ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
(ភ្នំពេញ) នៅថ្ងៃទី ១១ ខែកក្កដា ឆ្នាំ២០២៣៖ សិស្សានុសិស្សប្រចាំឆ្នាំសិក្សា ២០២៣ របស់វិទ្យាល័យ AUPP (AUPPHS-FA) បានបញ្ចប់ការសិក្សារបស់ពួកគេដោយជោគជ័យ ទោះបីជាមានបញ្ហាប្រឈមមួយចំនួនដែលបណ្តាលមកពីជំងឺរាតត្បាតក៏ដោយ។ គណៈគ្រប់គ្រងនៃវិទ្យាល័យ AUPP ពិតជាមានមោទនភាពក្នុងការអបអរសាទរការបញ្ចប់ការសិក្សាថ្នាក់វិទ្យាល័យរបស់ពួកគេ។ ពិធីប្រគល់សញ្ញាបត្រនេះ ត្រូវបានប្រារព្វឡើងនៅថ្ងៃទី០១ ខែកក្កដា ឆ្នាំ២០២៣ ដោយសិស្សានុសិស្សដែលបញ្ចប់ការសិក្សាសរុបចំនួន ១៨រូប បានទទួលសញ្ញាបត្រចំនួនពីរ ដែលសញ្ញាបត្រមួយផ្តល់ជូនដោយវិទ្យាល័យដៃគូនៅសហរដ្ឋអាមេរិករបស់យើងគឺគ្រឹះស្ថានសិក្សា Foxcroft Academy និងសញ្ញាបត្រមួយទៀត ដែលមានតម្លៃសមមូលនឹងសញ្ញាបត្រមធ្យមសិក្សាទុតិយភូមិ ដែលទទួលស្គាល់ដោយក្រសួងអប់រំ យុវជន និងកីឡានៃព្រះរាជាណាចក្រកម្ពុជា។
សិស្សានុសិស្សដែលបញ្ចប់ការសិក្សាឆ្នាំ២០២៣ បោះជំហានឆ្លងកាត់ឆាកកិត្តិយស ដែលជានិមិត្តសញ្ញានៃការបញ្ចប់ការសិក្សា និងជាការចាប់ផ្តើមជំពូកថ្មីក្នុងជីវិតរបស់ពួកគេ។ សិស្សានុសិស្សទទួលបានការអប់រំយ៉ាងពិសេស គួបផ្សំនឹងការចូលរួមក្នុងកម្មវិធីបង្ហាត់បង្រៀន បានធ្វើឱ្យពួកគេទទួលបានភាពជោគជ័យគួរឱ្យកត់សម្គាល់ក្នុងអំឡុងពេលសិក្សានៅវិទ្យាល័យ AUPP។ សិស្សានុសិស្សដែលបញ្ចប់ការសិក្សា ក៏បានបង្ហាញពីជំនាញភាពជាអ្នកដឹកនាំ ភាពប៉ិនប្រសប់ ការលះបង់ និងការខិតខំប្រឹងប្រែង ដែលកើតចេញពីការចូលរួមយ៉ាងសកម្មរបស់ពួកគេក្នុងសកម្មភាពក្រៅកម្មវិធីសិក្សា ដូចជាគម្រោងការងារសហគមន៍ ក្លឹបកីឡា តន្ត្រី និងសិល្បៈ។ សមិទ្ធផលទាំងនេះបានធ្វើឱ្យសហគមន៍ AUPP មានមោទនភាពក្រៃលែង។
ជាមួយគ្នានោះដែរ ការងារសហគមន៍ និងសកម្មភាពមនុស្សធម៌របស់សិស្សានុសិស្សជាមួយលោកគ្រូអ្នកគ្រូរបស់វិទ្យាល័យ ក៏បានជះផលវិជ្ជមានយ៉ាងខ្លាំង។ ពួកគេបានផ្សព្វផ្សាយ និងរៃអង្គាសការបរិច្ចាគដើម្បីជួយដល់សាលាបឋមសិក្សាចំបក់ ក្នុងឃុំចំបក់ ដោយបានផ្តល់ជាសម្ភារៈសិក្សាដល់សិស្សានុសិស្សនៅទីនោះចំនួន ៦០នាក់ ហើយថែមទាំងបានចូលរួមចំណែកជាថវិកាសម្រាប់ជួសជុលអគារសិក្សាផងដែរ។
សិស្សានុសិស្សនៃឆ្នាំសិក្សា២០២៣ដែលបានចូលរួមក្នុងសកម្មភាពខាងលើនេះ បាននិយាយថា៖
“វាគឺជាបទពិសោធន៍ដ៏មោទនភាពមួយដែលយើងទាំងអស់គ្នាបានចូលរួមចំណែកដល់ការអប់រំរបស់ក្មេងៗនៅក្នុងសហគមន៍”
កាលពីថ្ងៃទី១៧ ខែវិច្ឆិកា ឆ្នាំ២០២២ នេះ សិស្សថ្នាក់ទី១២ របស់វិទ្យាល័យ AUPP ចំនួន ៣រូប រួមជាមួយនឹងគ្រូបង្រៀន បានធ្វើដំណើរទៅកាន់ទីក្រុង Dortmund ប្រទេសអាល្លឺម៉ង់ ដើម្បីតំណាងឱ្យប្រទេសកម្ពុជានៅក្នុងការប្រកួតវគ្គផ្តាច់ព្រ័ត្រអន្តរជាតិនៃកម្មវិធីប្រកួតមនុស្សយន្តអូឡាំព្យាដពិភពលោកឆ្នាំ២០២២ (World Robot Olympiad 2022) ជាមួយនឹងក្រុមចំនួន ៣៦៥ មកពី ៧៣ ប្រទេសជុំវិញពិភពលោក។ លើសពីនេះទៅទៀត នៅពេលបញ្ចប់ការសិក្សា សិស្សានុសិស្សនៃវិទ្យាល័យ AUPP ចំនួន ៥រូប នឹងបន្តការសិក្សារបស់ពួកគេនៅសាកលវិទ្យាល័យអាមេរិកាំងភ្នំពេញ ខណៈដែលសិស្សានុសិស្សផ្សេងទៀតត្រូវបានទទួលឱ្យបន្តការសិក្សាជាមួយនឹងអាហារូបករណ៍នៅសាកលវិទ្យាល័យល្បីៗនៅសហរដ្ឋអាមេរិក អូស្ត្រាលី កាណាដា ចក្រភពអង់គ្លេស និងអ៊ីតាលី។
លោក William E. Thomas នាយកវិទ្យាល័យ AUPP បានមានប្រសាសន៍នៅក្នុងកំឡុងពេលកម្មវិធីទទួលសញ្ញាបត្រថា៖
“ច្រើនជាង ៧៥%នៃសិស្សរបស់យើង បានបញ្ចប់ការសិក្សាប្រចាំឆ្នាំ២០២៣ ជាមួយនឹងរង្វាន់សិស្សឆ្នើម Summa Cum laude, Magna Cum Laude និង Cum Laude។ សមិទ្ធិផលនេះគ្រាន់តែជាឧទាហរណ៍មួយនៃសមិទ្ធិផលឆ្នើមជាច្រើនផ្សេងទៀតរបស់សិស្សានុសិស្សយើង និងឆន្ទៈរបស់ពួកគេលើសពីការរំពឹងទុក។ វិទ្យាល័យ AUPP មានមោទនភាពយ៉ាងខ្លាំងចំពោះភាពជោគជ័យរបស់ពួកគេ ហើយទន្ទឹងរង់ចាំមើលពីភាពជោគជ័យបន្តបន្ទាប់ទៀតរបស់ពួកគេ ក្នុងនាមជាអ្នកដឹកនាំជំនាន់ក្រោយនៃព្រះរាជាណាចក្រកម្ពុជា”
សិស្សានុសិស្សដែលបញ្ចប់ការសិក្សា ក៏បានសម្តែងការដឹងគុណចំពោះក្រុមគ្រួសារ លោកគ្រូអ្នកគ្រូ បុគ្គលិក និងមិត្តភក្តិរបស់ពួកគេ សម្រាប់ការគាំទ្រក្នុងពេលកន្លងមក។
សម្រាប់ព័ត៌មានបន្ថែមអំពីវិទ្យាល័យ AUPP សូមចូលទៅកាន់គេហទំព័រ https://www.aupphs-fa.edu.kh/
__________________________________________
ព័ត៌មានទូទៅអំពីវិទ្យាល័យ AUPP
វិទ្យាល័យ AUPP គឺជាវិទ្យាល័យឯកជនអន្តរជាតិមួយដែលផ្ដល់ជូននូវកម្មវិធីសិក្សាពេញម៉ោងពីថ្នាក់ទី៧ ដល់ថ្នាក់ទី១២ ដែលត្រូវបានរៀបចំឡើងស្របតាមកម្មវិធីអប់រំថ្នាក់មធ្យមសិក្សានៅសហរដ្ឋអាមេរិក។ បន្ថែមពីលើកម្មវិធីសិក្សាត្រៀមសម្រាប់ថ្នាក់ឧត្តមសិក្សា (College Preparatory Courses) វិទ្យាល័យ AUPP ក៏ផ្ដល់ជូននូវកម្មវិធី STEAM ដែលជាកម្មវិធីអប់រំលំដាប់អន្តរជាតិ រួមមាន៖ មុខវិជ្ជាវិទ្យាសាស្រ្ត បច្ចេកវិទ្យា វិស្វកម្ម សិល្បៈ និងគណិតវិទ្យា។ គោលបំណងចម្បងនៃកម្មវិធីនេះ គឺផ្ដោតទៅលើការអភិវឌ្ឍ និងបង្ហាត់បង្រៀនសិស្សានុសិស្សឲ្យមានភាពក្លាហានក្នុងការបង្កើតថ្មី ជាពិសេសចូលរួមក្នុងការពិសោធន៍ដោយផ្ទាល់ ចេះដោះស្រាយបញ្ហា និងជំរុញឲ្យសិស្សចេះធ្វើការសហការ ក្នុងការច្នៃប្រឌិត។ ទីតាំងថ្មីរបស់វិទ្យាល័យ AUPP បច្ចុប្បន្នកំពុងត្រូវបានសាងសង់នៅទីតាំងសំខាន់មួយនៅចំណុចកណ្តាលរាជធានីភ្នំពេញ ដោយមានបំពាក់នូវសម្ភារៈបរិក្ខារទំនើបៗដូចជា ថ្នាក់រៀនឌីជីថល បន្ទប់ពិសោធន៍វិទ្យាសាស្ត្រ និងបច្ចេកវិទ្យា (STEM/Robotics) និងបណ្ណាល័យធំទូលាយ។
ទំនាក់ទំនង៖
កញ្ញា អិប សុផល
បុគ្គលិកព័ត៌មាន និងរដ្ឋបាល
០២៣ ៩០២ ១១១ / ០៧៧ ៥៨៤ ៧៩៧ (តេឡេក្រាម)
