប់ https://forms.gle/i7MhBPYgNLavPvgn6 ។ ផុតកំណត់ដាក់ពាក្យនៅថ្ងៃទី ៣១ ឧសភា ឆ្នាំ២០២៣។ ការប្រកាសលទ្ធផលជ័យលាភី នៅថ្ងៃទី ១៥ ខែមិថុនា ២០២៣។ វគ្គបណ្តុះបណ្តាលអនឡាញ អំពីភាពជាអ្នកដឹកនាំនិងការគ្រប់គ្រងគម្រោង នៅថ្ងៃទី០១ ដល់០៨ ខែកក្កដា ឆ្នាំ២០២៣។ ការអនុវត្តគម្រោង នៅខែកក្កដាដល់ខែធ្នូ ឆ្នាំ២០២៣។ ការធ្វើបទបង្ហាញអំពីសមិទ្ធផលនៃគម្រោងខ្លួននៅក្នុងសន្និសីទអាស៊ាន-ជប៉ុនលើកទី៣ ស្ដីពីការអប់រំបញ្ហាសំណល់ប្លាស្ទិកនៅក្នុងសមុទ្រ (អនឡាញ) នៅថ្ងៃទី ០១ ខែមីនា ឆ្នាំ២០២៤៕
