ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សាមួយរបស់សាកលវិទ្យាល័យ Maryville នៅសហរដ្ឋអាមេរិក អំពីការស្ទង់មតិអ្នកជំនាញអភិវឌ្ឍន៍ធនធានមនុស្សជាង ៥ពាន់នាក់នៅប្រទេសចំនួន ៣៥ បានបង្ហាញថា ៩២% ឆ្លើយពីអ្នកជំនាញ បានចាត់ទុកជំនាញទន់ដើរតួនាទីសំខាន់ខ្លាំងបំផុតសម្រាប់បុគ្គលិកកំពុងបម្រើការងារ ។ ដោយសារជំនាញទន់ ឬ soft skills ជាជំនាញបន្ថែមលើសមត្ថភាពចំណេះដឹងការងាររបស់បុគ្គល ។ ជំនាញមួយនេះមិនពិបាកសិក្សា និងជាជំនាញកើតចេញពីការសន្សំចំណេះដឹងដោយផ្ទាល់ តាមរយៈបទពិសោធន៍រស់នៅប្រចាំថ្ងៃ ។
ជំនាញទន់ត្បិតងាយរក និងងាយស្រួលរៀនក៏ពិតមែន ក៏ប៉ុន្តែមានមនុស្សមិនច្រើនប៉ុន្មាននោះទេ ដែលអាចប្រើប្រាស់ទេពកោសល្យពីជំនាញទន់ ដើម្បីដោះស្រាយបញ្ហា ឬធ្វើការងារឱ្យមានប្រសិទ្ធភាព ។ ដូច្នេះនៅក្នុងស្ថាប័នការងារចាំបាច់ត្រូវការបុគ្គលិកដែលមានជំនាញទន់ខ្លាំងបំផុត ។ តើគេអាចទទួលបានជំនាញទន់បានយ៉ាងដូចម្តេច? ខាងក្រោមនេះជាគន្លឹះ ឬតិចនិច ៤ចំណុចរៀនជំនាញទន់ លឿនរហ័សតាមរយៈសកម្មភាពប្រចាំថ្ងៃ ។
១. ជំនាញទន់កើតតាមរយៈការអាន ៖ អំណានដើរតួនាទីសំខាន់ណាស់សម្រាប់ចំណេះដឹង និងសកម្មភាពភាពរបស់មនុស្ស ។ បច្ចុប្បន្នមានឯកសារជាច្រើនដែលបានសរសេរពីរបៀបសិក្សាជំនាញទន់ ដូចជា សិល្បៈទំនាក់ទំនង សិល្បៈនិយាយស្តី សិល្បៈទាក់ទាញចិត្តអ្នកដទៃ វិធីសាស្ត្រចូលក្នុងចំណោមមនុស្ស ព្រមទាំងរបៀបធ្វើការឱ្យមានប្រសិទ្ធភាពជាដើម ។ តាមរយៈសៀវភៅ បទបង្ហាញ និងឯកសារនានា ដែលមានទាំងនៅក្នុងអ៊ីប៊ុក និងមាននៅលើគេហទំព័រនានាផងនោះ មេរៀនស្តីពីជំនាញទន់ហាក់មិនពិបាកស្វែងរកអាន ឬពិបាករកសិក្សាឡើយ លើកលែងតែបុគ្គលមិនមានទម្លាប់អានតែប៉ុណ្ណោះ ។
២. ជំនាញទន់កើតតាមរយៈការស្តាប់ ៖ របៀបស្តាប់មានពីរទម្រង់សម្រាប់អ្នកមានបំណងចង់សិក្សាពីជំនាញទន់ ។ ទី១ ស្តាប់ដោយផ្ទាល់រវាងបុគ្គលនិងបុគ្គល និងទី២ ស្តាប់ដោយការប្រើប្រាស់បច្ចេកវិទ្យាជំនួយ ។ ការស្តាប់ដោយផ្ទាល់ គឺរបៀបស្តាប់បទពិសោធន៍របស់អ្នកជំនាញ ឬវាគ្មិនជំនាញ តាមរយៈការសន្ទនាសាមញ្ញក្នុងនាមក្រុមការងារ ការប្រាស្រ័យទាក់ទងផ្លូវការ និងការចែករំលែកជាសាធារណៈពីអ្នកដែលមានបទពិសោធន៍ ។
ចំណែកការស្តាប់ដោយប្រើប្រាស់ឧបករណ៍បច្ចេកវិទ្យាជំនួយ មានដូចជា ស្តាប់សំឡេងមេរៀននៅតាមវិទ្យុ ស្តាប់កម្មវិធីផតខាស់ ឬតាមរយៈកម្មវិធីបណ្តាញសង្គមនានា ។ ក្រៅពីស្តាប់សំឡេងនៅលើប្រព័ន្ធបណ្តាញសង្គម សព្វថ្ងៃមនុស្សក៏អាចទស្សនាវីដេអូ ឬបទបង្ហាញពីមេរៀនជំនាញទន់បានដោយងាយផងដែរ ។
៣. ជំនាញទន់កើតតាមរយៈការសង្កេត ៖ នៅក្នុងថ្នាក់រៀន នៅកន្លែងធ្វើការ នៅទីសាធារណៈ ឬនៅក្នុងកម្មវិធីពិសេសៗអ្វីមួយ សុទ្ធសឹងជាទីតាំងដែលប្រមូលផ្តុំដោយមេរៀនជំនាញទន់ទាំងអស់ ដូចជា របៀបប្រាស្រ័យទាក់ទង ការនិយាយស្តី ការគោរព របៀបធ្វើការក្រុម ព្រមទាំងរបៀបដោះស្រាយបញ្ហា – ល – ។ ក្រៅពីសិក្សាអំពីឥរិយាបថជំនាញទន់បុគ្គលខាងក្រៅ ការសិក្សាពីឥរិយាបថក្រុមការងារនៅជុំវិញខ្លួន ក៏មានឥទ្ធិពលខ្លាំងបំផុតនៅក្នុងការអភិវឌ្ឍន៍សមត្ថភាពជំនាញទន់ឱ្យប្រសើរឡើងផងដែរ ។
៤. ជំនាញទន់កើតតាមរយៈការអនុវត្ត ៖ ទំនាក់ទំនង ទម្លាប់អាន ទម្លាប់សរសេរ ទម្លាប់បង្កើតគំនិតច្នៃប្រតិដ្ឋថ្មីៗ ការគ្រប់គ្រងពេលវេលាបានល្អ ព្រមទាំងទម្លាប់ធ្វើឱ្យរាងកាយនិងខួរក្បាលមានចលនាសកម្ម អាចជួយឱ្យមនុស្សអនុវត្តជំនាញទន់បានលឿនរហ័ស ។ ជំនាញទន់ជាជំនាញដែលត្រូវការការដុះខាត់ជាប្រចាំតាមរយៈសកម្មភាពប្រចាំថ្ងៃ ។ ប្រសិនបើមនុស្សបង្កើតភាពស្និទ្ធស្នាល ស្នាមញញឹម និងរបៀបធ្វើការដោយវិជ្ជមានជាមួយមនុស្សជុំវិញខ្លួន នោះពីមួយថ្ងៃទៅមួយថ្ងៃ ភាពប៉ិនប្រសព្វនៃជំនាញនេះក៏កាន់តែរីកចម្រើនផងដែរ ។ ជំនាញទន់ជាជំនាញងាយរក និងងាយស្រួលរៀន ៕
