ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីម្ពោធពិព័រណ៍សៀវភៅ អបអរសាទរទិវាជាតិអំណានលើកទី១១ កាលពីថ្ងៃពុធ ឯកឧត្ដមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា ភាសាជាតិអាចរីកចម្រើនទៅបាន គឺអាស្រ័យលើស្មារតីអភិរក្ស និងអភិវឌ្ឍពីយើងទាំងអស់គ្នា។
ការរៀបចំពិព័រណ៍សៀវភៅ ដែលជាព្រឹត្តិការណ៍អមក្នុងទិវាជាតិអំណានជារៀងរាល់ឆ្នាំនេះ ឯកឧត្តមរដ្ឋមន្រ្តីបញ្ជាក់ថា ព្រឹត្តិការណ៍នេះសបញ្ជាក់ពីសក្ខីភាព នៃការប្តេជ្ញាចិត្តរបស់ក្រសួងអប់រំ យុវជន និងកីឡា ក្នុងការលើកកម្ពស់គុណភាពអប់រំ តាមរយៈការបង្កើតទម្លាប់នៃការអាន និងការកសាងវប្បធម៌សិក្សាពេញមួយជីវិត។
ឯកឧត្តមបន្តថា ក្នុងបរិបទថ្មីនេះ ការពង្រឹងទំនាក់ទំនងរវាងសាលារៀន បណ្ណាល័យ អ្នកនិពន្ធ និងអ្នកអាន គឺជាកត្តាចាំបាច់បំផុត ព្រោះថាមានអ្នកអាន ទើបមានអ្នកនិពន្ធ, ជាមួយគ្នា ក្រសួងនឹងបន្តផ្តល់ឱកាសកាន់តែទូលំទូលាយដល់អ្នកនិពន្ធក្នុងការបង្ហាញស្នាដៃ ដើម្បីជំរុញការផលិតធនធានអំណានឱ្យកាន់តែសម្បូរបែប ដែលជាគ្រឹះក្នុងការជួយគាំទ្រដល់ការអនុវត្តកញ្ចប់អំណានដំបូងរបស់ក្រសួងឱ្យមានប្រសិទ្ធភាព សំដៅបណ្តុះស្មារតីស្នេហាអក្សរសាស្ត្រជាតិ និងការពារអត្តសញ្ញាណខ្មែរឱ្យបានគង់វង្ស។
បន្ថែមលើនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្តដល់ក្មួយៗសិស្សានុសិស្ស និងយុវជនទាំងអស់ ត្រូវខិតខំសិក្សាស្រាវជ្រាវពីវប្បធម៌ និងភាសារបស់ខ្លួនឱ្យបានស៊ីជម្រៅ ដោយអាចប្រើប្រាស់ឥទ្ធិពលរបស់អ្នកនិពន្ធល្បីៗ ជាកម្លាំងចលករក្នុងការអភិវឌ្ឍសមត្ថភាពខ្លួន។ ភាសាជាតិអាចរីកចម្រើនទៅបាន គឺអាស្រ័យលើស្មារតីអភិរក្ស និងអភិវឌ្ឍពីយើងទាំងអស់គ្នា។
ពិព័រណ៍សៀវភៅ អបអរសាទរទិវាជាតិអំណានលើកទី១១ ប្រព្រឹត្តទៅរយៈពេល ៥ថ្ងៃ ចាប់ពីថ្ងៃទី១១ ដល់ទី១៥ ខែមីនា ឆ្នាំ២០២៦ នៅវិទ្យាស្ថានបច្ចេកវិទ្យាកម្ពុជា ដោយមានតូបសៀវភៅបង្ហាញស្នាដៃរបស់អ្នកនិពន្ធល្បីៗ ក៏ដូចជាអ្នកនិពន្ធជំនាន់ថ្មីប្រមាណ៨០៕
