យកចិត្តទុកដាក់រាល់ដំណាក់កាលទាំងអស់ នៃសារពាង្គកាយ តាមរយៈរបបអាហារ ចលនារាងកាយ ការទទួលទានដំណេក និងគ្រប់គ្រងស្រ្តេសជាការជំរុញឱ្យការរស់នៅប្រចាំថ្ងៃមានភាពស្វាហាប់។ តាមរយៈគេហទំព័រ Best Life បានបង្ហាញគន្លឹះ៦ចំណុចដែលឆ្លើយតបនឹងការសម្រួលដល់ប្រព័ន្ធរំលាយអាហារនិងការកាត់បន្ថយជាតិខ្លាញ់ចេញពីរាងកាយ។​

១. បរិភោគអាហារពេលព្រឹករាល់ថ្ងៃ ៖ វង់ព្រះអាទិត្យរះជះពន្លឺ គឺជាការបញ្ជាក់ពីការចាប់ផ្តើមថ្ងៃថ្មី យ៉ាងណាសូមឱ្យការចាប់ផ្តើមនេះ មិនត្រឹមតែមានសកម្មភាពឆ្លើយតបទៅមហិច្ឆតាប៉ុណ្ណោះទេ ប៉ុន្តែជាការចាប់ផ្តើមដែលគិតទៅដល់សុខុមាលភាព​តាមរយៈការទទួលទានអាហារពេលព្រឹកជាប្រចាំដែលមានសារធាតុចិញ្ចឹមគ្រប់គ្រាន់ មានជាតិប្រូតេអ៊ីន វិតាមីន សាច់គ្មានខ្លាញ់ និងអាហារល្អៗដទៃទៀតដើម្បីធ្វើឱ្យប្រព័ន្ធរំលាយអាហារកាន់តែបង្កភាពងាយស្រួល។

២. ពិសាទឹកគ្រប់គ្រាន់ ៖ ទឹកមានតួនាទីសំខាន់សម្រាប់រាងកាយទាំងមូល ដូច្នេះបរិភោគទឹកឱ្យបានគ្រប់គ្រាន់ ជាពិសេសពេលក្រោកពីដំណេកភ្លាម។ ហើយដើម្បីកាន់តែបង្កភាពងាយស្រួលដល់ប្រព័ន្ធរំលាយអាហារ ឬការកាត់បន្ថយជាតិខ្លាញ់ សូមយកក្រូចឆ្មារមួយចំណិតតូចមួយដាក់ទៅក្នុងកែវទឹកជាមុនសិន សឹមទទួលទានតាមក្រោយ ធ្វើបែបគឺនេះជាការបន្ថែមបាននូវឱជារសប្រសើរបន្ថែម។

៣. ចលនារាងកាយ ៖ ទោះបីជាការងារត្រូវអង្គុយយូរម៉ោងយ៉ាងណាក៏ដោយ គួរតែប្តេជ្ញាចិត្តយ៉ាងណាឱ្យរាងកាយមានឱកាសធ្វើចលនាជារៀងរាល់ថ្ងៃ តាមរយៈសកម្មភាពសាមញ្ញៗ ដូចជា ដើរចុះដើរឡើង ប្រើប្រាស់ជណ្តើរជើងជំនួសឱ្យជណ្តើរយន្ត ហាត់ប្រាណ និងធ្វើយូហ្កាជាដើម។

៤. ឈរឱ្យបានច្រើន ៖ ពិតណាស់ការងារមួយចំនួនចាំបាច់តម្រូវឱ្យអង្គុយមួយកន្លែងដើម្បីបង្ហើយការងារឱ្យចប់សព្វគ្រប់ ប៉ុន្តែការអង្គុយយូរពេលមិនល្អសម្រាប់សុខភាពនោះទេ ដូច្នេះ ទោះបីមមាញឹកយ៉ាងណាក៏ត្រូវឆ្លៀតងើបឈរ មួយវិញទៀតអាចប្រើប្រាស់កៅអី ឬតុដែលអាចឈរធ្វើការបាន។ ការរក្សាទម្លាប់ឈរបានយូរៗ ជះផលវិជ្ជមានជាអនេកទៅកាន់សុខភាពរាងកាយ។

៥. គេងគ្រប់គ្រាន់ ៖ ប្រើពេល ៧ ទៅ ៨ ម៉ោងទទួលទានដំណេកគឺជាការបញ្ជាក់ពីគុណភាពគេង រួមទាំងបង្កភាពងាយស្រួលដល់ប្រព័ន្ធរំលាយអាហារ និងការកាត់បន្ថយជាតិខ្លាញ់។ យ៉ាងណាមិញបើនិយាយាអំពីការបង្កើនផលិតភាពវិញ គេគិតគួរទាំងភាពស្កប់ស្កល់កំឡុងពេលគេង មិនត្រឹមតែរយៈពេលនៃការគេងប៉ុណ្ណោះទេ។

៦. គ្រប់គ្រង់ស្រ្តេស ៖ កាលដែលមិនបានយកចិត្តទុកដាក់លើអាការៈស្រ្តេស វាបង្កទៅជាភាពតានតឹងរ៉ាំរ៉ៃដែលមានលទ្ធភាពធ្វើឱ្យប្រព័ន្ធរំលាយអាហារចុះខ្សោយ។ ការសិក្សាបន្ថែមពីរបៀបកាត់បន្ថយភាពតានតឹងជាកត្តានាំផលវិជ្ជមានទៅកាន់សុខុមាលភាព៕