រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្ត​ដល់សិស្សទាំងឡាយដែលកំពុង​ទទួលបានឱកាសរៀនជំនាញបច្ចេកទេស​ និង​វិជ្ជាជីវៈ (TVET) គួរ​តែមានមោទនភាពចំពោះខ្លួនឯង ដោយហេតុថា ពួកគេជាកាតាលីករដ៏សំខាន់ក្នុងការអភិវឌ្ឍសង្គមជាតិ និងទ្រទ្រង់គ្រួសារដោយមិនប្រើប្រាស់ពេលវេលាយូរ។

ក្នុងពិធី បិទវគ្គបណ្តុះបណ្តាលជំនាញបច្ចេកទេស និងវិជ្ជាជីវៈរបស់សិក្ខាកាម សិស្ស និស្សិត នៃវិទ្យាស្ថាន ប៉េ អេស អឺ កាលពីដើមសប្តាហ៍នេះ ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ក្នុងនាមជាសិស្សម្នាក់ អ្នកទាំងអស់គ្នាត្រូវតែមានមោទនភាពចំពោះខ្លួនឯង រួមទាំងវិទ្យាស្ថានដែលខ្លួនបានរៀន និងត្រូវតែមានមោទនភាពចំពោះ TVET ដែលជាកន្លែងផ្តល់នូវជំនាញ ឱកាសការងារ ឯករាជ្យភាព ថែមទាំងមិនចាំបាច់ទម្លាក់បន្ទុកទៅកាន់គ្រួសារទៀតនោះទេ។

ប្អូនៗ ក្មួយៗ មិនត្រូវរុញរាក្នុងចិត្ត ឬក៏ខ្លាចរអានឹងប្រាប់គេថាខ្ញុំរៀនសាលាPSE ឬខ្ញុំរៀនសញ្ញាបត្រ បណ្តុះបណ្តាលបច្ចកទេសវិជ្ជាជីវៈ ឬខ្ញុំសញ្ញាបត្របច្ចកទេសជានខ្ពស់ ឬមួយខ្ញុំបានបរិញ្ញាបត្រប៉ុន្តែសញ្ញាបត្រចេញពីTVET នោះទេ! ត្រូវមានមោនភាពដែលមានសញ្ញាបត្រនេះ…

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ

រដ្ឋមន្រ្តីក្រសួងការងារ មានប្រសាសន៍បន្តថា  តាមរយៈការសម្រេចចិត្តជ្រើសយកជំនាញ TVET គឺជាការចាប់យកឱកាស ជាស្ពានចម្លង​យកជំនាញ និងជាស្ពានដើម្បីការងារ។ ហើយការជ្រើសនេះ គឺជាជម្រើសមួយដ៏វៃឆ្លាត និងជាការជ្រើសរើសដែលស័ក្តិសមបំផុត ដែលយើងទាំងអស់គ្នាត្រូវតែមានមោទនភាព។

ជំនាញ TVET ជាការចំណាយពេលខ្លី ដើម្បីឱ្យយើងមានជំនាញ និង​ឱកាសការងារបានលឿនជាងអ្នកដទៃ ថែមទាំងអាចជួយគ្រួសារយើងបានលឿនជាងអ្នកដទៃ ដែលនេះជាហេតុ យើងត្រូវមានមោទនភាពចំពោះខ្លួនឯង ដើម្បីជៀសវាងក្នុងការបន្តឱ្យមានភាពស្រពេចស្រពិលចំពោះខ្លួនឯង។

ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ

ឆ្លៀតក្នុង​ឱកាសនោះ ឯកឧត្តម ហេង សួរ ក៏បានរំលេចអំពីកិច្ចការរបស់រាជរដ្ឋាភិបាល ដែលមានកម្មវិធីបណ្តុះបណ្តាល យុវជន ចំនួនមួយលានប្រាំសែននាក់ មានប្រវត្តិមកពីគ្រួសារមិនធូរធារ និងមកពីគ្រួសារងាយរងហានិភ័យ ដូចជា គ្រួសារដែលមានឱពុកម្តាយជាជនមានពិការភាព គ្រួសារដែលមានឱពុកម្តាយប្រកបរបរក្រៅប្រព័ន្ធ និងគ្រួសារដែលមានឪពុកម្តាយចាស់ជរាជាដើម ដោយពួកគេ អាចចូលរៀនបាន ទោះបីជារៀននៅ PSE ក៏ដោយ ឬក៏អាចទៅរៀននៅសាលាបណ្តុះបណ្តាលដែលបង្រៀនជំនាញចំនួន៣៧ស្ថាប័នផ្សេងទៀត ស្ថិតនៅក្រោមក្រសួងការងារ និង​បណ្តុះបណ្តាលវិជ្ជាជីវៈ៕