ក្នុងកាលៈទេសៈដែលប្រភេទការងារត្រូវបំពេញរាល់ថ្ងៃ ចាំបាច់ត្រូវការភាពច្នៃប្រតិដ្ឋគ្រប់ពេល តិចឬច្រើន ប្រាកដជាជួបប្រទះនូវបទពិសោធន៍មួយ គឺការគាំងគំនិតគិតអ្វីមិនចេញ! មិនថាការងារជាប្រភេទ​ សរសេរ ការឌីហ្សាញ និងការងារបែបសិល្បៈ ឬក៏អាជីពដទៃទៀត ។ ប្រសិន​បើអ្នក​កំពុងស្ថិតក្នុងស្ថានភាពធ្លាក់ចុះនូវភាពច្នៃប្រតិដ្ឋជារឿយៗ ការសាកល្បងទៅកន្លែងដែលមានរូបភាពប្លែកថ្មី អាចនឹងទទួលបានអត្ថប្រយោជន៍មួយចំនួនដូចខាងក្រោម ៖

១. ទស្សនៈថ្មី ៖ កាលដែលនៅក្នុងបរិយាកាសដដែលៗរៀងរាល់ថ្ងៃ ទោះចង់ ឬមិនចង់ អាចនឹងនាំឱ្យមានភាពធុញទ្រាន់ ឬក៏វិសាលភាព នៃការគិតចាប់ផ្តើមបង្រួមតូចជាងមុន។ ការចល័តចរ ទៅកន្លែងថ្មីៗ ឬបរិយាកាសថ្មីៗ បានជំរុញឱ្យមានការគិតប្លែកៗតាមរយៈបទពិសោធន៍ប្លែកៗ ក៏ដូចជាការជំរុញបាននូវគំនិតច្នៃប្រតិដ្ឋដែលមិនធ្លាប់មានពីមុនមក។

២. អារម្មណ៍ប្លែកនាំឱ្យគំនិតប្លែក ៖ បរិយាកាសប្លែកៗ ឬទេសភាពប្លែកៗ គឺជាកត្តាជំរុញឱ្យអារម្មណ៍មានភាពខុសប្លែកដូចគ្នា ហើយបរិយាកាសទៀតសោតមានច្រើនទម្រង់លើសពីរូបភាពដែលឃើញដោយភ្នែកទទេ ដោយមានដូចជា សម្លេង ក្លិន និងភាពរស់រវើកនៃវប្បធម៌របស់ទីតាំងនីមួយៗ។ ការផ្លាស់ប្តូរទីតាំងក៏មានច្រើនប្រភេទដែរ ដោយមិនចាំបាច់ទាល់តែប្តូរពីទីក្រុងមួយ ទៅក្រុងមួយទៀតនោះទេ! សាកល្បងផ្លាស់ប្តូរទីតាំងដែលមាននៅក្បែរៗខ្លួន ដូចជាការផ្លាស់ប្តូរបរិយាកាសហាងកាហ្វេ ព្រោះហាងកាហ្វេនីមួយៗមានភ្លេង និងមានរចនាបទខុសគ្នាទាំងអស់ ហើយការផ្លាស់ប្តូរទាំងនេះផ្តល់អារម្មណ៍សម្បូរបែបទៅតាមនោះដែរ។

៣. ការបំបែកទម្លាប់ដែលផ្តល់ភាពងាយស្រួល ៖ កាលដែលមានទម្លាប់ទៅកន្លែងដែលផ្តល់នូវផាសុកភាពញឹកញាប់ពេក យូរៗទៅអាចជំរុញឱ្យបង្កទម្លាប់ពន្យារពេល និងរាំងស្ទះក្នុងការបំផុសគំនិតថ្មីៗ។ ការផ្លាស់ប្តូរទម្លាប់ទៅកន្លែងដែលមិនសូវសាំ ត្បិតមិនសូវស្រណុកចិត្តនៅពេលដំបូងៗក៏ពិតមែន ប៉ុន្តែបានជំរុញឱ្យនឹកឃើញទស្សនៈថ្មីៗ គំនិតមានការផុសផុលឡើង តាមរយៈការសម្របខ្លួន និងការសាកល្បងបរិយាកាសថ្មី។

៤. ក្លាហានសាកល្បងបន្ថែម ៖ បរិយាសកាសថ្មីជំរុញឱ្យមានភាពក្លាហានក្នុងការសាកល្បងបន្ថែម និងជំរុញឱ្យមានចិត្តចង់ទៅកន្លែងថ្មីៗបន្ថែមទៀត ជំនួសឱ្យការទ្រឹងជញ្ជឹងគិតនៅមួយកន្លែង។ បទពិសោធន៍ នៃការដើរលើកទីមួយ នោះនឹងជំរុញឱ្យមានភាពក្លាហានក្នុងការដើរនាពេលបន្ទាប់ៗ មិនថាដើរឡើងភ្នំ ដើរទៅកន្លែងមិនស្គាល់ ឬការជិះដើរលេងក្នុងភូមិ ជិះជុំវិញសង្កាត់ និងក្នុង ឬក្រៅតំបន់ជាដើម។

៥. លើកកម្ពស់សុខភាពផ្លូវចិត្ត ៖ ផ្លាស់ខ្លួនទៅទីតាំងថ្មីៗត្រូវការយកចិត្តទុកដាក់ចំពោះការរៀបចំ និងការសិក្សាស្រាវជ្រាវ ពីទីតាំងដែលត្រូវទៅ ដែលនេះជាសកម្មភាពមួយ ជួយរក្សាស្មារតីឱ្យស្ថិតក្នុងបច្ចុប្បន្នភាព ក៏ដូចជាសុខភាពផ្លូវចិត្តជាទូទៅ៕