ភ្លេចៗខ្លួនពេលវេលា នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប កាន់តែខិតជិតមកដល់ដែលទាមទារឱ្យបេក្ខជនបាក់ឌុបខិតខំស្វ័យសិក្សា ពង្រឹងចំណេះដឹង និងត្រៀមខ្លួនឱ្យបានរួចរាល់សម្រាប់ថ្ងៃប្រឡងមកដល់។ ក្នុងអត្ថបទនេះ យុវជន ពី សិរីវឌ្ឍនៈ ជាអតីតសិស្សនិទ្ទេសA ឆ្នាំ២០២៤ នៃវិទ្យាល័យហ៊ុន សែនប៊ុនរ៉ានី វត្តភ្នំ,​ បច្ចុប្បន្នជានិស្សិតឆ្នាំទី១ ជំនាញវិស្វកម្មសុសវែរ នៃវិទ្យាស្ថានបច្ចេកវិទ្យាកម្ពុជា បានមកចែករំលែកគន្លឹះក្នុងការ​ត្រៀមខ្លួន៣ខែមុនប្រឡងបាក់ឌុបដើម្បីទទួលបាននិទ្ទេសល្អ សម្រាប់ប្អូនៗដែលជាបេក្ខជនប្រឡងបាក់ឌុបខាងមុខនេះ។

យុវជន ពី សិរីវឌ្ឍនៈ និយាយថា សម្រាប់ខ្លួនការប្រឡងបាក់ឌុប ពិតជាមានសារៈសំខាន់ខ្លាំង ព្រោះបានជួយវាស់ស្ទង់នូវសមត្ថភាពរបស់ខ្លួនដែលបានចំណាយពេលខិតខំសិក្សារៀនសូត្ររយៈពេល១២ឆ្នាំ។ លើសពីនេះ ការប្រឡងបាក់ឌុប ក៏ជាស្ពានមួយដែលជួយផ្ដល់ជាផ្លូវទៅស្វែងរកអាហារូបករណ៍នានាដែលខ្លួនចង់បាន និងជួយឱ្យអាចជ្រើសរើសជំនាញដែលខ្លួនស្រឡាញ់ពេលចូលរៀននៅសាកលវិទ្យាល័យ។

អតីតសិស្សនិទ្ទេស A ឆ្នាំ២០២៤ រូបនេះ បញ្ជាក់បន្ថែមថា សម្រាប់ការត្រៀមខ្លួន៣ខែមុនប្រឡងបាក់ឌុបឱ្យទទួលបាននិទ្ទេសល្អ គឺ ទី១. ត្រូវរក្សាសុខភាពឱ្យបានល្អ ព្រោះសុខភាព ជាកត្តាសំខាន់សម្រាប់បេក្ខជនបាក់ឌុប បើកាលណាគាត់មានសុខភាពល្អ ទទួលទានអាហារបានគ្រប់គ្រាន់ អាចទ្រទ្រង់សារពាងកាយបាន មិនងាយឈឺ គេងបានគ្រប់គ្រាន់ នោះខួរក្បាលក៏ដំណើរការបានល្អ, ទី២. មានទំនួលខុសត្រូវ ដោយចំណាយពេលឱ្យច្រើនខិតខំរៀនសូត្រនៅផ្ទះដោយខ្លួនឯង ខិតខំរៀនមេរៀនដែលគ្រូបានដាក់ឱ្យ រំលឹកមេរៀនដែលបានរៀនរួច ដើម្បីបណ្ដុះគំនិតឱ្យកាន់តែខ្លាំងជាងមុន និងទី៣. គួរចេះមេរៀនគ្រប់មុខវិជ្ជា ហើយត្រូវចំណាយពេលធ្វើលំហាត់ឱ្យបានច្រើន ខិតខំស្រាវជ្រាវ ស្វែងរកអ្វីដែលថ្មីៗទាក់ទងនឹងវិញ្ញាសាប្រឡងបាក់ឌុប ដើម្បីជួយពង្រឹងសមត្ថភាពរបស់គាត់ឱ្យបានខ្លាំង។

តាមរយៈបទពិសោធន៍ យុវជន ពី សិរីវឌ្ឍនៈ ក៏បានប្រាប់ពីគន្លឹះរៀនដែលមានប្រសិទ្ធភាព រួមមាន ទី១. រៀនសង្ខេបមេរៀនដោយខ្លួនឯង គឺវាជួយយើងងាយស្រួលរំលឹកមេរៀនដែលធ្លាប់រៀនហើយ និងចាប់បានឱ្យកាន់តែច្បាស់នូវមេរៀនទាំងអស់នោះ ហើយក៏ជាស្ពានមួយអាចជួយឱ្យធ្វើលំហាត់បាន, ទី២. ខិតខំធ្វើលំហាត់ លោកគ្រូ អ្នកគ្រូទាំងអស់ សុទ្ធតែគន្លឹះ និងសមត្ថភាពក្នុងការបង្រៀនសិស្ស អាចដឹងពីលំហាត់ប្រភេទណាអាចចេញពេលប្រឡងបាក់ឌុប ដូច្នេះ សិស្សានុសិស្សទាំងអស់គួរតែផ្ដោតទៅលើការធ្វើលំហាត់ដែលលោកគ្រូ អ្នកគ្រូដាក់ជូនឱ្យបានច្រើន។ លើសពីនេះ អាចស្រាវជ្រាវលំហាត់ដែលមាននៅតាមអ៊ីនធឺណិតយកមកធ្វើបន្ថែមទៀត ដើម្បីពង្រឹងសមត្ថភាពឱ្យកាន់តែខ្លាំងពីមួយកម្រិតទៅមួយកម្រិតទៀត។

ទី៣. ការបង្កើតក្លិបសិក្សា មួយក្រុមមានសមាជិក​ ៤ទៅ៥នាក់ នៅពេលសិក្សាជាក្រុមយើងអាចផ្ដុំគំនិតគ្នាបានច្រើន អាចវិភាគរកចម្លើយមួយដែលត្រឹមត្រូវបានច្បាស់លាស់ល្អ ព្រមទាំងផ្ដល់បរិយាកាសរីករាយ ជាជាងយើងអង្គុយនៅក្នុងបន្ទប់ម្នាក់ឯងធ្វើលំហាត់ និងទី៤. ការហ៊ានសួរលោកគ្រូ អ្នកគ្រូ លើចំណុចដែលខ្លួនមិនចេះ ដើម្បីយល់កាន់តែច្បាស់បន្ថែមទៀត។

អតីតសិស្សនិទ្ទេស A រូបនេះ ក៏បានលើកទឹកចិត្តដល់បេក្ខជនត្រៀមប្រឡងបាក់ឌុប សូមរក្សាទឹកចិត្តកុំឱ្យភ័យ កុំស្លន់ស្លោ ទោះមិនចេះមេរៀនទាំងអស់ក៏ដោយ គឺត្រូវខិតខំប្រឹងប្រែងរៀនបន្ថែមទៀត ហើយពេលប្រឡងសូមបញ្ចេញសមត្ថភាពដែលបានចំណាយពេលខិតខំសិក្សាអស់១២ឆ្នាំ តាមអ្វីដែលអាចធ្វើបាន។ ជាមួយគ្នា សិរីវឌ្ឍនៈ ក៏សូមជូនពរឱ្យបេក្ខជនបាក់ឌុបទាំងអស់អាចយកបាននិទ្ទេសដែលគាត់ចង់បាន នៅពេលប្រឡងបាក់ឌុបខាងមុខនេះ៕