ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សំឡេងឆ្លាតវៃ និងអារម្មណ៍ឆ្លាតវៃ មិនមែនគ្រាន់តែជាគំនិតដែលអ្នកកំពុងព្យាយាមបង្ហាញនោះទេ។ របៀបដែលអ្នកនិយាយវាសំខាន់ផងដែរ។ លោក Matt Abrahams សាស្ត្រាចារ្យនិងអ្នកជំនាញផ្នែកទំនាក់ទំនងរបស់ Stanford បានលើកឡើងថា មានឃ្លាសាមញ្ញចំនួន បី នៅពេលដែលអ្នកប្រើហើយ ធ្វើឱ្យអ្នកដទៃគិតថា អ្នកជាមនុស្សពូកែ និងមានភាពឆ្លាតវៃផ្នែកអារម្មណ៍។
១. តើអ្នកអាចប្រាប់ខ្ញុំបន្ថែមអំពីរឿងនេះបានទេ? ៖ មនុស្សដែលមានបញ្ញាផ្នែកអារម្មណ៍ខ្ពស់ តែងតែសួរសំណួរណា ដែលធ្វើឱ្យដៃគូសន្ទានរបស់គេមានអារម្មណ៍ថា រាល់ពាក្យពេចន៍ដែលខ្លួនបាននិយាយ គឺត្រូវបានឮ និងយកចិត្តទុកដាក់។ ជាមួយគ្នានេះ គេចាប់អារម្មណ៍ពីអារម្មណ៍អ្នកដទៃ និងប្រុងប្រយ័ត្នចំពោះពាក្យសម្តីដែលគេនិយាយ។ ចំពោះការប្រើប្រាស់ឃ្លាថា «តើអ្នកអាចប្រាប់ខ្ញុំបន្ថែមអំពីរឿងនេះបានទេ?» គឺជាផ្នែកមួយនៃការលើកទឹកចិត្តអ្នកដទៃ ឱ្យពិភាក្សាអារម្មណ៍ និងបទពិសោធន៍របស់គេបន្ថែមជាមួយអ្នក និងជាការបើកផ្លូវ ដែលធ្វើឱ្យគេមានអារម្មណ៍កក់ក្ដៅអំឡុងពេលសន្ទនាជាមួយអ្នក។
២. តើខ្ញុំអាចសុំយោប់អ្នកបន្ថែមបានទេ? ៖ ការសុំដំបូន្មាន អាចធ្វើឱ្យអ្នកមើលទៅឆ្លាតជាងមុន ព្រោះអ្នកអាចនឹងទទួលបានការពិភាក្សាដែលមានគំនិតចម្រុះ និងច្រើនជ្រុង។ ទន្ទឹមនឹងនេះ ប្រសិនបើអ្នកសួរសំណួរនេះទៅកាន់មនុស្សឆ្លាត ពួកគេនឹងគិតថា អ្នកជាមនុស្សឆ្លាត និងដាក់ខ្លួន ហើយបើកចិត្តទទួលយកគំនិតអ្នកដទៃ។
យ៉ាងណាក៏ដោយ ឧបសគ្គដ៏ធំបំផុតមួយ ក្នុងការសុំយោបល់ ឬសួរសំណួរទៅកាន់អ្នកដទៃ គឺការថប់បារម្ភ។ ប្រសិនបើអ្នកអាចជំនះអារម្មណ៍មួយនេះបាន នោះអ្នកនឹងអាចបង្កើតឱកាសថ្មីៗជាច្រើនសម្រាប់ខ្លួនឯង។
៣. ខ្ញុំគិតថា ឬខ្ញុំយល់ថា… ៖ នៅពេលដែលអ្នកកែសម្រួលគំនិតអ្នកដទៃ ឬផ្ដល់យោបល់ដល់អ្នកដទៃ គឺចាំបាច់ត្រូវប្រុងប្រយ័ត្នក្នុងការប្រើប្រាស់ពាក្យពេចន៍។ មនុស្សដែលមានការយល់ដឹង និងបញ្ញាផ្នែកអារម្មណ៍ខ្ពស់ គឺប្រើប្រាស់ពាក្យដែលមានលក្ខណៈច្បាស់លាស់ និងទន់ភ្លន់។ បើតាមអ្នកជំនាញ ការប្រើពាក្យ ខ្ញុំគិតថា ឬខ្ញុំយល់ថា… គឺភាសាបញ្ចេញគំនិត ឬយោបល់ ដែលមានលក្ខណៈសមរម្យមួយ ដែលអ្នកអាចប្រើប្រាស់ ដើម្បីកែសម្រួល ឬផ្ដល់យោបល់ដល់អ្នកដទៃ៕
