ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ឱកាសសិក្សានៅប្រទេសចិន តាមរយៈអាហារូបករណ៍រដ្ឋាភិបាលចិន (CSC) ចំនួន៧៥នាក់ សម្រាប់ឆ្នាំសិក្សា២០២៦-២០២៧។ អាហារូបករណ៍ផ្ដល់ដោយការប្រឡងជ្រើសរើសតាមរយៈក្រសួងអប់រំ យុវជន និងកីឡា សម្រាប់ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត។
មុខជំនាញសិក្សារួមមាន ៖ វិទ្យាសាស្ត្រ, វិស្វកម្ម, សេដ្ឋកិច្ច, ការគ្រប់គ្រងពាណិជ្ជកម្ម, វេជ្ជសាស្ត្រ, ព័ត៌មានវិទ្យា និងជំនាញជាច្រើនទៀត។
លក្ខខណ្ឌនៃការចុះឈ្មោះ ៖ បេក្ខជនស្នើថ្នាក់បរិញ្ញាបត្រត្រូវមានសញ្ជាតិខ្មែរ, មានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃសមមូល, អាយុក្រោម២៥ឆ្នាំ, មានសុខភាពល្អទាំងកាយសម្បទា និងសតិបញ្ញា និងមានលិខិតបញ្ជាក់ពីកម្រិត China Scholastic Competency Assessment(CSCA)។ ចំពោះបេក្ខជនដែលមានបំណងចុះឈ្មោះធ្វើតេស្ត CSCA ត្រូវចូលទៅកាន់ Website: www.csca.com ដោយកាលបរិច្ឆេទតេស្តនឹងប្រព្រឹត្តទៅនាថ្ងៃទី២១ ធ្នូ ២០២៥។ សម្រាប់បេក្ខជនស្នើថ្នាក់បរិញ្ញាបត្រជាន់ខ្ពស់ត្រូវមាន សញ្ជាតិខ្មែរ, មានសញ្ញាបត្របរិញ្ញាបត្រ, អាយុមិនលើស ៣៥ឆ្នាំ, មានចំណេះដឹងភាសាអង់គ្លេសជ្រៅជ្រះ មានសុខភាពល្អទាំងកាយសម្បទា និងសតិបញ្ញា។ សម្រាប់អ្នកស្នើថ្នាក់បណ្ឌិត ត្រូវមានសញ្ញាបត្រជាន់ខ្ពស់ អាយុមិនលើស៤០ឆ្នាំ មានចំណេះដឹងភាសាអង់គ្លេសជ្រៅជ្រះ មានសុខភាពល្អទាំងកាយសម្បទា និងសតិបញ្ញា។
បេក្ខជន បេក្ខនារី ដែលមានចំណាប់អារម្មណ៍ក្នុងការដាក់ពាក្យប្រឡង សូមធ្វើការដាក់ពាក្យពីថ្ងៃផ្សាយដំណឹងរហូតដល់ថ្ងៃទី៣០ ខែធ្នូ ឆ្នាំ២០២៥ ម៉ោង៤រសៀល នៅនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន នៃក្រសួងអប់រំ យុវជន និងកីឡា ដែលមានអាសយដ្ឋាន អគារលេខ២៣ ផ្លូវ៣៦០ សង្កាត់បឹងកេងកងទី១ ខណ្ឌបឹងកេងកង។
ការប្រឡងជ្រើសរើសបេក្ខជន នឹងប្រព្រឹត្តិនាថ្ងៃទី៤ ខែមករា ឆ្នាំ២០២៦ នៅលើវិញ្ញាសា ភាសាអង់គ្លេស គណិតវិទ្យា និងវប្បធម៌ទូទៅ។
បេក្ខជន ត្រូវភ្ជាប់ឯកសារដូចជា ៖ បង្កាន់ដៃទទួលពាក្យ ១ច្បាប់, ពាក្យសុំអាហារូបករណ៍១ច្បាប់, ជីវប្រវត្តិសង្ខេប១ច្បាប់, កិច្ចសន្យា១ច្បាប់, រូបថត៤គុណ៦ (៤សន្លឹក), សញ្ញាបត្របរិញ្ញាបត្រជាន់ខ្ពស់ (ច្បាប់ថតចម្លង១ច្បាប់ សម្រាប់ថ្នាក់បណ្ឌិត), សញ្ញាបត្របរិញ្ញាបត្រ (ច្បាប់ថតចម្លង១ច្បាប់ សម្រាប់ថ្នាក់បរិញ្ញាបត្រជាន់ខ្ពស់), សញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃសមមូល (ច្បាប់ថតចម្លង១ច្បាប់ និងភ្ជាប់សញ្ញាបត្រច្បាប់ដើម)។ ជាមួយគ្នានេះ បេក្ខជនត្រូវភ្ជាប់លិខិតបញ្ជាក់ការសិក្សាពីគ្រឹះស្ថានសិក្សា/បណ្ណសម្គាល់ខ្លួននិស្សិត ចំពោះបេក្ខជនជានិស្សិតដែលកំពុងសិក្សាតាមគ្រឹះស្ថានសិក្សានានា និងសេចក្ដីបញ្ជាក់ពីអង្គភាព ចំពោះបេក្ខជនជាមន្ត្រីរាជការ។ បេក្ខជននឹងត្រូវបំពេញវិញ្ញាបនបត្រពិនិត្យកាយសម្បទា ២សន្លឹកក្រោយពេលសាម៉ីជនត្រូវបានជ្រើសរើស។
សម្រាប់ព័ត៌មានបន្ថែម បេក្ខជនអាចទៅកាន់នាយកដ្ឋានសហប្រតិបត្តិការអន្តរជាតិ កិច្ចការអាស៊ាន នៃក្រសួងអប់រំ យុវជន និងកីឡា ឬតាមរយៈលេខទូរស័ព្ទ 098 989 789 រៀងរាល់ម៉ោងធ្វើការ៕
