មូលនិធិទស្សនវិជ្ជាខ្មែរ រកឃើញយុវជនជាប់ជ័យលាភីប្រកួតសំណេរ ទស្សនវិជ្ជាជាភាសាខ្មែរ លើកទី២ ជាក្រុម និងបុគ្គល និងប្រគល់រង្វាន់ជូននៅក្នុងកម្មវិធីបាឋកថាសាធារណៈនៃមូលធិនិទស្សនវិជ្ជាខ្មែរ សាកលវិទ្យាល័យភូមិន្ទភ្នំពេញ ក្រោមប្រធានបទ ៖ អត្ថន័យនៃជីវិតក្នុងយុគនវសេរីនិយម ។

បេក្ខជនជាប់ជ័យលាភីប្រកួតសំណេរ ទស្សនវិជ្ជាជាភាសាខ្មែរ លើកទី២ រួមមាន ជ័យលាភីលេខ១ បានទៅលើ លោក មាឃ លឹមហ៊ាក ជានិស្សិតបរិញ្ញាបត្រជាន់ខ្ពស់ផ្នែកទស្សនវិជ្ជា នៃសាកលវិទ្យាល័យភូមិន្ទភ្នំពេញ (ប្រកួតជាក្រុម), ជ័យលាភីលេខ២ បានទៅលើ លោក សេង សុខ  អតីតនិស្សិតទស្សនវិជ្ជា និងបច្ចុប្បន្នគរុនិស្សិតនៃវិទ្យាស្ថានជាតិអប់រំ និងជ័យលាភីលេខ៣ បានទៅលើ កញ្ញា តូវ ណឹង អតីតនិស្សិតទស្សនវិជ្ជា (ប្រកួតជាក្រុម)។

លោក មាឃ លឹមហ៊ាក ជានិស្សិតបរិញ្ញាបត្រជាន់ខ្ពស់ផ្នែកទស្សនវិជ្ជា នៃសាកលវិទ្យាល័យភូមិន្ទភ្នំពេញ និងជាគរុនិស្សិតនៃវិទ្យាស្ថានជាតិអប់រំ មានប្រសាសន៍ថា កម្មវិធីប្រកួតសំណេរ ទស្សនវិជ្ជា ជាភាសាខ្មែរនេះ ជាគំនិតផ្ដួចផ្ដើមមួយដោយគណៈគ្រប់គ្រងសាកលវិទ្យាល័យ មានបំណងឱ្យនិស្សិតមានការគិតបែបទស្សនវិជ្ជា។ លោកបន្តថា កម្មវិធីនេះរួមចំណែកជួយដល់ការសិក្សាស្រាវជ្រាវរបស់និស្សិតទស្សនវិជ្ជាកម្ពុជាបានច្រើន ដោយសារអត្ថបទ ឬការសិក្សាទស្សនវិជ្ជានៅកម្ពុជានៅមានកម្រិត ខណៈសាកលលោកកំពុងគិតគូអំពីយុគសម័យថ្មី។

លោក មាឃ លឹមហ៊ាក បន្ថែមថា សម្រាប់ប្រធានបទប្រកួតសំណេរទាក់ទងទៅនឹងការអភិវឌ្ឍធនធានមនុស្ស ទស្សនវិស័យទស្សនវិជ្ជា ដែលមានន័យថា ជាការសិក្សាបែបទស្សនវិជ្ជាផ្ដោតទៅលើការអភិវឌ្ឍមូលធនមនុស្ស។ លោកបន្តថា ការសរសេរអត្ថបទប្រកួតនេះ ជួបការលំបាកច្រើន ដោយសារចំណេះដឹងនៅមានកម្រិតបើធៀបជាមួយប្រជាជននៃប្រទេសអភិវឌ្ឍ ហើយកាលណាសរសេរលើប្រធានបទមួយដែលមានព័ត៌មានតិច ឬកំពុងតែមានការវិភាគវែកញែកគ្នាខ្លាំង គឺកាន់តែលំបាកខ្លាំង ប៉ុន្តែនៅទីបំផុតយើងអាចធ្វើបាន។

ម្ចាស់ជ័យលាភីរូបនេះ ក៏បានផ្ដាំទៅយុវជនគួរគិតគូ ឬសិក្សាទៅលើអ្វីមួយដែលមានលក្ខណៈជាប្រព័ន្ធឱ្យបានត្រឹមត្រូវ ទាំងទស្សនៈ របៀបរស់នៅ មានលក្ខណៈជាលំនឹងពំនាក់។

កញ្ញា តូវ ណឹង អតីតនិស្សិតទស្សនវិជ្ជា និងជាជ័យលាភីលេខ៣ បានប្រាប់ឱ្យដឹងថា កម្មវិធីប្រកួតសំណេរ ទស្សនវិជ្ជាជាភាសាខ្មែរនេះ ជួយឱ្យអ្នកចូលរួមបានរៀនសូត្រ រៀនស្វែងយល់អំពីចិត្តរបស់ខ្លួន ស្ថានភាពជីវិតនៃការរស់នៅប្រចាំថ្ងៃ គប្បីធ្វើបែបណាដើម្បីមានសុភមង្គល ក៏ដូចជាសេចក្ដីសុខផ្លូវចិត្ត ព្រោះពេលខ្លះមនុស្សមានទ្រព្យសម្បត្តិ ការងារល្អ មុខដំណែងធំ ប៉ុន្តែពេលខ្លះមិនមានសេចក្ដីសុខខាងផ្លូវចិត្ត។ លើសពីនេះ អាចឱ្យអ្នកចូលរួមរៀនបានពីទស្សនវិជ្ជាប៉ែកអឺរ៉ុបដែលអាចប្រៀបធៀបទស្សនវិជ្ជាអាស៊ីផងដែរ។ កញ្ញា ក៏គាំទ្រឱ្យគណៈកម្មការរៀបចំកម្មវិធីនេះជារៀងរាល់ឆ្នាំផងដែរ។

កញ្ញា តូវ ណឹង បញ្ជាក់ថា នេះជាលើកទី២ហើយ ដែលខ្លួនចូលរួមប្រកួតសំណេរទស្សនវិជ្ជា ដោយប្រកួតជាក្រុមលើកទី១ មិនទទួលជ័យលាភី ប៉ុន្តែអ្នកទាំអពីរមិនព្រមចុះចាញ់ហើយព្យាយាមចូលប្រកួតលើកទី២ ម្ដងទៀត ហើយក៏ទទួលបានភាពជោគជ័យ។

«នៅពេលទទួលជ័យលាភីក្នុងការសរសេរអត្ថបទសំណេរទស្សនវិជ្ជា ខ្ញុំមានអារម្មណ៍ថារំភើបសប្បាយរីករាយ ដោយជ័យលាភីនេះ បានមកដោយសមត្ថភាព និងការខិតខំប្រឹងប្រែង»។

កញ្ញា តូវ ណឹង អតីតនិស្សិតទស្សនវិជ្ជា

អតីតនិស្សិតទស្សនវិជ្ជា រូបនេះ បន្ថែមថា ការរស់នៅរបស់យើងម្នាក់ៗមិនថាការរៀនសូត្រ ការប្រកួតប្រជែង ឬការធ្វើអ្វីមួយតែងតែមានធាតុពីរ ឬហេតុពីរដែលយើងតែងតែទទួលបាន ទី១. ជោគជ័យ ទី២. បរាជ័យ ។ លើសពីនេះ កញ្ញា ក៏លើកទឹកចិត្តដល់យុវជន នៅពេលជួបបរាជ័យសូមកុំបាក់ទឹកចិត្តត្រូវព្យាយាមខិតខំកែប្រែនូវជំនះភាពបរាជ័យ ឬការឈឺចាប់មកធ្វើជាកម្លាំងចិត្ត ដើម្បីលើកទឹកចិត្តឱ្យយើងខិតខំប្រឹងប្រែងដើម្បីសម្រេចជោគជ័យនៅពេលខាងមុខ។លើសពីនេះ ត្រូវថែរក្សាសុខភាពឱ្យបានល្អទាំងសុខភាពផ្លូវចិត្ត និងសុខភាពផ្លូវកាយ ដោយធ្វើយ៉ាងណាឱ្យដើរទន្ទឹមគ្នា។

គួរជម្រាបជូនថា កម្មវិធីប្រកួតប្រជែងអត្ថបទសំណេរទស្សនវិជ្ជាជាភាសាខ្មែរ លើកទី២ ធ្វើឡើងដើម្បីអបអរទិវាទស្សនវិជ្ជាពិភពលោក ឆ្នាំ២០២៣ តាមរយៈប្រធានបទ «ការអភិវឌ្ឍមូលធនមនុស្ស ទស្សនវិស័យទស្សនវិជ្ជា៕