ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – ព្រឹត្តិការណ៍សិល្បៈសហគមន៍ «តោះ» ដែលជាព្រឹត្តិការណ៍បង្ហាញផ្នែកផ្សេងៗ នៃសិល្បៈទៅកាន់សហគមន៍ ជាពិសេសសិស្សវិទ្យាល័យដែលកំពុងពិចារណាជ្រើសរើសជំនាញសិល្បៈដើម្បីសិក្សានៅថ្នាក់បរិញ្ញាបត្រ នឹងប្រព្រឹត្តធ្វើឡើងនៅថ្ងៃទី១១ ខែមីនា ឆ្នាំ២០២៣ខាងមុខ ឯសាលពហុបំណង Kampus។
នៅក្នុងព្រឹត្តិការណ៍នោះ នឹងមានការតាំងបង្ហាញនូវផ្នែកទាំង ៥ នៃសិល្បៈដែលជាជំនាញរៀងៗខ្លួន របស់ទូតសុឆន្ទះយុវជនច្នៃប្រឌិត ដែលមាន សេម រ៉កឃើ ជាតារាចម្រៀង អ្នកនិពន្ធចម្រៀង និងជាអ្នកនិយាយជាសាធារណៈ, ម៉ុក សំបូរ ជាអ្នកដឹកនាំផ្នែកតុបតែងឆាក, នាក់ សុផល ជាអ្នកថតរូប, នរោត្តម រ៉េតវិរៈបុត្រ ជាវិចិត្រករផ្នែកបុរាណនិងសម័យ និង អែម បញ្ញាទេព ជាសមាជិកក្លឹបអ្នកនិពន្ធ។
លោក ម៉ុក សំបូរ តំណាងទូតសុឆន្ទះយុវជនច្នៃប្រឌិតទាំង៥ បាននិយាយថា ព្រឹត្តិការណ៍សិល្បៈសហគមន៍ «តោះ» ដែលគ្រោងនឹងធ្វើឡើងនៅចុងសប្តាហ៍នេះ មានគោលដៅបង្ហាញជំនាញទៅដល់អនាគតជំនាន់ថ្មី នៃសង្គមសិល្បៈរបស់យើង ដើម្បីឱ្យពួកគាត់ឃើញថា សិល្បៈក៏ជាការងារ សិល្បៈក៏អាចឱ្យពួកគាត់រកចំណូលបានដូចជាជំនាញផ្សេងៗទៀតដែរ។
” ជាទូទៅនៅក្នុងសង្គមខ្មែរយើង តែងមានផ្នត់គំនិតមួយថា សិល្បៈគឺជាការច្រៀងរាំ… ហើយកូនសិស្សនៅពេលដែលរៀនចប់ ពួកគាត់ក៏អត់ដឹងថា តើអាចទៅធ្វើការអីបាន? អញ្ចឹងគោលដៅនៃកម្មវិធី ចង់ឱ្យក្រឡេកមកមើលវិស័យសិល្បៈវិញ ព្រោះសិល្បៈជាព្រលឹងជាតិ ជាអត្តសញ្ញាណជាតិ “
ព្រឹត្តិការណ៍សិល្បៈសហគមន៍ «តោះ» នឹងប្រព្រឹត្តទៅពីម៉ោង១រសៀល រហូតដល់ម៉ោង៥ល្ងាច នៅថ្ងៃសៅរ៍ ទី១១ ខែមីនា ដោយអនុញ្ញាតឱ្យសាធារណជនទូទៅ ជាពិសេសសិស្សដែលកំពុងសិក្សានៅថ្នាក់វិទ្យាល័យ និងចាប់អារម្មណ៍ទៅលើជំនាញសិល្បៈ អាចសាកល្បង និងស្វែងយល់ពីជំនាញសិល្បៈទាំង៥ ដែលរួមមាន តោះច្រៀង តោះថត តោះគូរ តោះរៀបចំ និងតោះនិពន្ធ ។ ជាមួយគ្នា ក្នុងព្រឹត្តិការណ៍នោះ ក៏មានការសម្ដែងសិល្បះ ការចែករំលែកបទពិសោធន៏នៃការតែងនិពន្ធ ការថតរូបភ្លាមផ្ដិតភ្លាម ការគូរគំនូរផ្ទាល់ ការបង្ហញពីដំណាក់កាលនៃការតុបតែងឆាក ការតាំងបង្ហាញស្នាដៃសិល្បះ និងសកម្មភាពផ្សេងៗជាច្រើនទៀតក្នុងផ្នែកនីមួយៗនៃការតាំងបង្ហាញ។
សូមបញ្ជាក់ដែរថា ទូតសុឆន្ទះយុវជនច្នៃប្រឌិត ទាំង៥ គឺជាយុវជនមួយក្រុមនៃអង្គការ The Sound Initiatives (TSI) ដែលត្រូវបានបង្កើតឡើងក្នុងគោលបំណង កសាងភាពជាអ្នកដឹកនាំ និងលើកកម្ពស់កិច្ចសន្ទនា រវាងយុវជននិងតំណាងរាជរដ្ឋាភិបាល ក្នុងការចូលរួមដោះស្រាយបញ្ហាប្រឈមនានា ដែលអ្នកធ្វើការក្នុងវិស័យឧស្សាហកម្មកែច្នៃកំពុងជួបប្រទះ។ ជាលទ្ធផល ក្រុមយុវជនទូតសុឆន្ទះយុវជនច្នៃប្រឌិតទាំង៥ បានផ្តួចផ្តើមគ្នាបង្កើតនូវព្រឹត្តិការណ៍សិល្បៈសហគមន៍ «តោះ» ដើម្បីជួយដល់ការសម្រេចចិត្តរបស់យុវជន ដែលកំពុងពិចារណាជ្រើសរើសជំនាញសិល្បៈនៅថ្នាក់បរិញ្ញាបត្រ៕
