ក្នុងបរិបទសង្គមបច្ចុប្បន្ន ជំនាញដែលមានតម្រូវការក្នុងទីផ្សារការងារ កំពុងផ្លាស់ប្ដូរយ៉ាងឆាប់រហ័ស។ នៅឆ្នាំ២០២៧ អាជីវកម្មជាច្រើនត្រូវព្យាករណ៍ថា ស្ទើរតែពាក់កណ្ដាល (៤៤%) នៃជំនាញស្នូលរបស់បុគ្គលិក នឹងត្រូវប្រឈមនឹងការរំខាន ឬជំនួសដោយ​ AI, នេះបើយោងតាមការស្រាវជ្រាវ របស់វេទិកាសេដ្ឋកិច្ចពិភពលោក។

ប្រភពចម្បងដែលនាំឱ្យមានបម្រែបម្រួលជំនាញក្នុងទីផ្សារការងារ គឺភាពជឿនលឿននៃបច្ចេកវិទ្យា ដែលកំពុងជំរុញឱ្យនិយោជក និងនិយោជិតគិតឡើងវិញអំពីតម្រូវការជំនាញ ដើម្បីប្រកួតប្រជែងក្នុងវិស័យធុរកិច្ច។ ជាក់ស្ដែង ៤២ភាគរយ នៃកិច្ចការសំខាន់ៗក្នុងអាជីវកម្ម ត្រូវបានគេរំពឹងថា នឹងដំណើរការដោយស្វ័យប្រវត្តិនៅឆ្នាំ២០២៧។

ប៉ុន្តែតើបញ្ញាសិប្បនិម្មិត (AI) មានការរីកចម្រើនលឿនប៉ុណ្ណា? ហើយកម្មករ និងស្ថាប័ន ត្រូវធ្វើអ្វីខ្លះ ដើម្បីអាចឈរជើងក្នុងការប្រកួតប្រជែងនាពេលអនាគត។

នៅក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក នៃក្រុមប្រឹក្សាអនាគតពិភពលោក នាទីក្រុងឌូបៃ អ្នកជំនាញ​ បានពិភាក្សាអំពីរបៀបរៀបចំ អ្នកជំនាញ និងធនធានមនុស្ស សម្រាប់សេដ្ឋកិច្ចនាពេលអនាគត។

ក្នុងកិច្ចពិភាក្សាតុមូល ដែលក្នុងនោះមាន លោក Nela Richardson ប្រធាន​សេដ្ឋវិទូ និង​បរិស្ថាន សង្គម និង​អភិបាលកិច្ច ADP, លោក Stuart Russel សាស្ត្រាចារ្យវិទ្យាសាស្ត្រកុំព្យូទ័រ នៃសាកលវិទ្យាល័យ កាលីហ្វ័រញ៉ា, លោកស្រី Jo O’Driscoll-Kearney, ប្រធានផ្នែកសិក្សា, Majid Al Futtaim Holding និងលោក Abdallah Abu-Sheikh ស្ថាបនិក និងជានាយកប្រតិបត្តិ Astra Tech។

តាមរយៈកិច្ចពិភាក្សានេះ បានរំលេចឱ្យឃើញនូវចំណុចសំខាន់ចំនួន ៣ ដែលមនុស្សអាចរៀនពីបញ្ញាសិប្បនិម្មិត (AI) និងជំនាញក្នុងការប្រើប្រាស់ជំនាញនេះ ពីអ្នកជំនាញ។

១. AI នឹងបង្កើតការងារ លុបបំបាត់ការងារ និងពង្រឹងទីផ្សារការងារ

បញ្ញាសិប្បនិម្មិត (AI) នឹងធ្វើឱ្យបុគ្គលិក ដែលចេះប្រើបច្ចេកវិទ្យានេះ ចំណេញពេលបានច្រើន និងកាត់បន្ថយភាពឯកា ក្នុងការបំពេញការងារប្រចាំថ្ងៃ ដោយលោក Abu-Sheikh បានលើកឡើងថា «បច្ចេកវិទ្យានេះ នឹងជំនួសមនុស្សក្នុងការបំពេញការងារដដែលៗ និងផ្ដល់ឱ្យមនុស្សនូវពេលវេលាច្រើនជាងមុន ដើម្បីធ្វើការងារបែបយុទ្ធសាស្ត្រ និងទាមទារការច្នៃប្រឌិតខ្ពស់។»

លោកស្រី O’Driscoll-Kearney បានបន្ថែមលើចំណុចនេះថា «បច្ចេកវិទ្យានេះ នឹងធ្វើឱ្យចំណេះដឹងមនុស្សកាន់តែមានភាពប្រសើរឡើង ប៉ុន្តែភាពប្រសើរឡើងនេះ កើតឡើងបាន អាស្រ័យលើបុគ្គលិក និងនិយោជក ដែលបន្តអភិវឌ្ឍសមត្ថភាពប្រើប្រាស់ AI និងពង្រឹងជំនាញរបស់ខ្លួនជាប្រចាំ។ តាមពិតទៅ AI មិនដណ្ដើមការងារមនុស្សទេ ប៉ុន្តែ AI នឹងជំនួសការងារ អ្នកដែលមិនដឹងពីរបៀបប្រើវា។»

អ្នកជំនាញបានសង្កត់ធ្ងន់ថា ដើម្បីទាញប្រយោជន៍ពីបច្ចេកវិទ្យា AI បាន បុគ្គលិក និងនិយោជក ត្រូវតែពង្រឹងជំនាញ និងរៀនជំនាញថ្មីជាប្រចាំ។ លោក Richardson បានលើកឡើងថា «ខ្ញុំគិតថាអ្វីដែល AI ធ្វើ រឿងដំបូង និងសំខាន់បំផុតគឺ ការផ្លាស់ប្ដូររបៀបដែលក្រុមហ៊ុន មើលពីទេពកោសល្យបុគ្គលិករបស់ខ្លួន ហើយសង្ឃឹមថាអាចជួយបុគ្គលិករបស់ខ្លួន ក្នុងការពង្រឹងសមត្ថភាពប្រើប្រាស់បច្ចេកវិទ្យានេះ។»

២. បុគ្គលិកថ្ងៃអនាគត ត្រូវតែចេះជំនាញទន់

ក្នុងកិច្ចពិភាក្សា អ្នកជំនាញបានគូសបញ្ជាក់ពីសារៈសំខាន់នៃជំនាញទន់ ខណៈជំនាញនេះ ជាជំនាញសំខាន់ ដែលមនុស្សត្រូវតែមានក្នុងសម័យកាលបច្ចេកវិទ្យា AI ។ ការលើកឡើងនេះ ស្របតាមរបាយការណ៍អនាគតទីផ្សារការងារ របស់វេទិកាសេដ្ឋកិច្ចពិភពលោក ក្នុងឆ្នាំ ២០២៣ ដែលបានរកឃើញថា ជំនាញចំនួន ៧ ក្នុងចំណោមជំនាញកំពូលទាំង ១០ ដែលកំពុងកើនឡើងពីឆ្នាំ ២០២៣ ដល់ឆ្នាំ ២០២៧ គឺជាជំនាញទន់។

ជំនាញទាំងនោះ មានដូចជា ជំនាញគិតប្រកបដោយភាពច្នៃប្រឌិត, ការគិតបែបវិភាគ, អក្ខរកម្មបច្ចេកវិទ្យា, ការសិក្សាពេញមួយជីវិត, ការគិតបែបប្រព័ន្ធ (System thinking), ភាពធន់ បត់បែន និងភាពរហ័សរហួន, សមត្ថភាពលើកទឹកចិត្ត និងស្គាល់ពីខ្លួនឯងច្បាស់, ការប្រើប្រាស់បញ្ញាសិប្បនិម្មិត (AI) និងទិន្នន័យធំ, ការគ្រប់គ្រងធនធានមនុស្ស និងការតម្រង់ទិសសេវាកម្ម និងការផ្ដល់សេវាសម្រាប់អតិថិជន។

៣. ការអប់រំត្រូវតែឆ្លើយតបទៅនឹងការអភិវឌ្ឍដ៏ឆាប់រហ័សរបស់ AI

លោក Abu-Sheikh បានលើកឡើងថា ការអភិវឌ្ឍនៃបច្ចេកវិទ្យាកំពុងតែបង្កើតឧបសគ្គ សម្រាប់ការអប់រំ។ លោកបន្តថា «បច្ចេកវិទ្យាកាន់តែប្រសើរ ការអប់រំផ្លូវការកាន់តែអាក្រក់ទៅៗ ដោយសារបច្ចេកវិទ្យាកាន់តែប្រសើរឡើង ហើយគ្រឹះស្ថានអប់រំផ្លូវការ តែងតែមានភាពយឺតយ៉ាវក្នុងការបោះជំហានឱ្យទាន់បច្ចេកវិទ្យាជានិច្ច។»

លោក Russell បានយល់ស្របនឹងការលើកឡើងនេះ និងបានបន្ថែមថា វាក៏ជាបញ្ហាប្រឈមសម្រាប់ស្ថាប័នអប់រំនានា ក្នុងការផ្ដល់នូវខ្លឹមសារអប់រំ ក្នុងទម្រង់ដែលផ្ដល់អត្ថប្រយោជន៍ច្រើន ខណៈបញ្ហានៃការប្រើប្រាស់ AI ដោយសិស្ស នៅតែជាបញ្ហាប្រឈមមួយ ដែលទាមទារឱ្យមានច្បាប់មួយ ដែលអាចជួយឱ្យសិស្សអាចត្រៀមខ្លួន សម្រាប់ការចូលទៅក្នុងទីផ្សារការងារនាពេលអនាគត។

លោក Russell បន្ថែមថា AI ផ្ដល់អត្ថប្រយោជន៍ជាច្រើន សម្រាប់ប្រទេសក្រីក្រ តាមរយៈការសិក្សាស្វ័យប្រវត្តិ។ យ៉ាងណាក៏ដោយ មុននឹងឈានដល់ការប្រើប្រាស់បញ្ញាសិប្បនិម្មិត (AI) ក្នុងប្រព័ន្ធអប់រំ សិស្សចាំបាច់ត្រូវមានសមត្ថភាពគិតបែបត្រិះរិះ ខណៈរបៀបសិក្សាថ្មីនេះ ក៏ចូលរួមកាត់បន្ថយតម្លៃក្នុងការសិក្សាផងដែរ៕