ក្រុមអ្នកវិទ្យាសាស្ត្រផ្នែកគីមីវិទ្យាបានប្រើប្រាស់បច្ចេកវិទ្យាមនុស្សយន្តបំពាក់ដោយបញ្ញាសិប្បនិម្មិត (AI) ដើម្បីស្វែងរកកាតាលីករ ឬសារធាតុគីមីដ៏ឆ្លាតវៃសម្រាប់ប្រតិកម្មបង្កើតជាអុកស៊ីហ្សែននៅភពអង្គារ ។ គេជឿជាក់ថា ប្រសិនបើបេសកកម្មសាកល្បងនេះផ្តល់ផ្លែផ្កាពិតមែន នោះវានឹងផ្តល់នូវដំណោះស្រាយដែលមានប្រសិទ្ធភាពខ្ពស់ និងសន្សំសំចៃថាមពលសម្រាប់ផលិតកម្មអុកស៊ីសែននៅលើភពអង្គារ ព្រមទាំងជំរុញប្រតិបត្តិការស្រាវជ្រាវជាសកលនៅភពអង្គារកាន់តែទូលំទូលាយ ។

ការពិសោធន៍របស់អ្នកវិទ្យាសាស្ត្រចិនលើកនេះ ត្រូវប្រើប្រាស់បច្ចេកវិទ្យាទំនើបតេស្តលើកំណករ៉ែ (វត្ថុធាតុ) ប្រាំប្រភេទយកពីភពអង្គារ ។ ដំណើរការប្រព្រឹត្តកម្មគីមីត្រូវឆ្លងកាត់ច្រើនលើកច្រើនសារ និងទាមទារការយកចិត្តទុកដាក់ខ្ពស់បំផុត ។ កន្លងទៅគេដឹងថា ភពព្រះអង្គារ ឬភពអង្គារជាភពដែលមានស្រទាប់បរិយាកាសយ៉ាងស្តើងជាងបរិយាកាសផែនដី រហូតដល់ ១០០ដង ហើយភពនេះពុំមានជីវិតផ្សេងៗ ដូចភពផែនដីឡើយ ។ ភពអង្គារជាភពដែលមានផ្ទៃដីស្ងួតហួតហែង ។

អ្នកស្រាវជ្រាវមកពីសាកលវិទ្យាល័យវិទ្យាសាស្ត្រ និងបច្ចេកវិទ្យានៃប្រទេសចិន (USTC) សហការជាមួយវិទ្យាស្ថានស្រាវជ្រាវ ព្រមទាំងអ្នកជំនាញមកពីមន្ទីរពិសោធន៍រុករកអវកាសចិន បានធ្វើការវិភាគ និងទាញយកសមាសធាតុពីអាចម៍ផ្កាយ Martian ដោយប្រើបញ្ញាសិប្បនិម្មិត (AI) វិភាគសមាសធាតុគីមីសំយោគកាតាលីករថ្មីក្នុងរយៈពេលជាងពីរខែ ។ អ្នកស្រាវជ្រាវបានរកឃើញរូបមន្តប្រមាណជាង ៣.៧លានរូបមន្តពីបញ្ញាសិប្បនិម្មិត ប៉ុន្តែមិនទាន់ប្រាកដថា អាចនឹងផលិតអុកស៊ីសែនបានទាំងស្រុងនៅឡើយ ។ គេជឿជាក់ថា ដំណើរពិសោធន៍នេះ ត្រូវចំណាយពេល ២ពាន់ឆ្នាំ ប្រសិនបើធ្វើដោយមនុស្ស ។

ផ្អែកតាមលទ្ធផលស្រាវជ្រាវដំណើរការផលិតអុកស៊ីសែននៅភពអង្គារកន្លងទៅ ភពអង្គារមានអុកស៊ីសែនត្រឹមតែ ០.២ភាគរយប៉ុណ្ណោះនៅក្នុងខ្យល់ ហើយកង្វះអុកស៊ីសែននេះជាការលំបាកសម្រាប់ជីវិតនៅលើភពអង្គារ ព្រមទាំងដំណើរការសិក្សានានារបស់ក្រុមអ្នកអវកាស ។ លទ្ធផលបង្ហាញរូបមន្តខាងលើធ្វើឱ្យអ្នកស្រាវជ្រាវចិនរំពឹងថា នៅពេលអនាគតមនុស្សអាចបង្កើតរោងចក្រអុកស៊ីហ្សែននៅលើភពព្រះអង្គារដោយមានជំនួយពីអ្នកគីមីវិទ្យាបញ្ញាសិប្បនិម្មិត (AI) ។

គួរបញ្ជាក់ថា ក្រុមអ្នកវិទ្យាសាស្ត្រចិនបានបង្ហាញគំរូបរិយាកាសសិប្បនិម្មិតរបស់ភពអង្គារដែលមានឈ្មោះថា “GoMars” ដោយគំរូនេះនឹងប្រើនៅក្នុងបេសកកម្មរុករកភពព្រះអង្គារនាពេលខាងមុខ ដែលជាគម្រោងដ៏ធំរបស់ប្រទេសចិននឹងធ្វើឡើងនៅឆ្នាំ២០២៨ ៕