ភ្នំពេញ – ដើម្បីរួមចំណែកសម្រេចគោលដៅអភិវឌ្ឍន៍ប្រកបចីរភាពលើកទី៦ ទឹកស្អាត និងអនាម័យ ធានាឱ្យមានទឹកនិងអនាម័យ និងការគ្រប់គ្រងទឹកនិងអនាម័យប្រកបដោយចីរភាពសម្រាប់ប្រជាជនគ្រប់គ្នា ពិតជាមិនអាចខ្វះបានពីការចូលរួមយ៉ាងសកម្មរបស់យុវជន។ ទន្ទឹមគ្នានេះ ការយកចិត្តទុកដាក់របស់យុវជនទៅលើកិច្ចការលើកកម្ពស់ទឹកស្អាត និងអនាម័យនិងរួមចំណែកជួយសហគមន៍របស់ពួកគេកាន់តែប្រសើរ។

យុវជនសិស្ស ឈន សួស្ដី ជានិស្សិតឆ្នាំទី៣ នៃសាកលវិទ្យាល័យស្វាយរៀង ជំនាញអភិវឌ្ឍន៍ជនបទ និងជាយុវជនការស្ម័គ្រចិត្តដើម្បីសហគមន៍ខ្ញុំ (VMC) បាននិយាយថា ទឹកជាវត្ថុដ៏មានសារៈសំខាន់បំផុតដល់មនុស្សគ្រប់រូបនៅលើផែនដី ដូចនេះ តម្រូវការទឹកស្អាត និងអនាម័យវាពិតជាមានសារៈសំខាន់ ដោយសារតែទឹកជាប្រភពមួយអាចធ្វើឱ្យមនុស្សរស់បាននៅក្នុងរយៈពេលយូរ។

យុវជនសិស្ស ឈន សួស្ដី បន្ថែមថា ការប្រើប្រាស់ទឹកស្អាត ជួយប្រជាជនមានសុខភាពល្អ កាត់បន្ថយការឆ្លងមេរោគ ក៏ដូចជាផលប៉ះពាល់នៃជាតិគីមីដែលមាននៅក្នុងប្រភពទឹកផ្សេងៗ ។ ចំណែកការរក្សាអនាម័យក៏ដូចជាទឹកស្អាតដែរ ប្រសិនជាយើងមិនយកចិត្តទុកដាក់ទេវានឹងនាំឱ្យប៉ះពាល់ដល់សុខភាព ធ្វើឱ្យយើងខាតបង់ថវិកា ខាតពេលវេលា និងអាចធ្វើឱ្យធ្លាក់ខ្លួនឈឺ និងពិបាកក្នុងការព្យាបាលផងដែរ។

និស្សិតឆ្នាំទី៣ ដែលកំពុងសិក្សា ជំនាញអភិវឌ្ឍន៍ជនបទ រូបនេះ បន្ថែមថា នៅក្នុងនាមជាយុវជនម្នាក់ រូបគេចង់ចូលរួមចំណែកជួយផ្សព្វផ្សាយអំពីចំណេះដឹងទឹកស្អាត និងអនាម័យ ក៏ដូចជាជួយណែនាំដល់ប្រជាពលរដ្ឋដែលស្ថិតនៅក្នុងតំបន់ដាច់ស្រយាល និងឆ្ងាយពីទីប្រជុំជន ដែលមិនទាន់យល់ដឹងពីការរក្សាអនាម័យឱ្យផ្លាស់ប្ដូរផ្នត់គំនិតចេះគិតគូរពីសុខភាព ប្រើប្រាស់ទឹកស្អាត និងបង្គន់អនាម័យឡើងវិញ។

“ប្រសិនយើងមិនរួមចំណែកឱ្យបានផុសផុលទេពួកគាត់អាចនឹងនៅតែបន្តធ្វើតាមទម្លាប់របស់គាត់ បន្ទោរបង់ពាសវាលពាសកាល កាន់តែធ្វើឱ្យពិបាកគ្រប់គ្រងអនាម័យ និងនាំឱ្យកើតជំងឺអាសន្នរោគទៀតផង”

យុវជនសិស្ស ឈន សួស្ដី ជានិស្សិតឆ្នាំទី៣ នៃសាកលវិទ្យាល័យស្វាយរៀង

ជាមួយគ្នានេះ កញ្ញា ក្រាញ់ ផល្លី ជាសមាជិកក្រុមប្រឹក្សាឃុំព្រៃពួច និងជាយុវជនស្ម័គ្រចិត្តស្រុកកណ្តាលស្ទឹង បានបន្ថែមថា សម្រាប់ស្រី្ត និងក្មេងស្រីប្រសិនមិនមានទឹកស្អាត និងបង្គន់អនាម័យប្រើប្រាស់ ភាគច្រើនគ្រួសាររបស់គាត់ប្រឈមបញ្ហាខ្លាំង ព្រោះស្រ្តីត្រូវការអនាម័យទៅលើខ្លួនប្រាណ បើប្រើប្រាស់ទឹកកខ្វក់នឹងនាំឱ្យឆ្លងមេរោគ ឆ្លងជំងឺផ្សេងៗ ព្រោះស្រ្តីងាយរងគ្រោះពាក់ព័ន្ធជាមួយជំងឺស្រ្តី។

ដោយសារមើលឃើញបញ្ហាប្រឈមខ្លាំងសម្រាប់ស្រ្តី និងក្មេងស្រ្តីមិនមានបង្គន់ប្រើបាស់ ដែលអាចបង្ករឱ្យមានជំងឺ ឬការរំលោភបំពាន ។ កញ្ញា ក្រាញ់ ផល្លី ក៏បានចុះសម្ភាសន៍ផ្ទាល់ជាមួយគ្រួសារក្រីក្រនៅក្នុងឃុំរបស់ខ្លួន ដើម្បីឆ្នើសុំថវិកាតាមរយៈអង្គការសប្បុរសធម៌ដើម្បីផ្ដល់ទឹកស្អាត និងបង្គន់អនាម័យជូនប្រជាពលរដ្ឋក្នុងសហគមន៍។

“សម្រាប់ខ្ញុំគ្រួសារស្រ្តីណាដែលមានបញ្ហាដូចជាស្រ្តីមេមាយ មិនមានបង្គន់ប្រើប្រាស់ គឺពួកយើងយកចិត្តទុកដាក់ខ្លាំង យើងនឹងរួចចំណែកដោះស្រាយបញ្ហាឱ្យពួកគាត់មិនឱ្យគាត់បន្ទោរបង់ពាសវាលពាសកាលព្រោះវាជាបញ្ហាប្រឈមនៅក្នុងសហគមន៍”

កញ្ញា ក្រាញ់ ផល្លី ជាសមាជិកក្រុមប្រឹក្សាឃុំព្រៃពួច

សមាជិកក្រុមប្រឹក្សាឃុំព្រៃពួច រូបនេះ បន្ថែមថា ធម្មតាឃុំតែងមានបដិភាគមួយសម្រាប់ជួយប្រជាពលរដ្ឋដែលគ្មានលទ្ធភាព តាមរយៈការជួយស្នើសុំថវិកាពីអង្គការ អាជ្ញាធរដែលពាក់ព័ន្ធ ឬការចូលរួមបដិភាគធ្វើបង្គន់ដែលអាចប្រើប្រាស់បានសម្រាប់ប្រជាពលរដ្ឋដែលគ្មានលទ្ធភាព ។ ទន្ទឹមគ្នានេះ នៅពេលប្រជាពលរដ្ឋទទួលបានទឹកស្អាតប្រើប្រាស់ និងមានបង្គន់ប្រើប្រាស់ គឺបានធ្វើឱ្យពួគាត់សប្បាយចិត្ត ចំណែកក្រុមការងារក្រុមប្រឹក្សាឃុំក៏សប្បាយចិត្តដូចគ្នាក្រោយបានរួមចំណែកជួយប្រជាពលរដ្ឋនៅក្នុងសហគមន៍របស់ខ្លួន។

គួរជម្រាបជូនថា រាជរដ្ឋាភិបាលបានរៀបចំផែនការយុទ្ធសាស្ត្រជាតិស្ដីពីការផ្គត់ផ្គង់ទឹកស្អាតនិងការលើកកម្ពស់អនាម័យ នៅជនបទឆាំ្ន២០១៤-២០២៥ ក្នុងគោលបំណង ធ្វើឱ្យសេវាទឹកស្អាត សុខភាព និងអនាម័យនៅជនបទមានភាពប្រសើរឡើង និងប្រកបដោយ និរន្តរភាពដើម្បីរួមចំណែកគាំទ្រដល់រាជរដ្ឋាភិបាលក្នុងការលើកកម្ពស់សុខភាព និងអាហារូបត្ថម្ភ ។ ក្នុងនោះ រាជរដ្ឋាភិបាលកម្ពុជាប្ដេជ្ញាសម្រេចឱ្យបាន ១០០% នូវអត្រាគ្របដណ្ដប់អនាម័យជនបទត្រឹមឆ្នាំ២០២៥៕