យោងតាម WE Forum បានឱ្យដឹងថា មនុស្សភាគច្រើន ពេញចិត្តនឹងសម្រស់របស់ផ្កា និងរុក្ខជាតិ ហើយក៏ដឹងច្បាស់ថា ការធ្វើរស្មីសំយោគមានសារៈសំខាន់សម្រាប់ជីវិត។ ប៉ុន្តែរឿងដែលពិសេសជាងនេះ គឺ ផ្លូវចិត្ត និងរាងកាយរបស់មនុស្សមានទំនាក់ទំនងយ៉ាងស៊ីជម្រៅទៅនឹងរុក្ខជាតិលើសពីអ្វីដែលរំពឹងទុកទៅទៀត។ បើតាមភ័ស្តុតាងវិទ្យាសាស្ត្រ បានបង្ហាញថា រុក្ខជាតិដើរតួនាទីជាមូលដ្ឋានគ្រឹះក្នុងការធ្វើឱ្យសុខភាពផ្លូវចិត្តប្រសើរឡើង និងអាចកាត់បន្ថយហានិភ័យ នៃជំងឺផ្លូវចិត្ត និងផ្លូវកាយដែលកំពុងតែកើនឡើង។ ពួកវាអាចកាត់បន្ថយរោគសញ្ញា នៃជំងឺបាក់ទឹកចិត្ត ថប់បារម្ភ និងអារម្មណ៍មិនល្អ តាមរយៈការកាត់បន្ថយកម្រិតនៃអរម៉ូនស្ត្រេស (Cortisol) ដែលអាចបន្ថយចង្វាក់បេះដូង និងធ្វើឱ្យអារម្មណ៍ល្អ។

ការសិក្សាជាច្រើនបានបង្ហាញថា ការចំណាយពេលនៅជាមួយរក្ខជាតិ ឬដាំដំណាំ អាចជួយមនុស្សឱ្យគ្រប់គ្រងរោគសញ្ញាស្ត្រេសក្រោយប៉ះទង្គិតផ្លូវចិត្ត (PTSD) និងជួយឱ្យគុណភាពជីវិតប្រសើរឡើង។ រុក្ខជាតិថែមទាំងអាចបង្កើនភាពច្នៃប្រឌិតរបស់អ្នក តាមរយៈការជំរុញឱ្យខួរក្បាលរស់រវើកជាងមុន។

សូម្បីតែការដាក់ផើងផ្កាតូចៗនៅលើតុការងារក៏អាចមានឥទ្ធិពលខ្លាំងលើអ្នក ជាងអ្វីដែលអ្នកគិតដែរ។ លើសពីនេះ រុក្ខជាតិក្នុងផ្ទះ ដែលអ្នកតុបតែងលម្អផ្ទះ ឬកន្លែងធ្វើការ ក៏អាចជួយឱ្យការគិតរបស់អ្នកមានភាពច្បាស់លាស់ជាងមុនផងដែរ។ ការសិក្សាបានបង្ហាញថា ការដាំ ឬតុបតែងរុក្ខជាតិ នៅជុំវិញខ្លួន អាចបង្កើនការផ្ដោតអារម្មណ៍របស់អ្នករហូតដល់ ២០ភាគរយ និងពង្រឹងសមត្ថភាពរំលឹកព័ត៌មានពី ១៥ ទៅ ២០ភាគរយ ដោយសារការកាត់បន្ថយកំហាប់កាបូនឌីអុកស៊ីត (CO₂) និងកែលម្អគុណភាពខ្យល់។

យោងតាមគោលការណ៍ណែនាំស្តីពីសុខភាព និងសុវត្ថិភាពរបស់ចក្រភពអង់គ្លេស (HSE) បង្ហាញថា ដើម្បីផ្ដោតអារម្មណ៍បានល្អ កំហាប់កាបូនឌីអុកស៊ីតក្នុងការិយាល័យមិនគួរលើសពី ១,០០០ ppm នោះទេ ព្រោះកម្រិតលើសនេះ អាចបណ្ដាលឱ្យឈឺក្បាល អស់កម្លាំង និងវិលមុខ នាំឱ្យពិបាកសម្រេចចិត្ត។

ធនាគារពិភពលោកបានប៉ាន់ប្រមាណថានៅឆ្នាំ ២០៥០ មនុស្ស ៧នាក់ក្នុងចំណោម ១០នាក់នឹងរស់នៅក្នុងទីក្រុង ហើយការកាត់ផ្ដាច់ការរស់នៅពីបរិស្ថានធម្មជាតិ នឹងកើនឡើង ដោយមនុស្សភាគច្រើនជ្រើសរើសការរស់នៅតាមរយៈការភ្ជាប់ជីវិតជាមួយបច្ចេកវិទ្យា និងប្រកបមុខរបរប្រចាំថ្ងៃ ជាជាងជាមួយធម្មជាតិ។ ប៉ុន្តែរុក្ខជាតិនៅមានសារៈសំខាន់ ជាពិសេសការលើកកម្ពស់សុខភាពផ្លូវចិត្ត និងការចងចាំរបស់មនុស្ស៕