ចាប់តាំងពីផ្ទុះវីរុសរាតត្បាតកូវីត-១៩ មក ការសម្ភាសន៍បុគ្គលិកដែលធ្វើឡើងតាមប្រព័ន្ធអនឡាញកំពុងកើនឡើងជាលំដាប់ ទាំងនៅប្រទេសជឿនលឿន និងកំពុងអភិវឌ្ឍ ដោយហេតុថា វិធីសាស្ត្រនេះ ចំណេញពេលវេលា និងផ្ដល់ភាពងាយស្រួលទាំងបេក្ខជន និងអ្នកជ្រើសរើសបុគ្គលិក។

ដំណើរវិវត្តន៍នេះ បាននាំមកនូវបទពិសោធថ្មីសម្រាប់អ្នកស្វែងរកការងារ ដែលអាចនឹងត្រូវសម្ភាសន៍ដោយបញ្ញាសប្បនិម្មិត(AI) ជំនួយឱ្យមនុស្ស។ រូបភាពនេះអាចផ្ដល់ទាំងគុណសម្បត្តិ និងផលវិបាកសម្រាប់មនុស្សសម័យថ្មី។ ជាក់ស្ដែង យុវជនក្មេងៗដែលកំពុងស្វែងរកការងារលើកដំបូង ឬទីកន្លែងហាត់ការ ទំនងជាប្រឈមមុខនឹងភាពតានតឹងជាងមុនក្នុងពេលសម្ភាសន៍ ព្រោះកិច្ចសម្ភាសន៍របស់គេត្រូវធ្វើឡើងជាមួយរ៉ូបូត(Robot)ជំនួសឱ្យមនុស្ស។

ក្នុងករណីសម្ភាសន៍ដោយវីដេអូស្វ័យប្រវត្តិ (Automated video interviews) រ៉ូបូត(Robot)នឹងសួរសំណួរមួយចំនួន ដែលមានការកំណត់ពេលវេលាជាក់លាក់សម្រាប់បេក្ខជនឆ្លើយ។ ក្រោយសម្ភាសន៍រួចរាល់ វានឹងធ្វើការសម្រេចថា តើបេក្ខភាពរូបណាដែលស័ក្តិសមនឹងតួនាទីដែលស្ថាប័នជ្រើសរើស។ ក្នុងដំណើរការសម្ភាសន៍ រ៉ូបូត(Robot)ក៏មានសមត្ថភាពសង្កេតពីគំនិត អារម្មណ៍ មតិយោបល់ ស្មារតី និងភាពជឿជាក់របស់បេក្ខជនផងដែរ។

ស្វែងយល់ពីប្រភេទនៃការសម្ភាសន៍

វត្តមានបច្ចេកវិទ្យាបញ្ញាសប្បនិម្មិត (AI) បានផ្ដល់នូវរបៀបជ្រើសរើសបុគ្គលិកកាន់តែសម្បូរបែបសម្រាប់ស្ថាប័ននីមួយៗ ។ លើសពីនេះ រឿងសំខាន់មួយដែលយើងត្រូវដឹង គឺមិនមែនរាល់ការសម្ភាសន៍តាមវីដេអូសុទ្ធតែត្រូវធ្វើដោយប្រើបច្ចេកវិទ្យាបញ្ញាសប្បនិម្មិត (AI) នោះទេ។ មានការសម្ភាសន៍ខ្លះគ្រាន់តែជាការថតវីដេអូប៉ុណ្ណោះ បន្ទាប់មកវានឹងត្រូវពិនិត្យមើលឡើងវិញដោយអ្នកជ្រើសរើសបុគ្គលិក។ ចំណែកការសម្ភាសន៍ខ្លះទៀត មានការចូលរួមពីបច្ចេកវិទ្យាបញ្ញាសប្បនម្មិត (AI) ប្រមូលទិន្នន័យរបស់បេក្ខជននៅអំឡុងពេលសម្ភាសន៍។

យោងតាមគេហទំព័រ Harvard Business review ខាងក្រោមនេះជារបៀបសម្ភាសន៍បុគ្គលិក ៥ប្រភេទក្នុងសម័យទំនើប ចាប់ផ្ដើមពីកិច្ចសម្ភាសន៍ទល់មុខ ទៅដល់កិច្ចសម្ភាសន៍ដែលធ្វើឡើងដោយបញ្ញាសប្បនិម្មិត(AI)៖

១. ការសម្ភាសន៍ទល់មុខ៖ ជាការសម្ភាសន៍ដោយផ្ទាល់រវាងបេក្ខជន និងក្រុមការងារជ្រើសរើសបុគ្គលិក។

២. ការសម្ភាសន៍តាមវីដេអូ ៖ ជាការសម្ភាសន៍ពីចម្ងាយដោយភ្ជាប់ទំនាក់ទំនងតាមវីដេអូ រវាងបេក្ខជន និងក្រុមការងារជ្រើសរើសបុគ្គលិក ប៉ុន្តែមិនមានការចូលរួមពីបញ្ញាសប្បនិម្មិតនោះទេ។

៣. ការសម្ភាសន៍ដោយវីដេអូស្វ័យប្រវត្តិ(AVI)៖ ជាការសម្ភាសន៍តាមវីដេអូ ដែលបេក្ខជន និងក្រុមការងារជ្រើសរើសបុគ្គលិក អាចនៅកន្លែងដូចគ្នា ឬពីចម្ងាយក៏បាន។ របៀបសម្ភាសន៍នេះ មានការចូលរួមសម្របសម្រួលពីបញ្ញាសប្បនិម្មិតដូចជា កំណត់ម៉ោង និងផ្ដល់សំណួរជាដើម ប៉ុន្តែមិនចូលរួមក្នុងការសម្រេចចិត្តជ្រើសរើសបុគ្គលិកនោះទេ។

៤. ការសម្ភាសន៍ដោយវីដេអូស្វ័យប្រវត្តិ(AVI) ជំនួយពីបញ្ញាសប្បនិម្មិត (AI-assisted)៖ ជាការសម្ភាសន៍តាមវីដេអូ ដែលបេក្ខជន និងក្រុមការងារជ្រើសរើសបុគ្គលិក អាចនៅកន្លែងដូចគ្នា ឬពីចម្ងាយក៏បាន។ ទន្ទឹមនឹងនេះ បច្ចេកវិទ្យាបញ្ញាសប្បនិម្មិត(AI)ត្រូវបានប្រើ ដើម្បីជាជំនួយដល់ការសម្រេចចិត្តរបស់អ្នករើសបុគ្គលិក ដោយផ្អែកលើមុខងារបកស្រាយពិសេសៗដូចជា ការវិភាគទឹកមុខ កាយវិការ ការលើកដាក់សំឡេង និងការប្រើប្រាស់ពាក្យពេចន៍ជាដើម។

៥. ការសម្ភាសន៍ដោយវីដេអូស្វ័យប្រវត្តិ(AVI) ដែលធ្វើដោយបញ្ញាសប្បនិម្មិត (AI-led)៖ ធ្វើឡើងដោយនៅលើវីដេអូដែលថតទុកដោយស្វ័យប្រវត្តិ។ បេក្ខជន និង ស្គ្រីន អាចនៅកន្លែងដូចគ្នា ឬពីចម្ងាយក៏បាន។ លើសពីនេះ បច្ចេកវិទ្យាគឺជាអ្នកវិភាគ និងសម្រេចចិត្តជ្រើសរើសបុគ្គលិក ដោយមិនចាំបាច់មានការចូលរួមពីមនុស្សនោះទេ។

គួរបញ្ជាក់ផងដែរថា សម្រាប់បេក្ខជនដែលកំពុងស្វែងរកការងារ ការដឹងពីប្រភេទនៃការសម្ភាសន៍ទៅតាមប្រភេទនីមួយជាមុន នឹងធ្វើឱ្យការត្រៀមខ្លួនរបស់គេបានកាន់តែប្រសើរ ព្រមទាំងមានភាគរយខ្ពស់ក្នុងការទទួលបានលទ្ធផលល្អពីការសម្ភាសន៍។ លើសពីនេះ មិនថាអ្នកស្ថិតក្នុងការសម្ភាសន៍ប្រភេទមួយណានោះទេ ការសម្ដែងចេញ (ទឹកមុខ កែវភ្នែក និងឥរិយាបថ) ពាក្យសម្ដី (វាក្យស័ព្ទ និងពាក្យគន្លឹះសំខាន់ៗ) និងការលើកដាក់សំឡេង តែងត្រូវបានគេសង្កេតជាប្រចាំ។ ក្នុងករណីការសម្ភាសន៍ដែលធ្វើឡើងដោយបញ្ញាសប្បនិម្មិត (AI-led) ទិន្នន័យទាំង ៣នេះ ក៏ត្រូវបានប្រើផងដែរ ដើម្បីវិភាគមើលថា តើបេក្ខជនរូបណាដែលស័ក្តិសមបំផុតសម្រាប់តួនាទីដែលវាកំពុងត្រូវការ៕