ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការកើនឡើងនូវភាពតានតឹង អារម្មណ៍ឯកោ និងការធ្លាក់ទឹកចិត្ត បានក្លាយជារឿងធម្មតានៅអំឡុងពេលថ្ងៃឈប់សម្រាក។ អារម្មណ៍ទាំងនេះ កើតឡើងអាចបណ្ដាលមកពីកត្តារួមផ្សំជាច្រើនដូចជា កង្វល់ផ្នែកហិរញ្ញវត្ថុ ការគិតច្រើន ការផ្ដាច់ខ្លួនពីសង្គម និងរឿងរ៉ាវផ្សេងៗដែលកើតឡើង ដោយមិនបានព្យាករណ៍ទុកមុន។ ដូច្នេះ អ្នកអាចគិតដល់ការធ្វើសកម្មភាពផ្សេងៗ ដើម្បីបំបាត់អារម្មណ៍អផ្សុក គិតច្រើន និងឯកោជាដើម។ ក្នុងចំណោមសកម្មភាពជាច្រើន ការទស្សនាភាពយន្ត អាចជាទម្រង់នៃការសម្រាក និងការមើលថែខ្លួនឯងមួយ ដែលអ្នកអាចអនុវត្ត ដើម្បីធ្វើឱ្យអារម្មណ៍របស់អ្នកប្រសើរឡើង។
យោងតាមអ្នកជំនាញចិត្តសាស្ត្រ បណ្ឌិត Pamela Rutledge បានឱ្យដឹងថា ការទស្សនាភាពយន្ត ជាសកម្មភាពមួយ ដែលជួយឱ្យអ្នកមានអារម្មណ៍ល្អ ដោយសារប្រព័ន្ធប្រសាទរបស់យើងចូលទៅជ្រៅក្នុងអារម្មណ៍របស់យើង ដោយបន្ថែមនូវអត្ថន័យនៃការរស់នៅ បង្កើនសមត្ថភាពនៃការយល់ចិត្តអ្នកដទៃ បង្កើតឱ្យមានអារម្មណ៍កក់ក្ដៅ និងដាស់ដួងវិញ្ញាណនៅថ្ងៃចុងសប្ដាហ៍។
លើសពីនេះ មានអត្ថប្រយោជន៍សំខាន់ៗចំនួន ៤ ដែលអ្នកនឹងទទួលបានពីការទស្សនាភាពយន្តនៅថ្ងៃឈប់សម្រាក៖
- ជួយឱ្យអ្នកផ្ដោតលើអារម្មណ៍វិជ្ជមាន ដូចជា ក្ដីសង្ឃឹម សុភមង្គល ឱ្យតម្លៃលើការទំនាក់ទំនង សេចក្ដីពេញចិត្ត និងការដឹងគុណ ដែលអារម្មណ៍ទាំងនេះ នឹងផ្លាស់ប្ដូរសារធាតុគីមីនៅក្នុងខ្លួនមនុស្សឱ្យមានអារម្មណ៍សុទិដ្ឋិនិយម និងមានភាពធន់។
- អនុញ្ញាតឱ្យរឿងរ៉ាវនៅក្នុងភាពយន្តដែលអ្នកទស្សនាបំផុសឱ្យអ្នកយល់ឃើញនូវទស្សនៈថ្មីៗ និងជំរុញឱ្យអ្នកមើលឃើញចំណុចវិជ្ជមានខ្លួន។
- ធ្វើឱ្យថ្ងៃឈប់សម្រាករបស់អ្នក ក្លាយជាថ្ងៃដែលមានន័យពិតប្រាកដ ដោយអ្នកអាចដើរចេញពីសម្ពាធផ្សេងៗ ព្រមទាំងអាចចំណាយពេលជាមួយមនុស្សជាទីស្រឡាញ់។
- អនុញ្ញាតឱ្យខ្លួនឯងរីករាយជាមួយនឹងអារម្មណ៍នៅក្នុងរឿង ដែលមានទាំង សំណើច កំប្លែង និងកើតទុក្ខជាដើម។ អំឡុងពេលនេះ នឹងធ្វើឱ្យអ្នកបាត់អស់នូវភាពតានតឹងនៅថ្ងៃសម្រាក៕
