ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ – បេក្ខនារីមួយក្រុមដែលមានសមាជិកចំនួន៥នាក់ បានរួមគ្នាបង្កើតកម្មវិធីទូរស័ព្ទដៃមួយដែលមានឈ្មោះថា “App បណ្ឌិត” ដើម្បីផ្ដល់ការអប់រំ និងឱកាសសិក្សាសម្បូរបែបដល់សិស្សានុសិស្ស ។ គំនិតមួយនេះ ក៏ធ្វើឱ្យពួកគេទទួលបានជ័យលាភីឆ្នើម នៅក្នុងកម្មវិធីប្រកួតថ្នាក់ជាតិតិចនូវេសិនកម្ពុជាឆ្នាំ២០២៣ កាលពីពេលកន្លងទៅថ្មីៗនេះផងដែរ។
យុវតី អ៊ុង ស្រីពេជ្រ ជាសិស្សថ្នាក់ទី១២ នៃសាលារៀនអន្តរជាតិ អាយ ស៊ី អេស និងជាសមាជិកក្រុម “Torsu Girl” បាននិយាយថា “App បណ្ឌិត” បង្កើតឡើងក្នុងគោលបំណងផ្ដល់ការអប់រំ និងឱកាសសិក្សា អាហារូបករណ៍ និងការចូលរួមកម្មវិធីប្រកួតផ្សេងៗសម្រាប់សិស្សានុសិស្សខ្មែរ។ យុវតី អ៊ុង ស្រីពេជ្រ បន្តថា នៅក្នុងកម្មវិធីនេះ សិស្សានុសិស្សអាចទាញយកទៅប្រើប្រាស់បានដើម្បីស្វែងរកម្មវិធីសិក្សាផ្សេងៗ ឬឱកាសអាហារូបករណ៍ ការងារស្ម័គ្រចិត្តជាដើម។ ប្រសិនជាសិស្សានុសិស្សមិនធ្លាប់ចូលរួមប្រកួត “App បណ្ឌិត” នេះក៏មានអ្នកប្រឹក្សាយោបល់ សិស្សអាហារូបករណ៍ និងសិស្សជ័យលាភីឆ្នើម ជួយពិភាក្សាផ្ដល់យោបល់ដើម្បីយល់ដឹងកាន់តែច្បាស់ពីរបៀបដាក់ពាក្យអាហារូបករណ៍ជាដើម។
យុវតី អ៊ុង ស្រីពេជ្រ បន្ថែមថា តាមរយៈការចូលរួមកម្មវិធីប្រកួតថ្នាក់ជាតិតិចនូវេសិនកម្ពុជាឆ្នាំ២០២៣ សមាជិកក្រុមទាំងអស់ទទួលបានចំណេះដឹងជាច្រើនអំពីផ្នែកឌីជីថលក្នុងការបង្កើត App, ការធ្វើបទបង្ហាញ, របៀបសរសេរផែនការអាជីវកម្ម និងធ្វើផែនការហិរញ្ញវត្ថុ ដែលមិនធ្លាប់ធ្វើពីមុនមក។ ទន្ទឹមគ្នានេះ ចេះបន្ថែមពីរបៀបធ្វើការជាក្រុម បង្កើតទំនាក់ទំនងជាមួយមិត្តភក្ដិថ្មីៗ ហើយក៏មានភាពសប្បាយរីករាយផងដែរ។
យុវតី អ៊ុង ស្រីពេជ្រ សិស្សថ្នាក់ទី១២ នៃសាលារៀនអន្តរជាតិ អាយ ស៊ី អេស។
“ខ្ញុំបានយល់ដឹងពីចំណេះដឹងថ្មីៗច្រើន អំពីសិស្សដែលចូលរួមគ្រូដឹកនាំ ហើយប្រសិនបើមិនបានចូលរួមទេ គឺក្រុមរបស់ខ្ញុំមិនបានយល់ដឹងពីចំណេះដឹងតូចៗគ្រប់មុខទាំងនោះទេ”
សម្រាប់ យុវតី អ៊ុង ស្រីពេជ្រ ក្រុមរបស់ពួកគេបានជួបឧបសគ្គមួយចំនួនទម្រាំអាចទទួលបានលទ្ធផលល្អ ដោយសារពិបាកណាត់ជួបជុំគ្នាពិភាក្សាក្រុម ព្រោះសមាជិកម្នាក់ៗសុទ្ធតែរវល់រៀងៗខ្លួន និងបទពិសោធន៍ផ្នែកឌីជីថលនៅមានកម្រិត ។ បើទោះជាជួបផលលំបាកក៏ពិតមែន ក៏ក្រុមខិតខំប្រឹងប្រែងបង្កើត “App បណ្ឌិត” ឡើងដោយបែងចែកពេលវេលាច្បាស់លាស់ បែងចែកកិច្ចការដល់សមាជិកក្រុមច្បាស់លាស់ និងទទួលយកគិតយោបល់គ្នាទៅវិញទៅមក។
ជាមួយគ្នានេះ យុវតី ជាតិ លីហ្សា អាយុ១៧ឆ្នាំ ជាសិស្សថ្នាក់ទី១២ នៃសាលារៀនអន្តរជាតិ អាយ ស៊ី អេស និងជាសមាជិកក្រុម “Torsu Girl” បន្ថែមថា ចំណុចពិសេសដែលធ្វើឱ្យក្រុមទទួលបានជ័យលាភី គឺបានចុះទៅជួបនិយាយជាមួយសិស្សានុសិស្ស ឪពុកម្ដាយសិស្ស គ្រូបង្រៀន សាស្រ្តាចារ្យ ដោយផ្ដល់យោបល់ និងមតិកែលម្អជាច្រើនដើម្បីឱ្យ “App បណ្ឌិត” មានលក្ខណៈកាន់តែល្អប្រសើរ។ យុវតី លីហ្សា បន្តថា រូបនាងទទួលបានចំណេះដឹងជាច្រើនអំពីកម្មវិធីមួយនេះ ហើយនៅក្នុងបដិវត្តន៍ឧស្សាហកម្ម៤.០ នាងគិតថាតិចណូឡូជីដើរលឿនទៅមុខខ្លាំង ហើយវិស័យនេះទាមទារឱ្យមានការចូលរួមពីក្មេងស្រីកម្ពុជាផងដែរ។
យុវតី ជាតិ លីហ្សា អាយុ១៧ឆ្នាំ ជាសិស្សថ្នាក់ទី១២ នៃសាលារៀនអន្តរជាតិ អាយ ស៊ី អេស
“សម្រាប់ខ្ញុំផ្ទាល់ និងសមាជិកក្រុមពិតជាមានភាពសប្បាយរីករាយមែនទែន ដោយសារសម្រាប់អ្វីដែលយើងខំប្រឹងធ្វើទោះម្នាក់ឯង ឬជាក្រុមក្ដី គឺតែងតែសប្បាយចិត្តព្រោះនៅពេលយើងខិតខំអស់ពីសមត្ថភាពហើយក៏ទទួលបានលទ្ធផលដែលយើងចង់បាននោះមែន”
យុវតី ជាតិ លីហ្សា ក៏បានលើកទឹកចិត្តដល់សិស្សានុសិស្ស ទោះជាស្រ្តីក៏យើងមានអាទិភាពក្នុងការធ្វើអ្វីៗដូចបុរសដែរ ដោយត្រូវហ៊ានជំនះការលំបាក មិនថាយើងចូលរួមក្នុងកម្មវិធីអ្វីក៏ដោយ ដូចជាកម្មវិធីបច្ចេកវិទ្យា កម្មវិធីអាហារូបករណ៍ និងការងារសង្គម ទទួលបានបានបទពិសោធន៍ថ្មីៗ និងបង្កើនចំណេះដឹងជាច្រើន៕
