ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំឥណ្ឌា បានប្រកាសថា បញ្ញាសិប្បនិម្មិត (AI) នឹងក្លាយជាផ្នែកមួយ ក្នុងកម្មវិធីសិក្សារបស់សិស្ស ចាប់ពីថ្នាក់ទី៣ឡើងទៅ នៅឆ្នាំសិក្សា២០២៦ ខាងមុខ, នេះបើយោងតាម Hindustan Times។
ហេតុផលនៅពីក្រោយ ការដាក់ដំណើរការបច្ចេកវិទ្យាបញ្ញាសិប្បនិម្មិត (AI) ចាប់ពីថ្នាក់ទី៣ គឺ ដើម្បីជួយឱ្យកុមារយល់ដឹងអំពីបច្ចេកវិទ្យា AI និងរបៀបប្រើប្រាស់ក្នុងជីវិតប្រចាំថ្ងៃ ប្រកបដោយទំនួលខុសត្រូវ ភាពត្រឹមត្រូវ និងក្រមសីលធម៌។
យោងតាមក្រសួងអប់រំឥណ្ឌា ការរៀបចំសម្ភារៈ ធនធាន សៀវភៅណែនាំ និងធនធានឌីជីថល នឹងត្រូវបញ្ចប់នៅខែធ្នូ ឆ្នាំ ២០២៥នេះ។
ក្រសួងបានប្រកាសនៅក្នុងសេចក្ដីថ្លែងការណ៍មួយថា បញ្ញាសិប្បនិម្មិត និងបច្ចេកវិទ្យាព័ត៌មាន នឹងពង្រឹងគោលគំនិតនៃការរៀនសូត្រ ការគិត និងការបង្រៀន ហើយនឹងពង្រីកបន្តិចម្ដងៗ ដើម្បីឆ្ពោះទៅរកគោលគំនិត ប្រើ AI សម្រាប់ផលប្រយោជន៍សាធារណៈ។ ខណៈនេះ គឺជាជំហានដំបូង ប៉ុន្តែវាមានសារៈសំខាន់ សម្រាប់ការឆ្ពោះទៅរកការប្រើប្រាស់ AI ប្រកបដោយក្រមសីលធម៌ ដើម្បីដោះស្រាយបញ្ហាប្រឈមស្មុគស្មាញនានា ដែលកើតឡើង ដោយសារការមិនយល់ដឹងអំពីរបៀបប្រើប្រាស់ដ៏ត្រឹមត្រូវ។
គំនិតផ្ដួចផ្ដើមនេះ កើតឡើងចំពេលមានការព្រួយបារម្ភកាន់តែខ្លាំងឡើង អំពីការប្រើប្រាស់ chatbot AI មិនត្រឹមត្រូវរបស់កុមារ។ OpenAI ជាក្រុមហ៊ុនបង្កើត ChatGPT នោះ បច្ចុប្បន្នកំពុងប្រឈមមុខនឹងបណ្ដឹងទាមទារសំណងជំងឺចិត្ត ដែលដាក់ដោយឪពុកម្ដាយរបស់ក្មេងអាយុ ១៦ឆ្នាំម្នាក់ មកពីរដ្ឋកាលលីហ្វ័រញ៉ា ដែលបានស្លាប់ ដោយការធ្វើអត្តឃាតកាលពីខែមេសា ឆ្នាំ២០២៥ កន្លងទៅ។
នៅក្នុងពាក្យបណ្ដឹងនោះ បានចោទប្រកាន់ថា Chatbot នេះ បានផ្ដល់យោបល់ឱ្យក្មេងជំទង់នោះធ្វើអត្តឃាត។ ជាការឆ្លើយតប OpenAI បានប្រកាសពីសំណុំនៃលក្ខណៈពិសេសសុវត្ថិភាព និងការត្រួតពិនិត្យថ្មី ដែលផ្ដោតជាពិសេស លើអ្នកប្រើប្រាស់វ័យជំទង់ និងអ្នកប្រើប្រាស់ ដែលកំពុងប្រឈមនឹងភាពតានតឹង។
មន្ត្រី នាយករដ្ឋានអប់រំសាលារៀន និងអក្ខរកម្ម (DoSEL) នៃក្រសួងអប់រំឥណ្ឌា បាននិយាយថា «បច្ចេកវិទ្យាមិនអាចបញ្ឈប់ការវិវត្តបាននោះទេ ប៉ុន្តែយើងនឹងរៀបចំកម្មវិធីសិក្សា ដែលបញ្ចូលក្រមសីលធម៌ នៃការប្រើ AI។»
គ្រូបង្រៀន ក្នុងប្រទេសឥណ្ឌា បានបង្ហាញការស្វាគមន៍ចំពោះ ការផ្លាស់ប្ដូរនេះ ប៉ុន្តែបានសង្កត់ធ្ងន់ថា គួរតែមានការបណ្ដុះបណ្ដាលគ្រូបង្រៀន អំពីការប្រើប្រាស់ AI ក្នុងថ្នាក់រៀនបន្ថែមទៀត។
លោកស្រី Jyoti Arora នាយិកាសាលារៀន Mount Abu ដែលជាស្ថាប័នអប់រំរដ្ឋមួយកន្លែង ក្នុងទីក្រុង Delhi មានប្រសាសន៍ថា «គ្រូបង្រៀនត្រូវការ ការបណ្ដុះបណ្ដាលត្រឹមត្រូវ និងគោលការណ៍ណែនាំច្បាស់លាស់ អំពី AI មុនពេលបង្រៀនវាបន្តទៅកាន់សិស្សនៅក្នុងថ្នាក់រៀន។ ការយល់ដឹងអំពីរបៀបប្រើប្រាស់ AI ដោយភាពត្រឹមត្រូវ និងសុវត្ថិភាព ពិតជាមានសារៈសំខាន់ណាស់ សម្រាប់គ្រូបង្រៀនគ្រប់រូប។»
បើតាមក្រសួងអប់រំឥណ្ឌា ការបណ្ដុះបណ្ដាលគ្រូបង្រៀន សម្ភារៈសិក្សា និងធនធានសិក្សា ដែលមានមូលដ្ឋានលើវិដេអូ នឹងក្លាយជាឆ្នឹងខ្នងនៃការអនុវត្តកម្មវិធីសិក្សា៕
